इसराएलिमन काजे खादी: मन्ना आउर लावा
16
मिसर देस् ले निकरलो पाछे, दुसर मयना चो पंदरवां दिने, इसराएलिमन चो सपाय मंडली, एलीम ले निकरुन सीन नाव चो टंग-टंगा भाटा ने, जोन एलीम आउर सिनाई डोंगरी चो मंजिगता आसे, हुता अमरला। 2 इसराएलिमन चो सपाय मंडली छीड़ा ठाने मोसा आउर हारून चो बिरुद गुरमुरुक मुरियाला। 3 इसराएलिमन हुनमन के बलला, “जहोवा आमके मिसर देस् ने ची मोरते मारुन रले नंगत होती, कसनबलले आमी मिसर देस् ने, मास चो हांडीमन लगे बसुन मुहड़ा भागतले मास आउर रोटी खाते रलु। मानतर तुमी, आमी सपाय के ए छीड़ा ठाने भूके मोरातो काजे आनलासाहास।”4 तेबे जहोवा, मोसा के बललो, “दखा, मय तुमचो काजे सरगपुर ले खातो तीजमन बरसा असन घसरायंदे, आउर ए लोगमन रोजे दिने आपलो काजे खातो तीजमन रूंडा करदे, एचोले मय एमन के परखेंदे कि एमन मोचो हुकुम के मानदे कि नाई। 5 छटवां दिने, खातो तीजमन के, दुसर दिन ले दुय-गुना आगर घसरायंदे। एईकाजे हुन दिने, रूंडालो तीजमन के रांदुन संगाओत” 6 तेबे मोसा आउर हारून सपाय इसराएलिमन के बलला, “सांज बेरा तुमी जानासे, जोन तुमके मिसर देस् ले निकराउन आनलोसे, हुन जहोवा आय। 7 बियाने जहोवा चो मयमा उजर तुमके दखा देयदे, कसनबलले तुमी जहोवा चो बिरुद गुरमुरतो के हुन सुनलोसे। तुमी काय काजे आमचो संगे गुरमुरसाहास?” 8 फेर मोसा बललो, “ए तेबे होयदे, जेबे जहोवा तुमके सांज बेरा खातो काजे मास आउर बियाने, पेट भर रोटी देयदे। कसनबलले तुमी, हुनचो बिरुद ने गुरमुरसाहास, हुन हुनके सुनेसे। आमी काय आंव गुने तुमी आमचो बिरुद गुरमुरसाहास? तुमी आमचो बिरुद नाई, जहोवा चो बिरुद गुरमुरसाहास।”
9 फेर मोसा, हारून के बललो, “इसराएलिमन चो सपाय मंडली के जहोवा लगे एतो हुकुम देस। कसनबलले हुन, हुनमन चो गुरमुरतो के सुनलोसे।” 10 हारून, इसराएलिमन चो सपाय मंडली के असन हुकुम देतो बेरा, हुनमन छीड़ा ठान बाटे दखला आउर जहोवा चो मयमा बादरी ने दखा देते रये। 11 तेबे जहोवा, मोसा के बललो, 12 “इसराएलिमन चो गुरमुरतो के मय सुनलेसे, हुनमन के सांग कि सांज बेरा तुमी मास खाहासे आउर बियाने पेट भर रोटी खाहासे। तेबे तुमी जानासे, मय तुमचो महापरभु-जहोवा आंय।”
13 हुनी दिने सांज बेरा तमु-भाटा चो भोंवरक लावामन एउन बसला आउर बियाने हुता भोंवरक ओस पड़ली। 14 जिदलदांय ओस सुकली तेबे भाटा ने नानी-नानी करा असन तीजमन पड़लोर दखला। 15 एके दखुन इसराएलिमन गोटोक-दुसर के बलला, “ए काय बिती आय?” कसनबलले हुनमन नी जानते रला, हुन काय आय। तेबे मोसा हुनमन के बललो, “ए हुनी रोटी आय जेके जहोवा तुमके खातो काजे दिलोसे। 16 जहोवा दिलो हुकुम ए आय, ‘तुमी आपलो-आपलो खाउक सकतो हिसाब ले रूंडा करा बललोने, आपलो-आपलो तमुमन ने रतो लोगमन चो गनती हिसाब ले गोटोक झन काजे गोटोक ओमेर* बेचा’।” 17 तेबे इसराएलिमन उसनेची करला, कोनी खुबे आउर कोनी खिंडिक असन बेचला। 18 जिदलदांय हुनमन ओमेर ने नापला, तेबे जेचो लगे खुबे रली, हुनचो खुबे नी होली, आउर जेचो लगे खिंडिक असन रये, हुनचो बले उना नी होली। सपाय झन आपलो खाउक सकतो हिसाब ले बेचुन रला। 19 फेर मोसा हुनमन के बललो, “एके बियानत ले कोनी नी संगाउन राहा।” 20 तेबले बले हुनमन मोसा चो गोट नी धरला, आउर कोनी-कोनी हुनके बियानतले संगाउन रला, तेबे हुन थाने कीड़ा पड़ली आउर हुन बास देउक मुरियाली। तेबे मोसा हुनमन के रीस होलो। 21 हुनमन रोजे बियाने खाउक सकतो हिसाब ले मन्ना बेचते रला, मानतर खुबे घाम छेकलोने, हुन तीज गलते रये।
22 फेर छटवां दिने हुनमन दुय गुना बललोने, माने पीछी दुय-दुय ओमेर मन्ना बेचला। जेबे मंडली चो सपाय मुखियामन एउन मोसा के सांगला। 23 तेबे मोसा हुनमन के बललो, “ए जहोवा दिलो हुकुम आय: ‘काली बिसातो दिन आय, जहोवा काजे बिसातो दिन पवितर आय। एईकाजे तुमी जेके रांदतोर आय रांदा, नोहले उसातो तीज के उसाहा आउर बाचलो बिती के बियानतले संगाउन राहा’।” 24 जेबे हुनमन मोसा चो हुकुम हिसाब ले हुनके बियान काजे संगाउन रला, तेबे हुन बास बले नी दिली आउर कीड़ा बले नी पड़ला। 25 तेबे मोसा बललो, “आजी हुनकेई खाहा। कसनबलले आजी जहोवा चो बिसातो दिन आय। एईकाजे आजी, भाटा ने तुमके मन्ना नी मिरे। 26 छय दिन तो तुमी हुनके बेचासे, मानतर सातवां दिन बिसातो दिन आय। एईकाजे हुन दिने नी मिरे।” 27 तेबले बले कोनी कोनी लोगमन सातवां दिन बले बेचतो काजे भाटा ने गेला। मानतर हुनमन के काई ची नी मिरली। 28 तेबे जहोवा मोसा के बललो, “तुमी केबतले मोचो हुकुममन के आउर सिखानी के नी मानासे? 29 दखा, जहोवा तुमके बिसातो दिन दिलोसे, एईकाजे छटवां दिने हुन दुय गुना मन्ना तुमके देयसे। सातवां दिने कोनी बले आपलो ठान ले बाहरे नी जाहा।” 30 तेबे हुनमन सातवां दिने बिसाला।
31 इसराएली लोगमन हुन खातो तीज के, मन्ना नाव दिला। हुन, धनिया बीचा इदलो रये आउर पंडरा रये। आउर ओंडार तेल ले बनालो पापड़ी असन सुवाद लागते रये। 32 फेर मोसा बललो, “जहोवा चो हुकुम आय: ‘एताले गोटोक ओमेर आपलो थर चो पीड़ी-पीड़ी काजे संगाउन राहा, जेचोले हुनमन जानोत कि जहोवा आमके मिसर देस् ले निकराउन आनतो बेरा टंग-टंगा भाटा ने कसन बरन चो रोटी खुआते रये’।” 33 तेबे मोसा हारून के बललो, “गोटोक बटका ने, गोटोक ओमेर मन्ना धरुन हुनके जहोवा पुरे संगाव कि हुन तुमचो पीड़ी-पीड़ी काजे संगालोर रओ।” 34 जहोवा, मोसा के जसन हुकुम देउन रलो, हुनी हिसाब ले हारून मन्ना के बायदा चो डोली भीतरे संगालो। 35 जिदलदांय ले इसराएलिमन बायदा करलो देस् ने नी अमरुन रला, हुदलदांय ले चालीस बरक होओतले मन्ना खाते रला। हुनमन कनान देस् चो संद अमरतले मन्ना ची खाते रला। 36 गोटोक ओमेर, एपा चो दसवां भाग आय।