निकरुन जातोर
मिसर देस् ने इसराएलिमन
1
जाकूब जेके इसराएल बले बलुआत, हुनचो बेटामन आपलाहान कुटुम लोग के धरुन आपलो बुआ संगे मिसर देस् ने ईला। 2 हुनमन एमन आत: रूबेन, सिमोन, लेवी, जहूदा, 3 इसाकार, जबूलून, बिनयामीन; 4 दान, नपताली, गाद आउर आसेर। 5 जाकूब चो थर ने तीन कोड़ी दस* झन रला। जाकूब चो बेटा जूसुफ आगतले मिसर देस् ने रते रलो। 6 जूसुफ आउर हुनचो सपाय भाईमन आउर हुन पीड़ी चो सपाय लोगमन मोरुन गेला।इसराएलिमन चो नवा पीड़ी
7 हुनचो पाछे बले इसराएलिमन चो थर-लर खुबे बाड़ते गेला आउर हुनमन सबु बरन ले खुबे सकत बीतामन होला। हुनमन खुबे जन होउन गुलाय देस् ने भोरला।
8 मिसर देस् ने गोटोक नवा राजा, राज करुक मुरियालो जोन जूसुफ के नी जानते रलो। 9 हुन आपलो रयत के बललो: “दखा, इसराएलिमन आमचो ले गनती ने खुबे जन आउर आगर सकत बितामन होलासोत। 10 इआ, आमी एमन संगे चलाक ले बेबार करुं, नोहले हुनमन खुबे जन होउन लड़ई बेरा आमचो बयरीमन संगे मिसुन आमके हरादे, आउर आमचो देस् के छांडुन परादे।” 11 एईकाजे हुनमन, इसराएलिमन के खुबे दुख-तकलीस देउन बुता करातो काजे मुनसीमन के तियारला; आउर हुनमन इसराएलिमन ले फिरोन* काजे पीतोम आउर रामसेस नाव चो बड़े-बड़े गदेया बिती सहरमन बनाला। 12 मानतर इसराएलिमन के मिसरीमन जितरो दुख-तकलीस दिला, उतलेई हुनमन गनती ने बाड़ते जाउन गुलाय देस् ने बिगरला। एईकाजे मिसरीमन, इसराएलिमन ले खुबे डरला। 13 तेबले बले मिसरीमन, इसराएलिमन के आउर बले खुबे खट-खट कमेया-बुता कराते रला। 14 गारा-ईटा बनातोर आउर बेड़ा-खाड़ा चो सपाय बरन चो कमेया बुता कराउन-कराउन हुनमन इसराएलिमन चो जीव के मुरमुरा करते रला; काईची बुता कराले बले हुनमन संगे खुबे कटुर बेबार करते रला।
15 मिसर चो राजा, सिपरा आउर पूआ नाव चो इबरी जात चो दुय झन सूईनमन के हुकुम दिलो, 16 “जिदलदांय तुमी इबरी बायलेमन के नंगत कराउक जाहासे, तेबे लेका जनमले हुनके हुताय मोरते मारा, मानतर लेकी जनमले हुनके बचाहा।” 17 मानतर हुन सूईनमन, महापरभु के डरतो किरता मिसर चो राजा चो हुकुम नी मानुन लेका पिलामन के बले बचाते रला। 18 तेबे मिसर चो राजा सूईनमन के हागदेउन पुछलो, “तुमी काय काजे असन करसास? लेका पिलामन चो जीव के काय काजे बचायसाहास?” 19 सूईनमन फिरोन के बलला, “इबरी बायलेमन, मिसरी बायलेमन असन नोआत। हुनमन इतलो बरसक आत कि आमचो नी अमरु-अमरु छर-फर होउन रउआत।” 20-21 महापरभु के डरतो किरता, महापरभु सूईनमन के बर दिलो, आउर हुनमन चो थर मांडली। असन बरन ले, महापरभु सूईनमन चो भलई करलो आउर इबरीमन खुबे जन होउन सकत बीतामन होला। 22 तेबे फिरोन आपलो सपाय रयत के हुकुम दिलो, “इबरीमन चो सपाय कोंहरो लेका पिलामन के नील नंदी ने पकाउन दियास। मानतर सपाय लेकी पिलामन के जीउक दियास।”