मोसा आउर इसराएलिमन चो गीत
15
तेबे मोसा आउर इसराएलिमन, जहोवा काजे ए गीत गावला:“मय जहोवा काजे गीत गायंदे, हुन, सपाय के जीतुन मयमा पावलोसे
हुन, घोड़ामन के, घोड़ा सुवारमन संगे समदूर ने बुड़ालोसे।
2 जहोवा मोचो सकत आउर मोचो गीत आय,
हुनी मोचो मुक्ति देउ आय,
मोचो महापरभु हुनी आय, आउर मय हुनचो जय-जय करेंदे,
हुनी मोचो पुरखामन चो महापरभु आय, मय हुनके सहरायंदे।
3 जहोवा बीर आय;
हुनचो नाव जहोवा आय।”
4 “फिरोन चो रथमन के आउर पलटन के हुन, समदूर ने पकालो;
हुनचो बाछलो राजपालमन लाल समदूर ने बुड़ला।
5 गड़िया पानी हुनमन के बुड़ाली;
गड़िया पानी ने हुनमन, पकना असन बुड़ून गेला।
6 ए जहोवा, तुचो उजा हाथ, सकत ने माहान आय
ए जहोवा, तुचो उजा हाथ, बयरीमन के जत-खत करलीसे।
7 तुय आपलो मयमा ले तुचो बयरीमन के घसरालीस,
आपलो जंजाल रीस ले हुनमन के खड़ असन डसालीस।
8 तुचो फुंडा ले पानी रूंडा होउन डेंग होली
बोहतो पानी भीती असन ठेबली
समदूर मंजारे गड़िया पानी करा असन सतली।
9 तुचो बयरी बललो, ‘मय हुनमन के खेदुन जीतेंदे,
झीका-उड़मा करलो धन-माल के बाटेंदे, तेबे मोचो मन-इछा पुरा होयदे।
मय मोचो हाथ चो खांडा ले हुनमन के सत्यानास करेंदे’।
10 तुय सबुले सकत फुंडा-लेहरा बोहाउन समदूर ने हुनमन के बुड़ालीस
गड़िया पानी ने हुनमन लोहो असन बुड़ला।”
11 “ए जहोवा, देव-धामीमन ने तुचो कटार कोन आसे?
तुचो असन पवितर ने मयमा-मान,
आउर भक्यातो लाईक अचरित बुता करु कोन आय?
12 तुय आपलो उजा हाथ के लमालीस,
आउर मंजपुर हुनमन के गिरली।”
13 “तुय आपलो सत-मया ले आपलो छंडालो रयत के बाट दखालीस;
तुय आपलो सकत ले हुनमन के तुचो पवितर ठाने अमरालीस।
14 जात-जात चो लोगमन सुनुन थरथरला;
पलिस्तीमन चो जीव उड़ली।
15 एदोम चो मुखियामन बाय-बिकाल होला;
मोआब चो बीरमन थरथरला;
कनान देस् चो सपाय लोगमन के डर चेपाली।
16 ए जहोवा, तुचो लोगमन निकरुन जाओत ले;
आउर तुय मोल देउन घेनलो रयत हुन पाट नाहकतले,
हुनमन के डर चेपाली आउर भामरी होला
तुचो बांहा चो सकत ले हुनमन पकना असन जीव नोहलो होला।
17 ए जहोवा, तुय हुनमन के आपलो निज डोंगरी ने बसापत करासे,
जोन थाने तुय आपलो रतो काजे बनालीस,
ए हुनी पवितर ठान आय, जेके तुय आपलो हाथे बनालीस।
18 जहोवा जुग-जुग काजे राज करते रयदे।”
19 ए गीत के एईकाजे गावते रओत कि फिरोन चो घोड़ामन, रथमन आउर घोड़ा-सुवारमन समदूर मंजारे गेला, आउर जहोवा, हुनमन के समदूर चो पानी ने बुड़ालो; मानतर इसराएलिमन, समदूर मंजार ले सुकलो भुंये हिंडुन गेला।
मिरयाम चो गीत
20 तेबे हारून चो बईन मिरयाम अगमजानी, डफली धरली, आउर सपाय बायले-लेकीमन बले डफली धरुन नाचते-नाचते हुनचो पाट-पाट होला। 21 मिरयाम हुनमन संगे ए गीत गावली:
“जहोवा चो गीत गाहा, हुन सपाय के जीतुन मयमा पावलोसे,
हुन, घोड़ामन के आउर घोड़ा-सुवारमन के गड़िया समदूर ने बुड़ालोसे।”
पीता पानी के सुवाद बनातोर
22 तेबे मोसा, इसराएलिमन के लाल समदूर ले सूर नाव चो टंग-टंगा भाटा ने जातो हुकुम दिलो। तीन दिनतले टंग-टंगा भाटा ने हिंडलो पाछे बले, हुनमन के पानी नी मिरली। 23 पाछे, मारा नाव चो ठाने अमरला, (हुता चो पानी पीता रये, एईकाजे हुन ठान चो नाव मारा पड़ली।) हुनमन हुता चो पानी पीउक नी सकला। 24 तेबे हुनमन मोसा चो बिरुद गुरमुरुक मुरियाला, “आमी काय पीउआंव?” 25 तेबे मोसा, जहोवा के गुहारलो आउर जहोवा हुनके गोटोक दारु गोंदा के दखालो। हुन, हुनके पानी ने पकातोके पीता बीती पानी, सुवाद होली। हुनी थाने जहोवा हुनमन काजे गोटोक नीती-नियम बनालो आउर हुनी थाने हुनमन के असन बलुन परखलो।
26 “तुमी आपलो महापरभु-जहोवा चो बचन समपुरन मन ले सुनलोने, आउर जोन हुनचो नंजर ने नंगत आय हुनी करलोने, आउर हुनचो हुकुममन आउर हुनचो सपाय नियम-कानुनमन के मानलोने, मय जितलो मरी मिसरीमन उपरे पठालेसे, हुनमन ले गोटोक बले बिपती तुमचो उपरे नी पठायें। कसनबलले मय तुमके चेकरातो जहोवा आंय।”
27 तेबे हुनमन एलीम ने अमरला, जोन थाने बारा ठन पानी-पजरामन रये आउर तीन कोड़ी दस ठन खजूर रूकमन रये। हुनमन हुनी पानी पजरामन लगे तमुमन गाड़ला।