होरेब चो सिलपट ले पानी निकरतोर
17
जहोवा चो हुकुम हिसाब ले, इसराएलिमन चो सपाय मंडली सीन चो टंग-टंगा भाटा ले निकरुन जातो बाटे ठेबते-ठेबते रपीदीम ने अमरुन डेरा धरला। हुता हुनमन के पीवतो पानी नी मिरली। 2 एईकाजे हुनमन मोसा के झगड़ा करुन बलला, “आमके पीवतो काजे पानी देस।” मोसा हुनमन के बललो, “तुमी काय काजे मोके झगड़ा करसाहास? काय काजे जहोवा के परखेसाहास?” 3 हुता लोगमन के पानी खाउक भावली, तेबे हुनमन मोसा के बलला, “काय काजे तुय आमके, आमचो पिला-झीलामन के आउर छेरी-मेंडीमन के पियास ले मोरातो काजे मिसर देस् ले निकराउन आनलिसीस?” 4 तेबे मोसा, जहोवा के गुहारुन बललो, “ए लोगमन संगे मय काय करुआंय, ए सपाय मोके पकना ने मोरते मारतो काजे होलासोत।” 5 जहोवा, मोसा के बललो, “इसराएलिमन ले कोनी-कोनी सियानमन के आपलो संगे ने, आउर जोन बड़गा ले तुय नील नंदी ने मारुन रलीस, हुन बड़गा के हाथे धरुन हुनमन चो पुरे-पुरे जा। 6 दख, मय तुचोले पुरे जाउन होरेब ने सिलपट उपरे उबा रयंदे, आउर तुय सिलपट के मार। तेबे लोगमन चो खातो काजे हुताले पानी निकरेदे।” तेबे मोसा, इसराएलिमन चो सियानमन दखते-दखते उसनेची करलो। 7 मोसा हुन ठान चो नाव मस्सा आउर मरीबा* संगालो। कसनबलले इसराएलिमन हुता झगड़ा करुन रला आउर जहोवा के परखुन बलला, “आमचो मंजारे जहोवा आसे कि नाई।”अमालेकीमन के जीततोर
8 तेबे अमालेकीमन, रपीदीम ने एउन, इसराएलिमन संगे जुद करुक मुरियाला। 9 एईकाजे मोसा, जहोसू के बललो, “आमचो काजे मनुकमन के बाछ आउर जाउन अमालेकीमन संगे जुद कर। मय काली के महापरभु चो बड़गा के धरुन डोंगरी चो सिग ने उबा रयंदे।” 10 मोसा चो ए हुकुम हिसाब ले जहोसू, अमालेकीमन संगे जुद करुक गेलो। मोसा, हारून आउर हूर, डोंगरी चो सिग ने चेगला। 11 जिदलदांय ले मोसा आपलो हाथ के उपरे उठाउन रते रये, हुदलदांय ले इसराएलिमन जीतते रला, मानतर जेबे-जेबे हुन आपलो हाथ के खाले करते रये, तेबे-तेबे अमालेकीमन जीतते रला। 12 मानतर जेबे मोसा चो हाथ थाकली, तेबे हुनमन गोटोक पकना आनला आउर हुन, हुता बसलो। हारून आउर हूर हुनचो दुनो पाटे रउन हुनचो हाथमन के उठाउन थामुन रला। हुनचो हाथ, बेर बसतोदांय ले चमकट रये। 13 जहोसू, अमालेकीमन के खांडा ले मोरते मारलो।
14 तेबे जहोवा मोसा के बललो, “ए गोट के सूरता काजे किताप ने लिख आउर जहोसू के बले सांग: मय गुलाय मंजपुर ले अमालेकीमन के सत्यानास करेंदे कि कोनी हुनमन के सूरता बले नी करदे।” 15 तेबे मोसा हुता गोटोक बेदी बनालो आउर हुनचो नाव जहोवा-निस्सी संगालो बललोने, जहोवा मोचो झंडा। 16 मोसा बललो, “जहोवा किरिया खादलोसे, जहोवा अमालेकीमन चो पीड़ी-पीड़ी ले जुद करते रयदे।”