मोसा चो जनम
2
लेवी कुटुम चो गोटोक मनुक, गोटोक लेवी कुआंरी-लेकी के बिया होलो। 2 हुन बायले पेटे ठेबली आउर गोटोक लेका-पिला के जनमाली। हुन पिला खुबे सुंदर रये गुने, हुनके तीन मयना लुकाउन संगाली। 3 जेबे हुनके आउर लुकाउक नी सकली, तेबे बावंस चो गोटोक टाकरी बनाली, आउर कली-माटी आउर डामर के लिपली। हुन, टाकरी भीतरे लेका-पिला के सुआउन नील नंदी खंडे गुगुनड़ामन चो मंजिगता छांडुन दिली। 4 हुन लेका-पिला चो बईन, हुनचो काय होयदे बलुन लापी उबा होउन दखते रये। 5 हुदलीदांय फिरोन चो बेटी नील नंदी ने नहाउक एउ रली, आउर हुनचो कमेयीनमन संगे नंदी खंडे बुलते रली; तेबे गुगुनड़ामन चो मंजिगता टाकरी के दखुन आपलो कमेयीन के हुनके आनतो काजे पठाली। 6 हुन टाकरी उगाड़तोके गोटोक गागतो लेका-पिला के दखली। हुन जीव-दुखुन बलली, “ए तो कोनी इबरी चो पिला आय होती।” 7 तेबे लेका-पिला चो बईन फिरोन चो बेटी के बलली, “ए लेका-पिला के गोरस खुआतो काजे काय, मय कोनी इबरी बायले के हागदेउन आनेंदे?” 8 फिरोन चो बेटी बलली, “जा, हागदेउन आन।” तेबे हुन लेकी जाउन पिला चो आया के हागदेउन आनली। 9 फिरोन चो बेटी हुन बायले के बलली, “तुय ए पिला के ने, आउर एके गोरस खुआउन मोचो काजे पोस। मय तुके भूती देयंदे।” तेबे हुन बायले हुन पिला के नेउन पोसुक मुरियाली। 10 लेका-पिला बड़े होलोके, हुनके फिरोन चो बेटी लगे नीली, आउर हुन लेका-पिला हुनचो बेटा होलो; हुन, “मय एके पानी ले निकरालेसे, बलुन लेका चो नाव मोसा संगाली।”मोसा मिद्यान देस् ने परातोर
11 मोसा जुवान होलोके, आपलो भाई-बंदमन लगे जाउन हुनमन चो कमेया-बुता के दखलो; हुता हुन, गोटोक मिसरी मनुक, इबरी मनुक के मारतोके दखलो। 12 तेबे मोसा ए बाटे-हुन बाटे दखलो आउर कोनी दखा नी देतोके हुन मिसरी माने के मोरते मारुन बारुसरा ने ढाकुन लुकालो। 13 दुसर दिने हुन, दुय झन इबरी मनुकमन के झगड़ा होतो के दखलो; आउर ओधरमी मनुक के बललो, “तुय आपलो भाई के काय काजे मारसीस?” 14 तेबे हुन बललो, “कोन तुके आमचो उपरे राजपाल आउर नियाव करु बनालोसे? जसन तुय मिसरी मनुक के मारलीस, काय उसने मोके बले मारुक मन करसीस?” ए गोट के सुनुन मोसा खुबे डरलो आउर बिचारलो, “ए गोट सपाय लोग जानला होती।” 15 जिदलदांय फिरोन ए गोट के सुनलो तेबे हुन, मोसा के मोरते मारतो बिचार करलो।
मानतर मोसा, फिरोन थान ले मिदयान देस् ने परालो; आउर हुता अमरुन गोटोक चुंआ लगे जाउन बसलो। 16 मिदयान देस् चो पुजारी के सात झन बेटीमन रला; हुनमन आपलो घर चो छेरी-मेंडीमन के पानी खुआतो काजे चुंआ ले पानी झीकुन डोंगीमन ने भोरते रला। 17 तेबे दुसर धोरईमन एउन हुनमन के चुंआ लगले खेदते रओत; मानतर मोसा पुरे होउन लेकीमन चो साका होलो आउर हुनमन चो छेरी-मेंडीमन के पानी खुआलो। 18 लेकीमन घरे बोहड़लोके हुनमन चो बुआ रूएल पुछलो, “आजी कसन झटके ईलास?” 19 हुनमन बलला, “गोटोक मिसरी मनुक आमचो साका होउन आमके धोरईमन ले छंडालो आउर आमचो छेरी-मेंडीमन के पानी खुआलो।” 20 हुन आपलो बेटीमन के बललो, “हुन मनुक कहां आसे? काय काजे तुमी हुनके छांडुन ईलास? हुनके हागदेउन आना, हुन आमचो घरे खायदे।” 21 मोसा हुनमन चो घरे ईलो आउर हुनमन संगे रतो काजे राजी होलो, तेबे रूएल आपलो बड़े बेटी सिपोरा के मोसा संगे बिया करुन दिलो। 22 हुन, गोटोक लेका-पिला के छर-फर होली, “मय ए देस् ने परदेसिया आय” बलुन मोसा हुनचो नाव गरसोम संगालो।