आठवां बिपती : थापामन
10
जहोवा, मोसा के फेर बललो, “तुय फिरोन लगे जा, कसनबलले मय हुनके आउर हुनचो राजपालमन के अचरित बुता दखातो काजे हुनमन चो मन के कटुर करलेसे। 2 तुमी आपलो बेटा-बेटीमन आउर नाती-पुतीमन के ए गोटमन सांगा, जहोवा कसन बरन ले मिसरीमन चो हांसी-खेली करलो आउर हुनमन चो मंजारे अचरित बुतामन दखालो। तेबे तुमी जानासे, मय जहोवा आंय।”3 तेबे मोसा आउर हारून, फिरोन लगे जाउन बलला, “इबरीमन चो महापरभु जहोवा तुके असन बलेसे, ‘केबतले तुय मोचो लोगमन पुरे आपने के बड़े बनासे? मोचो लोगमन के मोचो आराधना करुक जाउक देस। 4 तुय मोचो रयत के जाउक नी दिलीस जाले, दख, काली के मय तुचो देस् ने पाटकी बिती थापामन के आनेंदे। 5 हुनमन ढाकी होदे कि भुंय नी दखा देये। करा पकना चो बिपती ले बाचलो सपाय लाटा-बुटामन के हुनमन खादे, आउर तुमचो बाड़ी-खिड़ी ने बाड़तो सपाय रूक-राईमन के बले खादे। 6 ए थापामन तुचो घरे, तुचो राजपालमन आउर सपाय मिसरीमन चो घरमन ने बले लिपी होदे; तुचो बाप-दादीमन आउर पुरखामन ए मंजपुर ने जनमलोदांय ले धरुन एबतले इतलो थापामन के केबई नी दखु रला’।” असन बोलुन मोसा फिरोन चो पुरे ले जाते गेलो।
7 तेबे राजपालमन, फिरोन के बलला, “केबतले हुन माने आमचो काजे फांदा होयदे? हुनमन के, हुनमन चो महापरभु जहोवा चो आराधना करतो काजे जाउक देस: काय, तुय नी जानीस सपाय मिसर देस् नास होली?” 8 तेबे फिरोन, मोसा आउर हारून के हागदेउन बललो, “तुमी आपलो महापरभु जहोवा चो आराधना करतो काजे जाहा: मानतर तुमीमन ले कोन-कोन जाहासे?” 9 मोसा बललो, “आमी तो नानी पिलामन ले धरुन डोकरा-डोकरीमन, आमचो बेटा-बेटीमन, छेरी-मेंडीमन, गाय-बयलामन संगे सपाय जाउंदे, कसनबलले जहोवा काजे आमके तिहार मानतोर आय।” 10 फिरोन हुनमन के बललो, “जहोवा तुमचो संगे रओ। मय तुमके तुमचो पिला-झीलामन संगे जाउक दिलोने, नंगत होती! मानतर तुमचो मन ने कपट आसे। 11 नाई, मय केबई जाउक नी देयें! जसन तुमी मन करते रलास, उसने तुमी सोजे मनुकमन ची जाउन जहोवा चो आराधना करा।” तेबे फिरोन चो पुरे ले हुनमन के बाहरे निकराला।
12 तेबे जहोवा, मोसा के बललो, “मिसर देस् उपरे आपलो हाथ लमाव कि मिसर देस् ने थापामन एउन करा पकनामन चो बिपती ले बाचलो सपाय धान-पान के खाउन नास करोत।” 13 मोसा आपलो बड़गा के मिसर देस् उपरे लमालो, आउर जहोवा बेर-उदिया बाटले रात-मंजन लेहरा बोहालो; बियान पावतोके हुनी लेहरा संगे थापामन ईला। 14 तेबे थापामन, गुलाय मिसर देस् ने डेरा धरला: हुनमन खुबे रला बललोने, आगे केबई इतरो थापामन गोटकी थाने नी एउन रला आउर एचो पाछे केबई इतरो नी एदे। 15 मिसर देस् चो सपाय बाटे थापामन इतरो ढाकी होला कि देस् ने अंधार पड़ली; आउर करा पकनामन चो बिपती ले बाचलो सपाय उबज के, रूक-राई चो सपाय पाक-फर के थापामन खादला: जेचोले गुलाय मिसर देस् चो रूकमन ने काई पाना आउर बेड़ा-खाड़ामन ने काई उबज बले नी बाचली। 16 तेबे फिरोन मोसा आउर हारून के झटके हागदेउन बललो, “मय, तुमचो महापरभु जहोवा आउर तुमचो बिरुद ने पाप करलेंसे। 17 एईकाजे एई हार मोचो पाप के खेमा करा, आउर आपलो महापरभु जहोवा ले गुहारा कि हुन, मोचो उपर ले ए मोरना चो बिपती के गुचाओ।” 18 तेबे मोसा, फिरोन लग ले जाउन जहोवा के गुहारलो। 19 तेबे जहोवा, बेर-बुड़ती बाटले खुबे बड़े भारी लेहरा-धुका बोहालो आउर सपाय थापामन के लाल समदूर ने बुड़ालो; मिसर देस् ने कोनी लगे गोटोक बले थापा नी बाचला। 20 मानतर जहोवा, फिरोन चो मन के कटुर करलो आउर हुन, इसराएलिमन के जाउक नी दिलो।
नवां बिपती : भींग-अंधार
21 जहोवा, मोसा के फेर बललो, “आपलो हाथ के बादरी बाटे उठाव कि मिसर देस् ने काईचे नी दखा देतो असन भींग-अंधार होओ।” 22 तेबे मोसा आपलो हाथ के बादरी बाटे उठालो आउर गुलाय मिसर देस् ने तीन दिनतले भींग-अंधार ढाकुन रये। 23 तीन दिन होओत ले हुनमन गोटोक दुसर के दखुक नी सकला आउर आपलो ठान ले नी उठला। मानतर सपाय इसराएलिमन चो घरमन ने उजर रली 24 तेबे फिरोन, मोसा के हागदेउन बललो, “तुमी जहोवा चो आराधना करतो काजे जाहा। तुमचो पिला-झीलामन के बले संगे निया, मानतर छेरी-मेंडी आउर गाय-बयलामन के नी निया।” 25 मोसा बललो, “तुय, आमके आपलो महापरभु काजे जतरा चेगातो काजे, आउर होम-जतरा काजे जनावरमन के देउक लागेदे। 26 एईकाजे जनावरमन के बले आमचो संगे नेउंदे। हुनमन चो गोटोक खुर के बले आमी नी छांडुं। कसनबलले आमी एमन ले बाछुन महापरभु जहोवा काजे जतरा चेगाउआंव आउर हुता अमरतले आमी नी जानु, महापरभु जहोवा चो आराधना करतो काजे काय-काय लागेदे।” 27 मानतर जहोवा फिरोन चो मन के कटुर करलो आउर हुन इसराएलिमन के जाउक नी दिलो। 28 फिरोन, मोसा के बललो, “मोचो पुरे ले निकरुन जा, चेत ने रा, एदांय ले तुचो थमना के मोके नी दखाव; जोन दिने तुय मोके तुचो थमना दखासे, हुनी दिने तुय मोरुन जासे।” 29 मोसा बललो, “तुय सते बललीस, मय तुचो थमना के फेर केबई नी दखें।”