महापरभु, मोसा के हागदेतोर
3
मोसा आपलो सतरा, मिदयान देस् चो पुजारी जितरू* चो छेरी-मेंडीमन के चराते रये; गोटोक दिने हुन, छेरी-मेंडीमन के चरातो काजे टंग-टंगा भाटा चो हुन पाट होरेब डोंगरी ने नीलो, जेके महापरभु चो डोंगरी बलुआत। 2 जहोवा चो दूत, झिलाटी चो मंजी ने भड़-भड़तो आईग ले मोसा के दरसन दिलो; हुन झिलाटी जरते तो रये, मानतर नी डसते रये। 3 तेबे मोसा बिचारलो, “मय लगे जाउन दखेंदे, कसन ने ए झिलाटी नी डसेसे।” 4 जहोवा, मोसा एतोके दखलो आउर जरतो झिलाटी भीतरले बललो, “ए मोसा, ए मोसा!” तेबे मोसा बललो, “ओय! काय हुकुम आय?” 5 जहोवा हुनके बललो, “लगे नी आव; तुचो पांय ले पनई के हिटाव, कसनबलले तुय जोन थाने उबलिसीस हुन पवितर भुंय आय।” 6 तेबे जहोवा बललो, “मय तुचो बुआ चो महापरभु, अबराहम चो महापरभु, इसहाक आउर जाकूब चो महापरभु आंय।” तेबे मोसा आपलो थमना के ढाकलो, कसनबलले हुन महापरभु के दखतो काजे डरते रये।7 जहोवा, मोसा के बललो, “मिसर ने रतो मोचो रयत चो कमेया-बुता के मय दखलेसे, आउर मुनसीमन किरता हुनमन चो कहरतोके सुनलेसे; हुनमन चो तकलीस के जानलेसे, 8 एईकाजे एदांय मय हुनमन के मिसरीमन चो हक ले छंडातो काजे आउर हुन देस् ले निकराउन गोटोक नंगत आउर बड़े देस् ने, जोन थाने गोरस आउर ओंडार-तेल बोहेसे* बललोने कनानी, हित्ती, एमोरी, परिज्जी, हिव्वी आउर जबूसी लोगमन चो देस् ने अमरातो काजे उतरुन ईलेसे। 9 एदांय इसराएलिमन चो कहरतोके मय सुनलेसे आउर हुनमन उपरे मिसरीमन करतो डाटा-टेवा के बले दखलेसे। 10 एईकाजे आव, मोचो इसराएली रयत के मिसर ले निकराउन आनतो काजे मय तुके फिरोन लगे पठायंदे।” 11 मानतर मोसा, महापरभु के बललो, “फिरोन लगे जाउन इसराएलिमन के मिसर देस् ले निकराउन आनतो काजे मय कोन आंय?” 12 महापरभु बललो, “सते, मय तुचो संगे रयंदे। तुके पठाउ, मय आंय; एचो चीना एई रयदे: जेबे तुय इसराएलिमन के मिसर देस् ले निकराउन आनसे, तेबे तुमी एई डोंगरी ने महापरभु चो आराधना करासे।”
महापरभु, मोसा के इसराएलिमन लगे पठातोर
13 मोसा, महापरभु के बललो, “जिदलदांय मय इसराएलिमन लगे जाउन सांगेंदे, ‘तुमचो पुरखामन चो महापरभु, मोके तुमचो लगे पठालोसे’, आउर हुनमन मोके, ‘तुचो नाव’ पुछलोने मय हुनमन के काय सांगेंदे?” 14 महापरभु, मोसा के बललो, “मय जोन आंय, हुनी आंय।” हुन फेर बललो, “तुय, इसराएलिमन के असन बल, जेचो नाव ‘मय आंय’, हुनी मोके तुमचो लगे पठालोसे।” 15 महापरभु, मोसा के असन बललो, “तुय इसराएलिमन के बल, ‘तुमचो पुरखामन चो महापरभु बललोने, अबराहम चो महापरभु, इसहाक चो महापरभु आउर जाकूब चो महापरभु-जहोवा, मोके तुमचो लगे पठालोसे’: जुग-जुग काजे एई मोचो नाव रयदे, आउर पीड़ी-पीड़ी मोके एई नाव ले जानदे। 16 एईकाजे जाउन इसराएली धरम-सियानमन के रूंडाउन हुनमन के बल, ‘तुमचो पुरखा अबराहम, इसहाक आउर जाकूब चो महापरभु जहोवा मोके दरसन देउन बललोसे: मय तुमके आउर मिसर देस् ने तुमचो उपरे होतो डाटा-टेवा के धियान दिलेसे; 17 एदांय मय तुमके मिसर देस् चो कमेया-बुता ले निकराउन कनानी, हित्ती, एमोरी, परिज्जी, हिव्वी आउर जबूसी लोगमन चो देस् ने पक्का नेयंदे ची, जोन थाने गोरस आउर ओंडार-तेल बोहेसे।’ 18 तेबे हुनमन तुचो गोट धरदे आउर तुय इसराएली धरम-सियानमन संगे जाउन मिसर चो राजा के बल, ‘इबरीमन चो महापरभु संगे आमचो भेट होलीसे, एईकाजे आमके महापरभु जहोवा काजे तीन दिन चो बाट टंग-टंगा भाटा ने जाउन जतरा चेगाउक देस’। 19 मय जानेंसे, मिसर चो राजा मोचो अचरित सकत दखलोर नोहलोर तुमके जाउक नी देयदे। 20 तेबे मय हाथ लमाउन अचरित बुतामन दखाउन मिसर देस् चो लोगमन के डंड देयंदे; हुनचो पाछे, हुन तुमके जाउक देयदे। 21 फेर मय मिसरीमन के तुमचो उपरे दया दखायंदे, तुमी निकरुन जातो बेरा चुचाय हाथ नी जाहासे, 22 मानतर तुमचो बायलेमन आपलो-आपलो घर-लग चो आउर आपलो घरे रतो बायलेमन ले सोन-रूप चो माला-मूंदी आउर फटई मांगदे, आउर तुमी हुन तीजमन आपलो बेटा-बेटीमन के पींदाहासे; असन बरन ले तुमी मिसरीमन के चरचरा करासे।”