पईलातमन के महापरभु काजे पवितर मानुन सोपतोर
13
जहोवा, मोसा के बललो, 2 “इसराएलिमन चो सपाय पईलातमन बललोने, सपाय पईलात बेटामन आउर पईलात पसुमन के मोचो काजे पवितर मानुन सोपा। कसनबलले हुनमन मोचेई आत।”फसह तिहार मानतो नीति-नियम
3 मोसा फेर लोगमन के बललो, “ए दिन के तुमी सूरता करुन राहा। एई दिने तुमी मिसर देस् चो कमेया-बुता ले निकरुन ईलासाहास। जहोवा तुमके आपलो हाथ चो सकत ले हुन थान ले निकराउन आनलो। ए दिने पाग बिती रोटी नी खाहा। 4 आबीब मयना ने आजी चो दिने, तुमी निकरुन जायसाहास। 5 जेबे जहोवा तुमके कनानी, हित्ती, एमोरी, हिव्वी आउर जबूसी लोगमन चो देस् बललोने, गोरस आउर ओंडार-तेल बोहतो देस् ने अमरायदे, जेचो बायदा जहोवा तुमचो पुरखा-पाटीमन ले करुन रलो। तेबे हुता तुमी, एई मयना ने नीती-नियम हिसाब ले तिहार माना। 6 सात दिन होओत ले पाग नोहलो रोटी खाहा आउर सातवां दिने जहोवा काजे तिहार माना। 7 ए सातो दिने पाग नोहलो रोटी खाहा। पाग बिती रोटी आउर काई पाग, तुमचो लगे आउर तुमचो देस् ने कहांय बले, नी रओ। 8 हुन दिने, तुमी आपलो बेटामन के असन सांगा, ‘मिसर देस् ले निकरुन एतोदांय जहोवा मोचो काजे करलो अचरित बुतामन किरता, मय ए तिहार के मानेंसे’। 9 ए तिहार तुके सूरता करातो काजे, तुचो हाथे गोटोक चीना आउर तुचो कपारे टीका असन रओ, जेचोले जहोवा चो नियम-कानुन तुचो टोंडे रयदे। कसनबलले जहोवा तुके आपलो सकत हाथ ले मिसर देस् ले निकराउन आनलोसे। 10 एईकाजे तुय रोजे बरक कबूल धरालो समया ने ए नीती-नियम के मान।”
पईलातमन चो बारे ने
11 “जेबे जहोवा तुमचो ले आउर तुमचो पुरखामन ले किरिया खादलो हिसाब ले, तुमके कनानीमन चो देस् ने अमराउन हुन देस् के तुमके देयदे, 12 तेबे तुमचो सपाय पईलातमन के जहोवा के सोपुन दियास। तुमचो सपाय पईलात बेटामन आउर सपाय पईलात पसुमन जहोवा चो आत। 13 गदही चो पईलात पिला के छंडातो काजे हुनचो पलटा मेंडा पिला देउन दिया। तुमी हुनके नी छंडाउआहास जाले, हुनचो टोडरा के अलटुन दियास। मानतर आपलो सपाय पईलात बेटामन के छंडाहा। 14 फेर केबई बले तुमचो बेटामन तुमके पूछदे, ‘असन काय काजे करसाहास’, तेबे तुमी हुनमन के सांगा, ‘जहोवा आपलो हाथ चो सकत ले, आमके मिसर देस् चो कमेया-बुता ले निकराउन आनलोसे। 15 हुन समया ने, फिरोन कटुर होउन आमके जाउक देतो मन नी करलो। तेबे जहोवा मिसर देस् चो सपाय पईलात बेटामन आउर सपाय पईलात पसुमन के मोरते मारलो। एईकाजे सपाय पईलात पसुमन के आमी जहोवा काजे जतरा करुंसे। मानतर आमचो सपाय पईलात बेटामन के पलटा देउन छंडाउंसे’। 16 ए गोट तुमचो हाथमन ने चीना आउर तुमचो कपारे टीका असन रओ। कसनबलले जहोवा आपलो सकत हाथ ले आमके मिसर देस् ले निकराउन आनलोसे।”
बादरी चो खमा आउर आईग चो खमा
17 फिरोन, इसराएलिमन के जातो हुकुम दिलो, पलिस्तीमन चो देस् मंजार ले जातो बाट लगे रले बले, महापरभु असन बिचारलो, “ए लोगमन लड़ई के दखुन डरदे आउर मिसर देस् ने बोहड़ुन जातो मन करदे।” एईकाजे इसराएलिमन के हुन बाट ले नी नीलो। 18 महापरभु हुनमन के बुलाते-बुलाते टंग-टंगा भाटा बाटले लाल समदूर बाटे नीलो आउर इसराएलिमन हतियारमन धरुन जुद काजे तियार होउन पाती बांदुन मिसर देस् ले निकरुन गेला। 19 मोसा, जूसुफ चो हाड़ामन के आपलो संगे धरुन गेलो। कसनबलले जूसुफ, इसराएलिमन के असन बलुन किरिया खुआउन रये, “जेबे महापरभु तुमचो सूरता करेदे आउर तेबे तुमी मोचो हाड़ामन के एता ले नियासे।” 20 फेर हुनमन सुकोत सहर ले निकरुन टंग-टंगा भाटा रेटे एताम ने तमु गाड़ला। 21 आउर जहोवा हुनमन के बाट दखातो काजे, दिन बेरा बादरी चो खमा ले आउर राती बेरा आईग चो खमा ले उजर बनुन हुनमन चो पुरे-पुरे जाते रये, जेचोले हुनमन दिन आउर राती हिंडुक सकते रला। 22 हुन, लोगमन चो पुरे ले बादरी चो खमा के दिन ने आउर आईग चो खमा के राती ने नी गुचालो।