दसवां बिपती: पईलातमन चो मोरना
11
जहोवा फेर मोसा के बललो, “मय गोटोक आउर बिपती फिरोन आउर मिसर देस् उपरे आनेंदे। एचो पाछे फिरोन तुमके हुता ले जाउक देयदे। जेबे हुन, तुमके जाउक देयदे, तेबे मिसर देस् ले तुमी सपाय के बेरपेला निकराउन देयदे ची। 2 मोचो रयत के ए सांगुन देस कि सपाय मनुकमन आपलो घर-लग चो मनुकमन ले आउर सपाय बायलेमन आपलो घर-लग चो बायलेमन ले, सोन-रूप चो माला-मूंदी के मांगोत।” 3 जहोवा, मिसरीमन के इसराएलिमन उपरे खुबे दया करालो। मोसा, फिरोन चो राजपालमन आउर गुलाय मिसर देस् चो लोगमन चो नंजर ने खुबे माहान रलो।4 फेर मोसा बललो, जहोवा असन बलेसे, “अधगर राती के मय मिसर देस् चो मंजार ले जायंदे, 5 तेबे मिसर चो राजगादी ने बसतो फिरोन ले धरुन जता ने अरन पीसतो कमेयीन चो पईलात बेटामन आउर पसुमन ले सपाय पईलात अंडरामन बले मोरुन जादे। 6 गुलाय मिसर देस् ने गाग-गगरीही होयदे, एचो असन आगे केबई नी होउन रये आउर केबई होयदे बले नाई। 7 मानतर इसराएली लोगमन चो बिरुद ने कोकई काई बलतो सकत नी होयदे बललोने, कुकुर बले नी भूकेदे; जेचोले तुमी जानासे, मय जहोवा, मिसरीमन आउर इसराएलिमन ने फरक करेंसे। 8 तेबे तुचो सपाय राजपालमन मोचो लगे एउन पांय पड़ुन बलदे, तुय आपलो सपाय लोगमन संगे निकरुन जा: हुनचो पाछे, मय निकरुन जायंदे।” असन बलुन मोसा खुबे रीस ले फिरोन चो पुरे ले निकरुन गेलो। 9 जहोवा, मोसा के बललो, “एईकाजे फिरोन तुमचो गोट के नी सुनेदे कि मय मिसर देस् ने खुबे अचरित बुतामन दखायंदे।”
10 मोसा आउर हारून, फिरोन चो पुरे ए सपाय अचरित बुतामन के दखाला। मानतर जहोवा, फिरोन चो मन के आउर खुबे कटुर करलो कि हुन इसराएलिमन के आपलो देस् ले जाउक नी दिलो।