जहोवा, इसराएलिमन के छंडातो बायदा करतोर
6
तेबे जहोवा मोसा के बललो, “एदांय तुय दखसे मय, फिरोन संगे काय बेबार करेंदे, हुन मोचो सकत के दखुन इसराएलिमन के निकराउन देयदे, आउर हुनमन के बेरपेला आपलो देस् ले जाहा बलेदे।” 2 महापरभु, मोसा के फेर बललो, “मय जहोवा आंय: 3 मय अबराहम, इसहाक आउर जाकूब के सबुले सकत महापरभु होउन दरसन देते रले। मानतर मय, हुनमन के केबई ‘जहोवा’† चो नाव ले दरसन नी देउन रले। 4 कनान देस् ने हुनमन परदेसिया होउन रते रला, हुन देस् के देतो बायदा मय हुनमन ले करलेसे। 5 जोन इसराएलिमन के मिसरीमन, कमेया-बुता करायसोत, हुनमन चो करलानी के दखुन मय आपलो बायदा के सूरता करले। 6 एईकाजे तुय इसराएलिमन के सांग, ‘मय जहोवा आंय, मय तुमके मिसरीमन चो कमेया बुता ले छंडायंदे। मय आपलो सकत हाथ ले मिसरीमन के खुबे डंड देउन तुमके बचायंदे। 7 मय तुमके आपलो निज लोग मानेंदे, आउर मय तुमचो महापरभु होयंदे। तेबे तुमी जानासे कि मय तुमचो महापरभु जहोवा आंय, जोन तुमके मिसरीमन चो कमेया-बुता ले निकराउन आनले। 8 आउर जोन देस् के देतो काजे मय अबराहम, इसहाक आउर जाकूब ले बचन दिले हुनी देस् के मय तुमचो हक ने करुन देयंदे। मय जहोवा आंय’।” 9 मोसा ए गोटमन के इसराएलिमन के सांगलो: मानतर हुनमन आपलो मन चो डाहाल-बिकाल आउर दया नोहलो कमेया-बुता करुन-करुन मुरुसनाय होलो किरता हुनचो गोट के नी पतेयाला।10 तेबे फेर जहोवा, मोसा के बललो, 11 “तुय जाउन मिसर चो राजा फिरोन के बल, ‘तुय इसराएलिमन के मिसर देस् ले जाउक देस’।” 12 मानतर मोसा, जहोवा के बललो: “दख, इसराएलिमन मोचो गोट के नी पतेयाला, तेबे फेर फिरोन मोचो असन धीरे गोटेयातो चो गोट के कसन ने सुनेदे?” 13 तेबे जहोवा, मोसा आउर हारून के इसराएलिमन आउर मिसर चो राजा फिरोन चो बारे ने सांगलो आउर इसराएलिमन के मिसर देस् ले निकराउन नेतो हुकुम दिलो।
मोसा आउर हारून चो थर
14 मोसा आउर हारून चो पुरखामन चो कुटुम-मुखियामन एमन आत: इसराएल चो पईलात बेटा रूबेन चो बेटामन : हनोक, पललू, हेसरोन आउर करमी; एईमन ले रूबेन चो थर निकरली। 15 सिमोन चो बेटामन: जमूएल, जामीन, ओहद, जाकीन आउर सोहर। हुनचो गोटोक कनानी बायले ले जनमलो बेटा साऊल: एमन ले सिमोन चो थर निकरली। 16 लेवी चो बेटामन चो नाव हुनमन चो थर हिसाब ले एमन आत: गेरसोन, कहात आउर मरारी, आउर लेवी छय कोड़ी सतरा बरक जीवलो। 17 गेरसोन चो बेटामन: लिबनी आउर सिमी ले हुनचो थर निकरली। 18 कहात चो बेटामन: अमराम, इसहार, हेबरोन आउर उजीएल रला। कहात, छय कोड़ी तेरा बरक जीवलो। 19 मरारी चो बेटामन: महली आउर मुसी रला। एमन सपाय ले लेवी चो थर निकरली। 20 अमराम आपलो आता जोकेबेद के बिया होलो; हुनमन ले हारून आउर मोसा जनमला। अमराम छय कोड़ी सतरा बरक जीवलो। 21 इसहार चो बेटामन: कोरह, नेपेग आउर जिकरी रला। 22 उजीएल चो बेटामन : मिसाएल, एलसापन आउर सितरी रला। 23 हारून, अमीनादाब चो बेटी आउर नहसोन चो बईन एलीसेबा के बिया होलो; हुनमन चो बेटामन : नादाब, अबीहू, एलीआजर आउर ईतामार रला। 24 कोरह चो बेटामन : अस्सीर, एलकाना आउर अबीआसाप रला। एईमन ले कोरह चो थर निकरली। 25 हारून चो बेटा एलीआजर, पूतीएल चो बेटी के बिया होलो। हुनमन ले पीनहास जनमलो। लेवी थर चो कुटुम-मुखियामन एमन रला।
26 एई हारून आउर मोसा के जहोवा हुकुम दिलो, “इसराएलिमन के मिसर देस् ले गोहड़ी-गोहड़ी करुन निकराउन आना।” 27 एई मोसा आउर हारून, मिसर देस् चो राजा फिरोन के बलला, आमी इसराएलिमन के मिसर देस् ले निकराउन नेउंदे।
मोसा के महापरभु चो हुकुम