मोसा अचरित सकत पावतोर
4
मोसा जहोवा के बललो, “मानतर हुनमन मोचो गोट के सुनुन नी पतेयाला जाले, मोके उलटा बलदे, ‘जहोवा तुके दरसन नी दिलोसे’।” 2 जहोवा हुनके बललो, “तुचो हाथे काय आसे?” हुन बललो, “गोटोक बड़गा।” 3 जहोवा बललो, “हुनके भुंये पकाव।” जेबे हुन बड़गा के पकालो, हुन बड़गा साप बनली; आउर मोसा हुताले पाट गुचलो। 4 मानतर जहोवा, मोसा के बललो, “तुचो हाथ लमाउन हुनचो लेंगड़ी के धर”, तेबे हुन, हाथ लमाउन साप चो लेंगड़ी के धरलो, आउर हुन साप बड़गा बनली। 5 फेर जहोवा बललो, एचोले लोगमन पतेयादे कि तुचो पुरखामन चो महापरभु बललोने, अबराहम चो महापरभु, इसहाक चो महापरभु आउर जाकूब चो महापरभु तुके दरसन दिलोसे। 6 जहोवा फेर मोसा के बललो, तुचो हाथ के आपलो छाती ने संगाउन ढाक, मोसा आपलो हाथ के छाती ने संगाउन ढाकलो। जेबे हुनके हुताले निकरालो, तेबे मोसा आपलो हाथ के कोढ़ बेमार किरता पंडरा होलोके दखलो। 7 फेर जहोवा बललो, “आपलो हाथ के छाती ने फेर संगाउन ढाक।” जेबे मोसा आपलो हाथ के छाती ने संगाउन ढाकलो तेबे आपलो हाथ के आगे चो असन रलो के दखलो। 8 जहोवा मोसा के बललो, “हुनमन तुचो गोट के नी मानले आउर पईल चीना के नी पतेयाले, ए दुसर चीना के पतेयादे। 9 हुनमन ए दुनो चीना के नी पतेयाले, आउर तुचो गोट के बले नी मानले, तुय नील नंदी चो खिंडिक पानी के डुमुन आन आउर सुकलो भुंये रिकाव, तेबे तुचो रिकालो पानी भुंय उपरे लोउ उलटेदे।” 10 मोसा, जहोवा के बललो, “ए मोचो परभु, मय आगतले आउर जिदलदांय ले तुय मोचोले गोटेयालीस हुदलदांय ले बले मय सरसरा गोटेयाउक नी जाने मानतर धीरे ले गोटेयाउआंय।” 11 जहोवा हुनके बललो, “मनुक चो टोंड के कोन बनालोसे? नोहले, मनुक के कोंदा, भयरा, काना आउर दखतो बीता, मय जहोवा के छांडुन आउर कोन बनायसे? 12 एदांय तुय जा, जोन तुके बलतोर आय, मय तुचो संगे रउन तुचो टोंड ले बलायंदे।” 13 मोसा बललो, “ए मोचो परभु, दया करुन कोनी दुसर के पठाव।” 14 तेबे जहोवा खुबे रीस होउन मोसा के बललो, “काय लेवी बंस चो हारून तुचो भाई नोआय? मय जानेंसे, हुन सरसरा गोटेयाउ आय। दख, हुन तुके भेटुक एयसे, आउर तुके भेटुन खुबे हरिक होयदे। 15 हुनके काय बलतोर आय सपाय गोट तुय हुनके सांग, मय तुचो आउर हुनचो टोंड संगे रउन जोन बले बलतोर आय तुमके सिखायंदे। 16 हुन तुचो बाटले लोगमन ले गोटेयादे, हुन तुचो टोंड आउर तुय हुनचो काजे महापरभु असन होसे। 17 तुय ए बड़गा के धरुन जा, आउर एचई ले अचरित चीनामन दखाव।”मोसा, मिसर देस् ने बोहड़तोर
18 मोसा आपलो सतरा जितरू लगे एउन बललो, मोके बिदा देस! मय मिसर देस् ने रतो मोचो भाईमन लगे जाउन दखेंदे, हुनमन एबतले जीव आसोत कि नाई। हुनचो सतरा जितरू बललो, अस्तिर ने जा। 19 जहोवा, मोसा के मिदयान देस् ने बललो, मिसर देस् ने बोहड़ुन जा: तुचो जीव धरुक बिचारलो लोगमन सबु मोरुन गेला। 20 तेबे मोसा आपलो बायले के आउर आपलो बेटामन के गदाहा ने बसाउन महापरभु चो बड़गा धरुन मिसर देस् ने बोहड़ुन ईलो। 21 जहोवा, मोसा के बललो, “जिदलदांय तुय मिसर देस् अमरसे, तेबे तुके सूरता रओ कि जोन अचरित बुतामन मय तुचो हक ने करलेंसे हुन सपाय के फिरोन के दखाव। मानतर मय, हुनचो मन के कटुर करेंदे कि हुन मोचो रयत के जाउक नी देयदे। 22 तुय फिरोन के बल, ‘जहोवा असन बलेसे, इसराएल मोचो पईलात बेटा आय’। 23 मय तुके सांगेंसे, ‘मोचो बेटा के मोचो सेवा करतो काजे जाउक देस’, आउर तुय हुनके जाउक नी दिलीस जाले, मय तुचो पईलात बेटा चो जीव धरेंदे।” 24 जातो बाटे गोटोक आसरम ने राती बेरा जहोवा, मोसा के मोरते मारतो काजे होलो। 25 तेबे सिपोरा गोटोक लागन बिती पकना ले आपलो बेटा चो खतना करुन टेपा के मोसा चो पांय लगे असन बलुन छिंयाली, “सते, तुय मोचो लोउ-दुला आस। तेबे जहोवा हुनके छांडुन दिलो।” 26 तेबे सिपोरा बलली, “तुय मोचो लोउ बाटले मिरलो मनुक आस।”
27 जहोवा, हारून के बललो, “तुय मोसा के भेटतो काजे टंग-टंगा भाटा ने जा।” हुन महापरभु चो डोंगरी ने जाउन मोसा के भेटुन चूमलो। 28 तेबे मोसा, हारून के सांगलो, जहोवा काय-काय गोटमन सांगुन हुनके पठालोसे आउर काय-काय चीनामन दखातो हुकुम दिलोसे। 29 तेबे मोसा आउर हारून जाउन इसराएली धरम-सियानमन के रूंडाला। 30 जहोवा मोसा के सांगलो सपाय गोटमन के हारून, लोगमन के सांगलो आउर मोसा, हुनमन चो पुरे चीनामन बले दखालो। 31 तेबे लोगमन पतेयाला: आउर जेबे इसराएलिमन सुनला कि जहोवा हुनमन के सूरता करलोसे आउर हुनमन चो दुख-डंड के दखेसे, तेबे हुनमन जहोवा के पांय पड़ला।