दुसर बिपती : मेंडकामन
8
जहोवा मोसा के फेर बललो, “फिरोन के जाउन बल, ‘जहोवा बलेसे मोचो आराधना करतो काजे मोचो लोगमन के जाउक देस। 2 मानतर तुय हुनमन के जाउक नी दिलीस जाले, तुचो सपाय देस् ने मय मेंडकामन चो बिपती पठायंदे। 3 नील नंदी, मेंडकामन ले भोरुन जायदे, आउर हुन मेंडकामन तुचो घरे, तुचो सोवतो बाकरा ने, तुचो ओचना ने, तुचो राजपालमन चो घरे, तुचो सपाय रयत उपरे, तुचो रांदतो थाने आउर थारी-बटकी ने बले एदे। 4 हुन मेंडकामन तुचो उपरे, तुचो रयत उपरे आउर तुचो राजपालमन उपरे चेगदे’।” 5 जहोवा, मोसा के हुकुम दिलो, “हारून के बल : ‘आपलो हाथ लमाउन नंदीमन, बाहारमन, आउर झोड़ीमन ने बड़गा ले मारुन मेंडकामन के मिसर देस् ने आनो’।” 6 तेबे हारून, मिसर चो सपाय पानी ठानमन ने आपलो हाथ लमालो आउर मिसर देस् चो सपाय ठाने मेंडकामन ढाकी होला। 7 जादु-टोना बीतामन बले आपलो जादू-मंतर ले मिसर देस् ने मेंडकामन आनला।8 तेबे फिरोन, मोसा आउर हारून के हागदेउन बललो, “जहोवा के गुहारा कि मोचो ले आउर मोचो रयत ले मेंडकामन के गुचाओ; आउर मय इसराएलिमन के जहोवा काजे जतरा चेगातो काजे जाउक देयंदे।” 9 मोसा, फिरोन के बललो, “मेंडकामन के तुचो घर ले, राजपालमन ले, आउर तुचो रयतमन ले गुचाउन सोजे नील नंदी ने रतो काजे मय केबे जहोवा ले गुहारुआंय, तुय मोके सांग।” 10 फिरोन बललो, “काली के।” तेबे मोसा बललो, “तुचो गोट असन होओ: जेचोले तुय जानसे आमचो महापरभु जहोवा चो कटार कोनी नी आत। 11 मेंडकामन तुचो लगे ले आउर तुचो घर ले, तुचो राजपालमन ले आउर तुचो रयत ले लापी जाउन सोजे नील नंदी ने ची रदे।” 12 मोसा आउर हारून, फिरोन लग ले गेला: आउर मिसर देस् ने पठालो मेंडकामन के गुचातो काजे मोसा, महापरभु के गुहारलो। 13 मोसा चो गुहारलो असन जहोवा करलो। तेबे मेंडकामन घरमन ने, दुआरे आउर भाटा-टिकरामन ने मोरुन गेला। 14 लोगमन मेंडकामन के रूंडाउन कुड़ा करला आउर सपाय देस् मोरलो मेंडकामन चो गंद ले भोरुन रली। 15 मानतर जेबे मेंडकामन चो बिपती गुचली, तेबे जहोवा चो सांगलो गोट असन फिरोन आपलो मन के फेर कटुर करलो; आउर हुन, मोसा आउर हारून चो गोट के नी सुनलो।
तीसर बिपती : आंदु-मोचीमन
16 जहोवा, मोसा के बललो, “हारून के हुकुम देस, ‘सपाय मिसर देस् ने आंदु-मोची होतो काजे आपलो बड़गा ले धुरला के मारो’।” 17 हुन उसनेची करलो; हारून बड़गा ले भुंय चो धुरला के मारलो, तेबे मनुकमन उपरे आउर पसु-जनावरमन उपरे बललोने, सपाय मिसर देस् ने धुरला, आंदु-मोची उलटली। 18 तेबे जादु-टोना बितामन बले आपलो जादु चो सकत ले आंदु-मोची आनतो मन करला। मानतर उसन करुक नी सकला। असन बरन ले मनुकमन उपरे आउर जनावरमन उपरे आंदु-मोचीमन झूमी होउ रला। 19 तेबे जादु-टोना बितामन फिरोन के बलला, “ए तो महापरभु बाटले करलोर आय!” तेबले बले जहोवा चो गोट असन फिरोन चो मन कटुर ची रये आउर हुन मोसा आउर हारून चो गोट के मुरे नी मानलो।
चवथा बिपती : कोंगड़ीमन
20 जहोवा, मोसा के फेर बललो, “बियाने फिरोन पानी बाटे एयदे, तुय उठुन हुन बाटे जा, आउर हुनके बल, ‘जहोवा तुके असन बलेसे, मोचो आराधना करतो काजे मोचो रयत के जाउक देस। 21 दख, तुय मोचो रयत के जाउक नी दिलोने, मय तुचो उपरे, तुचो राजपालमन उपरे आउर तुचो रयत उपरे आउर मिसरीमन चो घरमन ने आउर हुनमन चो भुंय-बाड़ी ने बले कोंगड़ीमन ढाकी होदे। 22 मय, मोचो रयत रतो गोसेन राज के अलगे करेंदे। हुन थाने कोंगड़ीमन नी होदे, तेबे तुय जानसे कि मंजपुर ने मय ची जहोवा आंय। 23 मय, मोचो रयत आउर तुचो रयत ने फरक करेंदे। ए अचरित बुता मय तुके काली के दखायंदे’।” 24 दुसर दिने जहोवा उसनेची करलो; फिरोन चो माहाल ने, हुनचो राजपालमन चो घरे बले, आउर गुलाय मिसर देस् ने कोंगड़ीमन ढाकी होला: कोंगड़ीमन किरता मिसर देस् नास होली।
25 तेबे फिरोन, मोसा आउर हारून के हागदेउन बललो, “तुमी जाउन एई देस् ने तुमचो महापरभु काजे जतरा चेगाहा।” 26 मोसा बललो, “आमी आमचो महापरभु जहोवा काजे मिसरीमन घिनियातो जनावरमन के जतरा चेगातोर नंगत नोआय। हुनमन दखते-दखते घिनियातो जनावरमन के आमी, जतरा चेगालोने, काय, मिसरीमन आमके पकना पकाउन मोरते नी मारदे? 27 आमी टंग-टंगा भाटा ने तीन दिन चो बाटे जाउन आमचो महापरभु जहोवा काजे जसन हुन बलेदे, उसनेची जतरा चेगाउंदे।” 28 फिरोन बललो, “मय तुमके टंग-टंगा भाटा ने जाउक देयंदे। मानतर तुमी खुबे लापी नी जाहा। तुमी तुमचो महापरभु-जहोवा काजे जतरा चेगाहा आउर मोचो काजे बले गुहार करा।” 29 मोसा बललो, “दख, मय तुचो पुरे ले जाउन जहोवा के गुहारेंदे, आउर कोंगड़ीमन तुमचो माहाल ले, तुचो राजपालमन चो घरमन ले आउर तुचो लोगमन ले काली के गुचदे: मानतर जहोवा के जतरा चेगातो काजे फिरोन कपट करुन आमके आउर नी ठेबाओ।” 30 तेबे मोसा, फिरोन लग ले जाउन जहोवा के गुहारलो। 31 जहोवा मोसा करलो बिनती असन फिरोन ले, हुनचो राजपालमन ले, आउर हुनचो रयत ले सपाय कोंगड़ीमन के गुचालो, आउर हुता गोटोक बले कोंगड़ी नी बाचला। 32 मानतर ए हार बले फिरोन आपलो मन के कटुर करलो आउर हुन लोगमन के जाउक नी दिलो।