लाल समदूर के नाहकतोर
14
जहोवा, मोसा के बललो, 2 “इसराएलिमन के हुकुम देस, हुनमन बोहड़ुन मिगदोल सहर आउर समदूर मंजारे चो पीहाहीरोत सहर लगे बाल-सपोन चो पुरे तमु गाड़ोत। तुय हुनचो पुरे समदूर रेटे तमु गाड़। 3 तेबे फिरोन, इसराएलिमन चो बारे ने असन बिचारेदे, ‘हुनमन नी जानलो देस ने भुलकलासोत आउर टंग-टंगा भाटा ने गुपलासोत।’ 4 मय फिरोन चो मन के कटुर करेंदे, आउर हुन, हुनमन चो पाट-पाट डगर जायदे। तेबे फिरोन आउर हुनचो पलटनमन के हराउन मय, मयमा पायंदे आउर मिसरीमन जानदे कि मय जहोवा आंय।” आउर हुनमन उसनेचे करला।5 जेबे मिसर चो राजा फिरोन के खबर मिरली, इसराएलिमन पराला, तेबे फिरोन आउर हुनचो राजपालमन चो मन इसराएलिमन चो बिरुद होली। हुनमन बलला, “आमी इसराएलिमन के कमेया बुता कराउक छांडुन काय काजे जाउक दिलु?” 6 तेबे हुन, आपलो रथ तियार करालो आउर पलटन के संगे नीलो। 7 हुन, नंगत-नंगत छय सव रथमन बाछलो आउर मिसर देस् चो दुसर सपाय रथमन के बले तियार करालो आउर हुनमन सपाय उपरे मुखियामन के संगालो। 8 जहोवा मिसर चो राजा फिरोन चो मन के कटुर करलो, एईकाजे हुन इसराएलिमन चो पाट-पाट डगर गेलो। मानतर इसराएलिमन डर नोहलोर जाते रला। 9 तेबे मिसरीमन बललोने, फिरोन चो सपाय घोड़ामन, रथमन आउर सपाय पलटन, इसराएलिमन चो पाट-पाट गेला। हुनमन, पीहाहीरोत सहर लगे बाल-सपोन चो पुरे, समदूर खंडे इसराएलिमन तमु गाड़लो थाने अमरला।
10 जेबे फिरोन लगे अमरलो, इसराएलिमन दखला कि मिसरीमन हुनमन चो पाट-पाट डगर एयसोत। तेबे हुनमन खुबे डरला आउर किर-किरुन जहोवा के गुहारला। 11 हुनमन मोसा के बलला, “काय काजे तुय मिसर देस् ले ए टंग-टंगा भाटा ने आमके मोरतो काजे आनलिसीस? काय, मिसर देस् ने मोड़ाभाटा नी रली? 12 काय, आमी तुके मिसर देस् ने एई गोट नी बलते रलु, ‘आमके मिसरीमन चो सेवा करतो काजे हुताय रउक देस’। आमके ए टंग-टंगा भाटा ने मोरतो पलटा मिसरीमन चो सेवा करतोर नंगत रली।” 13 मोसा, इसराएलिमन के बललो, “नी डरा। ढाढ़ुस करा! आजी जहोवा तुमचो काजे करतो छंडावा के दखा। कसनबलले जोन मिसरीमन के तुमी आजी दखसाहास, हुनमन के फेर केबई नी दखासे। 14 जहोवा खुदे तुमचो काजे लड़ेदे, एईकाजे तुमी ओगाय राहा।” 15 तेबे जहोवा, मोसा के बललो, “तुय काय काजे मोके गुहारसीस? इसराएलिमन के एताले पुरे जातो हुकुम देस। 16 तुय आपलो बड़गा के उठाव! हुनके समदूर उपरे लमाव! हुन दुय भाग होयदे, तेबे इसराएलिमन, समदूर मंजार ले सुकलो भुंय ने ए-पाट ले हुन-पाट जादे। 17 तुय सुन, मय, मिसरीमन चो मन के कटुर करेंदे आउर हुनमन तुमचो पाट-पाट एउन समदूर मंजारे जादे। तेबे फिरोन, हुनचो सपाय पलटन, रथमन आउर हुता रलो सपाय लोगमन सत्यानास होउन जादे आउर मोचो मयमा होयदे। 18 जेबे फिरोन, हुनचो रथमन आउर रथ चलाउमन के हराउन मय मयमा पायंदे, तेबे मिसरीमन जानदे, मय जहोवा आंय।”
19 महापरभु चो दूत जोन इसराएलिमन चो पुरे-पुरे जाते रये, हुन हुनमन चो पाटकुती गेलो आउर बादरी चो खमा बले हुनमन चो पुरे ले गुचुन पाटकुती गेली। 20 असन बरन ले हुन बादरी, मिसरीमन आउर इसराएलिमन चो मंजारे होली। बादरी आउर अंधार रले बले राती बेरा इसराएलिमन के उजर मिरते रये। एईकाजे गुलाय राती मिसरीमन, इसराएलिमन लगे जाउक नी सकला।
21 तेबे मोसा, आपलो हाथ समदूर उपरे लमालो। जहोवा गुलाय राती खुबे लेहरा-धुका बोहाउन समदूर चो पानी के दुय भाग करुन दिलो, जेचोले सुकलो भुंय दखा दिली। 22 तेबे इसराएलिमन समदूर चो मंजार ले सुकलो भुंय ने हिंडते गेला आउर समदूर चो पानी उजा बाटे आउर डेबरी बाटे भीती असन ठेबुन रली। 23 तेबे मिसरीमन बललोने, फिरोन चो सपाय घोड़ामन, रथमन आउर पलटन, इसराएलिमन के धरतो काजे हुनमन चो पाट-पाट समदूर मंजारे गेला। 24 बियान पावतोके, आईग चो खमा आउर बादरी ले होउन महापरभु मिसरी पलटन के दखलो। असन बरन ले हुनमन के डर चेपाली। 25 हुन, मिसरीमन चो रथमन चो चक्कामन के धसालो, जेचोले हुनमन, रथमन के चलाउक नी सकला। तेबे मिसरीमन गोटोक-दुसर के बलला, “इआ, आमी इसराएलिमन चो लग ले पराउं। कसनबलले जहोवा हुनमन बाटले आमचो बिरुद लड़ेसे।”
26 फेर जहोवा, मोसा के बललो, “समदूर उपरे आपलो हाथ के लमाव, तेबे समदूर चो पानी मिसरीमन, हुनमन चो रथमन आउर पलटन उपरे फेर बोहेदे।” 27 मोसा आपलो हाथ के समदूर उपरे लमालो आउर बियान पावते-पावते समदूर चो पानी जसन चो उसने बोहली। तेबे मिसरीमन बोहड़ुन पराउक मुरियाला, मानतर जहोवा हुनमन के समदूर मंजारे ची बुड़ाउन मोरालो। 28 समदूर चो पानी जसन चो उसन बोहतोके, इसराएलिमन चो पाट-पाट समदूर ने जातो, फिरोन चो सपाय रथमन, घोड़ा-सुवारमन आउर पलटनमन बुड़ून मोरला। हुनमन ले गोटोक बले नी बाचला। 29 मानतर इसराएलिमन समदूर मंजार ले सुकलो भुंय ने हिंडते गेला आउर पानी उजा बाटे आउर डेबरी बाटे भीती असन ठेबुन रली।