पांचवां बिपती : जनावरमन चो मरी
9
जहोवा, मोसा के फेर बललो, “फिरोन लगे जाउन बल, ‘इबरीमन चो महापरभु जहोवा तुके असन बलेसे, तुय मोचो रयत के मोचो आराधना करतो काजे जाउक देस। 2 तुय हुनमन के जाउक नी दिले, आउर बांदेया ची बनाउन रलीस जाले, 3 तुचो घोड़ामन, गदाहामन, ऊंटमन, गाय-बयलामन, छेरी-मेंडीमन आउर दुसर जनावरमन जोनमन भाटा ने आसोत, हुनमन उपरे जहोवा बाटले मरी एयदे। 4 मानतर जहोवा, इसराएलिमन चो जनावरमन के मिसरीमन चो जनावरमन ले फरक करेदे आउर इसराएलिमन चो गोटोक बले जनावर नी मोरदे’।” 5 फेर जहोवा ए चीना के काली के ए देस् ने करेदे बललो। 6 दुसर दिने जहोवा उसनेची करलो, आउर मिसरीमन चो सपाय जनावरमन मोरला, मानतर इसराएलिमन चो गोटोक बले जनावर नी मोरला। 7 फिरोन आपलो लोगमन के इसराएलिमन लगे ए जानतो काजे लोग पठालो कि इसराएलिमन चो गोटोक बले जनावर मोरला कि नाई। मानतर इसराएलिमन चो गोटोक बले जनावर नी मोरला। फेर बले फिरोन चो मन कटुर होली, आउर हुनमन के जाउक नी दिलो।छटवां बिपती : खसु-खाड़ा
8 जहोवा, मोसा आउर हारून के बललो, “तुमी दुनो आईग-भाटी ले गोटोक-गोटोक मुटा लाकड़ी के धरा आउर मोसा हुनके फिरोन चो पुरे बादरी ने उड़ाओ। 9 तेबे हुन लाकड़ी धुरला होयदे आउर गुलाय मिसर देस् ने बिगरेदे। एचोले सपाय लोगमन आउर पोसतो जनावरमन ने बले खसु-खाड़ा निकरेदे।” 10 जेबे हुनमन भाटी थानो लाकड़ी के धरुन फिरोन चो पुरे उबा होला आउर मोसा लाकड़ी के बादरी ने उड़ालो, तेबे सपाय लोगमन आउर पोसतो जनावरमन ने खसु-खाड़ा निकरली। 11 खसु-खाड़ा किरता मिसर देस् चो जादु-टोना दखाउमन मोसा चो पुरे उबुक नी सकला; कसनबलले सपाय मिसरीमन आउर जादु बितामन उपरे खसु-खाड़ा होउ रये। 12 जहोवा, फिरोन चो मन के कटुर करलो, आउर जसन मोसा के जहोवा बलु रये उसनेची फिरोन मोसा चो गोट के नी मानलो।
सातवां बिपती : करा पकना
13 फेर जहोवा मोसा के बललो, “बियाने उठ, आउर फिरोन लगे जाउन बल, ‘इबरीमन चो महापरभु असन बलेसे, मोचो लोगमन के, मोचो आराधना करतो काजे जाउक देस। 14 नोहले एदांय मय तुचो उपरे तुचो राजपालमन उपरे आउर तुचो रयत उपरे सपाय बरन चो बिपती आनेंदे, जेचोले तुय जानसे कि गुलाय मंजपुर ने मोचो कटार आउर कोनी नी आत। 15 एबतले तो मय तुके आउर तुचो लोगमन के मरी ले मोराउन रते; आउर मंजपुर ले तुचो सत्यानास होउन रती। 16 मानतर गुलाय मंजपुर चो लोग मोचो नाव जानतो काजे आउर तुके मोचो सकत दखातो काजे एबतले मय तुके जीवत संगालेसे। 17 काय, तुय एबे बले मोचो रयत चो पुरे आपने के बड़े समजसीस आउर हुनमन के जाउक नी देयीस? 18 दख, काली के इदलीदांय मय बादरी ले खुबे बड़े बड़े करा पकनामन घसरायंदे, जेचो असन मिसर देस् बसलोदांय ले धरुन एबतले नी घसरलीसे। 19 एईकाजे लोगमन के पठाव कि भाटा ने रतो तुचो पोसतो जनावरमन आउर हुता रतो तुचो तीजमन के झटके आड़े आनोत, नोहले जितरो बले लोग आउर जनावरमन भाटा ने रदे, हुनमन उपरे करा पकनामन घसरेदे आउर हुनमन मोरुन जादे’।” 20 तेबे फिरोन चो राजपालमन ले जितलो लोगमन जहोवा चो बचन के मानते रला, हुनमन जनावरमन के आउर कमेयामन के घरे आनला। 21 मानतर जितलो लोग जहोवा चो गोट के नी पतेयाला हुनमन आपलो-आपलो कमेयामन के आउर जनावरमन के भाटा ने ची छांडला।
22 जहोवा, मोसा के बललो, “मिसर देस् चो लोगमन, पोसतो जनावरमन, आउर बेड़ा-खाड़ा चो सपाय उबजमन उपरे, करा पकनामन घसरतो काजे आपलो हाथ के बादरी बाटे उठाव।” 23 तेबे मोसा आपलो बड़गा के बादरी बाटे उठालो आउर जहोवा चो सकत ले बादरी चड़लली, करा-पकनामन घसरली आउर सपाय बाटे बीच पड़ली। असन बरन ले जहोवा, सपाय मिसर देस् ने करा पकनामन घसरालो। 24 करा पकनामन संगे बीच सरलगा घसरते रली, हुन करा पकनामन सहतो लाईक नी रली, मिसर देस् बसलोदांय ले केबई असन करा पकनामन नी घसरुन रली। 25 एईकाजे मिसर देस् चो भाटा ने रलो सपाय लोगमन, पोसतो जनावरमन करा पकनामन ले मोरला; बेड़ा-खाड़ा चो सपाय उबज नास होली आउर भाटा चो सपाय रूकमन बले टुटुन घसरला। 26 मानतर इसराएलिमन रतो गोसेन परघन ने ची करा पकनामन नी घसरली।
27 तेबे फिरोन, मोसा आउर हारून के हागदेउन बललो, “एदांय मय पाप करलेंसे, जहोवा धरमी आय, मानतर मय आउर मोचो रयत ओधरमी आंव। 28 एदांय जहोवा के गुहार करा, हुन बादरी चड़लातोके आउर करा पकनामन घसरातोके ठेबाओ। तेबे मय तुमके जाउक देयंदे।” 29 मोसा हुनके बललो, “ए सहर ले बाहरे निकरते खन मय, जहोवा बाटे आपलो हाथ के उठायंदे; तेबे बादरी नी चड़लेदे आउर करा पकनामन बले नी घसरेदे। जेचोले तुय जानसे, मंजपुर जहोवा चेई आय। 30 मानतर मय जानेंसे, तुय आउर तुचो राजपालमन फेर बले महापरभु जहोवा के नी डरास।” 31 जोंदरी काटतो बतर रये आउर कोदा-कोसरामन ने फूल निकरते रये, सपाय करा पकनामन ले नास होली। 32 मानतर गउं आउर मंडिया नी बाड़ुन रये एईकाजे नास नी होली। 33 जिदलदांय मोसा फिरोन लगे ले सहर चो बाहरे निकरुन जहोवा बाटे आपलो हाथ उठालो, तेबे बादरी चड़लतोर आउर करा पकनामन घसरतोर ठेबली, आउर पानी बले नी घसरली। 34 जिदलदांय बादरी चड़लतोर आउर करा पकनामन घसरतोर ठेबली, तेबे फिरोन आपलो राजपालमन संगे फेर आपलो मन के कटुर करुन पाप करलो। 35 असन बरन ले फिरोन चो मन कटुर होते गेली आउर जहोवा, मोसा के सांगलो असन फिरोन इसराएलिमन के जाउक नी दिलो।