फसह तिहार - मिसर देस् ले छंडावा
12
फेर जहोवा, मिसर देस् ने मोसा आउर हारून के बललो: 2 “ए मयना तुमचो काजे बरक चो मूर होओ बललोने, बरक चो पईल मयना होओ। 3 इसराएल चो सपाय मंडली के तुमी असन सांगा: ‘एई मयना चो दसवां दिने आपलो-आपलो कुटुम हिसाब ले, गोटोक-गोटोक घर काजे गोटोक-गोटोक मेंडा पिला के धरुन राहा। 4 आउर कोनी घरे मेंडा-पिला के खातो लोग कम पड़लोने, हुन आपलो घर-लग चो लोग चो गनती हिसाब ले सपाय खाउक सकतो असन गोटोक मेंडा-पिला धरुन रओ। 5 तुमचो मेंडा-पिला दोख नोहलो आउर गोटोक बरक चो होओ। हुन, मेंडा-पिला होओ नोहले छेरी-पिला होओ। 6 हुनके ए मयना चो चवदवां दिन अमरतले संगाउन राहा आउर हुनी दिने सांज होतो बेरा इसराएल चो मंडली चो सपाय लोग मेंडा-पिलामन के मारोत। 7 आउर जोन घर चो लोगमन हुनके खादे, हुता चो कपाट चो चवकट उपरे आउर दुनो पाटे हुनचो खिंडिक असन लोउ के लगाओत। 8 हुन मेंडा-पिला चो मास के हुनमन हुनीची राती, आईग ने बुंजुन पाग नोहलो रोटी आउर पीता बिती साग-भाजी संगे खाओत। 9 हुनचो मास के काचा नोहले पानी ने उसाउन नी खाहा, मानतर हुनचो मुंडी, पांय आउर ओंडकी-पोटी संगे आईग ने बुंजुन खाहा। 10 हुन थान ले खिंडिक बले बियान होओतले नी बाचो। काई बले बाचली जाले, हुनके आईग ने डसाउन दियास। 11 हुन खादी के, तुमी असन बरन ले खाहा: करांड बांधुन पांयमन ने पनई पींदुन आउर हाथे बड़गा धरुन झटके-झटके खाहा। हुन तुमचो जहोवा चो फसह तिहार आय। 12 कसनबलले हुन राती, मय मिसर देस् चो मंजार ले जायंदे आउर हुता चो सपाय पईलातमन के बललोने, पईलात बेटामन आउर पईलात पसुमन के मोरते मारेंदे। मय मिसर देस् चो सपाय देव-धामीमन के बले डंड देयंदे, मय जहोवा आंय। 13 आउर जोन घरमन ने तुमी राहासे हुनी थाने लगालो लोउ तुमचो काजे चीना होयदे। हुन लोउ के दखुन मय तुमके नाहकुन जायंदे आउर जेबे मय मिसर देस् उपरे मोरना आनेंदे, तेबे हुन बिपती तुमचो उपरे नी पड़ेदे आउर तुमी नास नी होआसे।14 ए दिन तुमचो काजे अमदेया सूरता करतो दिन होयदे आउर तुमी ए दिन ने जहोवा काजे तिहार माना। तुमचो पीड़ी-पीड़ी एई दिन ने, अमदेया काजे तिहार मानोत। ए तुमचो काजे गोटोक नीती-नियम होओ।
पाग नोहलोर रोटी
15 सात दिन होओतले पाग नोहलोर रोटी खाहा, पईल दिन ले ची आपलो-आपलो घर ले पाग के गुचाहा आउर जोन कोनी बले पईल दिन ले सात दिन होओतले पाग बिती रोटी खायदे हुनके इसराएली मंडली भात छांडोत। 16 तुमी पईल दिने आउर सातवां दिने पवितर मंडली बसाहा। ए दुनो दिने कोनी काई बुता नी करोत, सोजे आपलो खातो इतलो ची रांदतो बुता करतो हुकुम आय। 17 तुमी पाग नोहलो रोटी चो तिहार माना। कसनबलले मय, तुमके हुनी दिने मिसर देस् ले गोहड़ी-गोहड़ी करुन निकराउन आनलेसे। एईकाजे तुमचो पीड़ी-पीड़ी एई दिन ने, अमदेया काजे तिहार मानोत। ए तुमचो काजे गोटोक नीती-नियम होओ। 18 पईल मयना चो चवदा दिन चो सांज बेरा ले धरुन एक कोड़ी एक दिन* चो सांज होओतले तुमी पाग नोहलो रोटी खाहा। 19 सात दिनतले तुमचो घरमन ने खिंडिक बले पाग नी रओ आउर हुन देस् चो रयत नोहले परदेसिया कोनी बले पाग बिती रोटी खादले, हुनके इसराएली मंडली भात छांडोत। 20 काई बरन चो पाग बिती तीजमन के नी खाहा। सपाय आपलो-आपलो घरे पाग नोहलो रोटी ची खाहा’।”
पईल फसह तिहार
21 तेबे मोसा, इसराएल चो सपाय धरम-सियानमन के हागदेउन बललो, “तुमी आपलो-आपलो कुटुम हिसाब ले गोटोक-गोटोक मेंडा पिला के बाछुन संगाहा आउर हुनके फसह तिहार ने पुजा। 22 हुनचो लोउ के, बटका ने धरुन हुता जुफा-बुटा चोबड़ुन चवकट उपरे आउर दुनो पाट लगाहा। बियान पावतले कोनी बले आपलो घर ले बाहरे नी निकरा। 23 कसनबलले जहोवा, मिसर देस् मंजार ले मिसरीमन के मोरते मारते जायदे आउर जोन-जोन घर चो चवकट उपरे आउर दुनो पाट लोउ के दखेदे, हुन घरमन के छांडुन जायदे आउर मोरना के तुमचो घरे ओलुक नी देयदे। 24 तुमी ए फसह तिहार चो नियम के अमदेया काजे आपलो आउर आपलो पीड़ी-पीड़ी चो नीती-नियम समजुन माना। 25 जहोवा बायदा करलो देस् ने जेबे तुमी जाहासे, तेबे तुमी ए तिहार के माना। 26 आउर जेबे तुमचो पिलामन तुमके पूछदे, ‘ए तिहार के काय काजे मानतोर आय?’ 27 तेबे तुमी हुनमन के सांगा, ‘एई जहोवा काजे फसह तिहार चो जतरा* आय। कसनबलले जहोवा मिसरीमन के नास करतो बेरा, मिसर देस् ने रतो इसराएलिमन के बचालो’।” तेबे सपाय लोगमन महापरभु के डंडासरन करला।
28 जहोवा, जोन हुकुम मोसा आउर हारून के देउन रये, इसराएलिमन उसनेची करला।
मिसरीमन चो पईलातमन चो मोरना
29 फेर असन होली, जहोवा अधगर राती ने, मिसर देस् चो राज-गादी ने बसलो फिरोन ले धरुन जयल-घरे रलो कयदीमन चो, सपाय पईलात बेटामन के आउर सपाय पईलात पसुमन के मोरते मारलो। 30 तेबे फिरोन राती ची उठलो आउर हुनचो सपाय राजपालमन आउर मिसर देस् चो सपाय लोगमन राती ची उठला आउर मिसर देस् ने खुबे गाग-गगरीही होला। कसनबलले असन कोनी ची घर नी बाचली जोन थाने कोनी मोरुन नी रला। 31 तेबे फिरोन, मोसा आउर हारून के राती ची हागदेउन बललो, “तुमी सपाय इसराएलिमन संगे मोचो रयत चो मंजार ले निकरुन जाहा आउर तुमचो गोट असन जहोवा चो आराधना करा। 32 तुमचो गोट असन आपलो संगे छेरी-मेंडी आउर गाय-बयला के बले निया। मानतर मोके बर देउन जाहा।”
33 मिसरीमन बलला, “आमी सपाय सत्यानास होउंसे,” एईकाजे मिसरीमन, इसराएलिमन के आपलो देस् ले झटके निकरतो काजे बेरपेला करला। 34 तेबे इसराएलिमन, आपलो पाग नी होलोर चटकलो पिसान के परात संगे फटई ने बांधुन आपलो-आपलो खांदे बोउन गेला। 35 मोसा चो गोट हिसाब ले इसराएलिमन, मिसरीमन ले सोन-रूप चो माला-मूंदी आउर फटईमन के मांगला। 36 जहोवा, मिसरीमन के इसराएलिमन उपरे इतलो दया करालो कि जोन-जोन तीज इसराएलिमन मांगला हुन सपाय तीजमन के मिसरीमन दिला। असन बरन ले इसराएलिमन, मिसरीमन के चरचरा करला।
इसराएलिमन, मिसर देस् ले निकरुन जातोर
37 तेबे इसराएलिमन, रामसेस सहर ले निकरुन सुकोत सहर ने गेला। बायले-पिलामन के छांडुन हिंडते जातो मनुकमन ची छयक लाख रला। 38 इसराएलिमन संगे मिसुन दुसर लोगमन बले हुताले निकरली, आउर खुबे छेरी-मेंडी आउर गाय-बयलामन चो गोहड़ी बले हुनमन संगे गेला। 39 हुनमन मिसर देस् ले निकरतो बेरा धरुन रलो, चटकलो पिसान चो पाग नोहलो रोटी बनाला। कसनबलले हुनमन मिसर देस् ले इतलो हलवाल ने निकरला कि हुनमन बाटे खातो काजे काई रांदुक नी सकला। एईकाजे हुन चटकलो पिसान पाग नोहलोर रली।
40 इसराएलिमन मिसर देस् ने, चार सव तीस बरक रला। 41 चार सव तीस बरक पुरलो दिने ची, जहोवा चो सपाय रयत मिसर देस् ले निकरुन गेला। 42 इसराएलिमन के मिसर देस् ले निकराउन आनलो राती, जहोवा हुनमन काजे चेत ने रलो। एईकाजे इसराएलिमन पीड़ी-पीड़ी ले, हुन राती के सूरता करुन जहोवा काजे चेता रउन खास मानोत।
फसह तिहार चो नीती-नियम
43 फेर जहोवा, मोसा आउर हारून के बललो, “फसह तिहार मानतो नीती-नियम असन आय। कोनी परदेसिया हुन फसह तिहार चो मास के नी खाओ 44 मानतर जोन तुमचो मोल देउन घेनलो कमेया आय आउर तुमी हुनचो खतना करुन रले, हुन खाउक सकेदे। 45 मानतर कोनी परदेसिया आउर भूतियार हुनके नी खाओत। 46 हुनके गोटकी घरे खाहा बललोने, जतरा मास के खिंडिक बले बाहरे नी निया। आउर जतरा पसु चो कोनी हाड़ा के नी टुटाहा। 47 इसराएलिमन चो सपाय मंडली ए तिहार के मानतोर ची आय। 48 आउर कोनी परदेसिया तुमचो संगे रउन जहोवा काजे फसह तिहार मानुक मन करलोने, हुन आपलो घर चो सपाय मनुकमन चो खतना कराओ। पाछे, हुन जहोवा पुरे एउन फसह तिहार मानो। आउर हुन, हुन देस् चो रयत असन होयदे। मानतर कोनी खतना नी करालो मनुक, फसह तिहार चो मास के नी खाओ। 49 ए नियम-कानुन हुता रतो रयतमन काजे आउर तुमचो मंजिगता रतो परदेसियामन काजे गोटकी होओ।”