मिसर देस् ने इसराएलिमन चो दुख-डंड
5
एचो पाछे मोसा आउर हारून, फिरोन लगे जाउन बलला, “इसराएल चो महापरभु जहोवा असन बलेसे, ‘मोचो रयत के जाउक देस कि हुनमन टंग-टंगा भाटा ने मोचो काजे तिहार मानोत’।” 2 फिरोन बललो, “जहोवा कोन आय गुने मय हुनचो गोट मानुन इसराएलिमन के जाउक देयंदे? मय जहोवा के नी जाने, आउर इसराएलिमन के जाउक नी देयें।” 3 हुनमन बलला, “इबरीमन चो महापरभु आमके भेटुन बललोसे: एईकाजे आमके तीन दिन चो बाट हिंडुन टंग-टंगा भाटा ने जाउक देस कि आमके महापरभु जहोवा काजे जतरा चेगाउक होओ। असन नी होओ, हुन आमचो उपरे मरी ढकाओ नोहले आमके खांडा ले मोराओ।” 4 मानतर मिसर चो राजा बललो, “ए मोसा आउर हारून, तुमी काय काजे लोगमन के बुता करुक नी देयसास? तुमी जाहा, हुनमन के आपलाहान बुतामन करुक दियास!” 5 फिरोन फेर बललो, “एदांय ए देस् ने हुनमन खुबे जन होलासोत, आउर तुमी हुनमन के बुता कराउक मन नी करसाहास।” 6 हुनी दिने फिरोन, इसराएली कमेयामन चो मुनसीमन के आउर हुनमन चो मेटमन के हुकुम दिलो, 7 “तुमी लोगमन के ईटा बनातो काजे एबतले खड़ देते रलास, मानतर एदांय नी दिया, हुनमन खुदे जाउन खड़ रुंडाओत 8 आउर जितरो ईटा हुनमन रोजे बनाते रओत, हुतलेई एबे बले बनाओत। हुताले खिंडिक बले उना नी होओ। कसनबलले हुनमन ठगरामन आत, एईकाजे हुनमन ‘आमके महापरभु काजे जतरा चेगाउक जाउक देस’ बलसोत। 9 हुनमन के आउर खुबे मसागत कराहा, तेबे हुनमन बुता ची करते रदे आउर फोकाहा गोटमन ने धियान नी देदे।”10 तेबे मुनसीमन आउर मेटमन, लोगमन के बलला, “फिरोन* असन बलेसे, ‘एदांय मय तुमके खड़ नी देयें। 11 तुमी जाउन कहांय ले बले खड़ डगराउन आनुन बुता करा। मानतर तुम चो बनातो ईटा खिंडिक बले उना नी होतोर आय’।” 12 तेबे लोगमन मिसर देस् ने गुलाय बाटे खड़ चो पलटा सड़ई डगराउक गेला। 13 मुनसीमन लोगमन के झटके बुता करतो काजे दागा देउन बलला, “जसन आगे खड़ मिरतोदांय ईटा बनाते रलास एबे बले रोजे उतलेई ईटा बनाहा।” 14 फिरोन चो मुनसीमन, इसराएली कमेयामन चो मेटमन के मारा-पेटा करला आउर पूछला, “काय काजे तुमी आजी-काली रोजे चो इतलो, ईटा नी बनायसाहास?”
15 तेबे इसराएली मेटमन, फिरोन के गुहारुन बलला, “तुय आपलो कमेयामन संगे असन बेबार काय काजे करसीस? 16 तुचो कमेयामन के खड़ नी देओत आउर आमके बलसोत ‘उतलेई ईटा बनाहा!’ आउर आमके मारला बले। मानतर आमचो काई दोस नी आय।” 17 फिरोन बललो, “तुमी ठगरामन आहास: एईकाजे बलसास, ‘जहोवा के जतरा चेगातो काजे आमके जाउक देस’। 18 जाहा, मसागत करा। तुमके खड़ नी मिरे, मानतर उतलेई ईटा बनाउक ची पड़ेदे।” 19 जेबे इसराएली मेटमन असन सुनला, “ईटा चो गनती ने उना नी होतोर आय।” तेबे जानला कि आमचो उपरे बिपती चो दिन ईलीसे। 20 हुनमन फिरोन चो पुरे ले बाहरे निकरतोदांय, मोसा आउर हारून के भेटला जोनमन हुनमन के दुआरे टाकुन रओत। 21 हुनमन मोसा आउर हारून के बलला, “जहोवा आमचो हाल के दखुन तुमचो नियाव करो। तुमी फिरोन आउर हुनचो राजपालमन चो नंजर ने आमके हिनस्ता करालासाहास आउर हुनमन चो हाथे खांडा दिलास आउर आमके मोरते-मारतो असन बनालासाहास।”
मोसा, जहोवा के गुहारतोर