मोसा आउर हारून के महापरभु चो हुकुम
7
जहोवा, मोसा के बललो, “मय तुके फिरोन काजे महापरभु असन बनायंदे आउर तुचो भाई हारून तुचो अगमजानी होयदे। 2 जोन-जोन हुकुम मय तुके सांगेदे, हुन सपाय के तुचो भाई हारून, फिरोन के बलो कि हुन इसराएलिमन के आपलो देस् ले जाउक देओ। 3 मानतर मय, फिरोन चो मन के कटुर करेंदे, आउर मिसर देस् ने मय खुबे चीनामन आउर अचरित बुतामन दखायंदे। 4 फेर बले फिरोन, तुमचो गोट नी मानेदे, तेबे मय मिसर देस् ने आपलो सकत हाथ लमाउन मिसरीमन के खुबे डंड देयंदे आउर मोचो इसराएली लोगमन के गोहड़ी-गोहड़ी करुन मिसर देस् ले निकरायंदे। 5 जेबे मय आपलो सकत हाथ लमाउन मिसरीमन के डंड देउन इसराएलिमन के हुनमन चो मंजिगता ले निकरायंदे, तेबे हुनमन जानदे कि मय जहोवा आंय।” 6 तेबे मोसा आउर हारून, जहोवा चो हुकुम असन ची करला। 7 फिरोन संगे गोटेयातो बेरा मोसा चार कोड़ी बरक चो रलो आउर हारून चार कोड़ी तीन बरक चो रलो।बड़गा, साप बनतोर
8 जहोवा, मोसा आउर हारून के असन बललो, 9 “जिदलदांय फिरोन तुमके बलेदे, ‘तुमचो बाटले काई अचरित चीना दखाहा’। तेबे तुय हारून के बल, ‘राजा चो पुरे आपलो बड़गा के पकाव, तेबे हुन बड़गा बोड़ा साप बनेदे’।” 10 मोसा आउर हारून, फिरोन लगे जाउन जहोवा दिलो हुकुम हिसाब ले करला; आउर हारून आपलो बड़गा के फिरोन आउर राजपालमन चो पुरे पकालो, तेबे बड़गा बोड़ा साप बनली। 11 तेबे फिरोन, मिसर चो पंडितमन आउर जादु-टोना करुमन के हागदिलो आउर हुनमन बले आपलाहान जादू-मंतर ले उसनेची करला। 12 हुनमन बले आपलाहान बड़गामन के पकाला आउर हुन बड़गामन बोड़ा साप बनली। मानतर हारून चो बड़गा ले बनलो साप हुनमन चो बड़गा ले बनलो सापमन के गिरली। 13 तेबले बले फिरोन चो मन आउर कटुर होली आउर हुन, जहोवा चो बचन असन मोसा आउर हारून चो गोट नी मानलो।
पईल बिपती : पानी, लोउ उलटतोर
14 तेबे जहोवा, मोसा के बललो, “फिरोन आपलो मन कटुर करलोसे, हुन इसराएलिमन के जाउक नी देये। 15 एईकाजे तुय साप बनलो बड़गा के धरुन बियाने नील नंदी रेटे फिरोन के भेटतो काजे बाट दखते रा, हुन बाहरे पानी बाटे एयदे। 16 तुय हुनके असन बल, ‘इबरीमन चो जहोवा महापरभु, तुके असन सांगतो काजे मोके पठालोसे, “तुय मोचो रयत के टंग-टंगा भाटा ने मोचो डंडासरन करतो काजे जाउक देस।” मानतर तुय एबतले मोचो गोट नी मानलीस। 17 जहोवा असन बलेसे, “एदांय तुय जानसे, मय ची जहोवा महापरभु आंय।” दख! मय आपलो हाथ चो बड़गा ले नील नंदी चो पानी के मारेंदे आउर पानी, लोउ उलटेदे। 18 नील नंदी चो जमाय मछरीमन मोरुन जादे आउर पानी गंदेदे आउर मिसरीमन नंदी चो पानी खाउक नी सकदे’।” 19 जहोवा फेर मोसा के बललो, “हारून के बल, ‘आपलो बड़गा के धरुन मिसर देस् ने जोन-जोन थाने पानी आसे, बललोने, नंदीमन, झोड़ीमन, तरईमन, पजरामन आउर सबु पानी रलो ठानमन ने आपलो हाथ लमाव कि सपाय पानी लोउ उलटो। तेबे गुलाय मिसर देस् चो सपाय नकी-भंडवामन चो पानी बले लोउ उलटेदे’।”
20 मोसा आउर हारून, जहोवा चो हुकुम असन करला। तेबे हारुन, फिरोन आउर हुनचो राजपालमन दखते-दखते नील नंदी चो पानी ने बड़गा ले मारलो आउर नंदी चो सपाय पानी लोउ उलटली। 21 नील नंदी चो सपाय मछरीमन मोरला आउर पानी गंदुक मुरियाली, जेचोले मिसरीमन हुता चो पानी के पीउक नी सकला। गुलाय मिसर देस् चो पानी लोउ उलटली। 22 मिसर चो जादु-टोना दखाउमन बले आपलो जादु-मंतर ले असनेचे करला। तेबे फिरोन चो मन कटुर होली, आउर जहोवा चो सांगलो असन हुन मोसा आउर हारून चो गोट नी मानलो। 23 फिरोन एके बले मुरे नी पतेयालो आउर बोहड़ुन आपलो माहाल ने जाते गेलो। 24 सपाय मिसरीमन पियास होलो किरता नील नंदी चो रेटे-रेटे पानी चो डगर ने खोड़ुक मुरियाला, कसनबलले नंदी चो पानी पीवतो लाईक नी रली।
25 जहोवा नील नंदी चो पानी के लोउ उलटाउन सात दिन होउन रये।