मोसा आपलो सतरा जितरू संगे भेट होतोर
18
मोसा चो सतरा, मिदयान चो पुजारी जितरू सुनलो, महापरभु आपलो रयत इसराएल आउर मोसा काजे काय-काय करलोसे आउर जहोवा कसन बरन ले इसराएलिमन के मिसर देस् ले निकराउन आनलोसे। 2 मोसा आपलो बायले सिपोरा के, हुनचो सतरा जितरू घरे पठाउन रलो 3 आउर हुनचो दुनो बेटामन, गोटोक चो नाव, “मय दुसर देस् ने परदेसिया” आंसे बलुन गरसोम संगालो, 4 आउर दुसर चो नाव, “मोचो पुरखामन चो महापरभु, मोके साका” होउन मोके फिरोन चो खांडा ले बचालो बलुन एलीएजर संगालो। 5 तेबे मोसा चो सतरा जितरू, मोसा चो बायले आउर दुनो बेटामन के धरुन मोसा लगे टंग-टंगा भाटा ने ईलो, जोन महापरभु चो डोंगरी लगे डेरा धरुन रये। 6 हुन मोसा लगे असन खबर पठाउन रये, “मय तुचो सतरा जितरू आंय। मय तुचो बायले आउर दुनो बेटामन के धरुन तुचो लगे आनेंसे।” 7 तेबे मोसा आपलो सतरा के भेटतो काजे ईलो आउर हुनके पांय पड़लो आउर चूमलो। फेर हुनमन दुनो अस्तिर ले गोटेयाते तमु ने गेला। 8 हुन थाने मोसा आपलो सतरा के ए सपाय गोट सांगलो कि जहोवा इसराएलिमन चो किरता फिरोन आउर मिसरीमन संगे काय-काय करलो, आउर इसराएलिमन एतो बाट ने काय-काय डंड पावला आउर जहोवा हुनमन के कसन बरन ले छंडाउन आनलो। 9 तेबे इसराएलिमन काजे जहोवा करलो सपाय भलई बुतामन बललोने, हुनमन के मिसरीमन चो हक ले छंडालो किरता जितरू खुबे हरिक होलो।10 तेबे जितरू बललो, “धन-धन आय जहोवा जोन तुमके मिसरीमन आउर फिरोन चो हाथ ले छंडालोसे। 11 एदांय मय जानलेसे, जहोवा सपाय देव-धामीमन ले बड़े आय। कसनबलले हुन, इसराएलिमन संगे गुमान करुन अडरा बेबार करलो मिसरीमन ले हुनमन के छंडालो।” 12 तेबे मोसा चो सतरा जितरू, महापरभु काजे होम-जतरा आउर मिला-मिसा जतरा चेगालो। हारून, इसराएलिमन चो सपाय सियानमन संगे एउन मोसा चो सतरा जितरू संगे महापरभु चो पुरे भोज खादला।
जितरू चो सला ले लोगमन के बाछतोर
13 दुसर दिने मोसा, लोगमन चो नियाव करतो काजे बसलो आउर बियानतले धरुन सांज होओतले हुनमन मोसा चो भोंवरक उबा रला। 14 मोसा लोगमन काजे काय-काय करेसे दखुन हुनचो सतरा हुनके बललो, “तुय लोगमन काजे काय बुता करसीस? काय काजे तुय एकलाय बसुन रयसीस आउर लोगमन बियान ले धरुन सांज होओतले तुचो भोंवरक उबा रयसोत।” 15 मोसा आपलो सतरा के बललो, “लोगमन मोचो लगे महापरभु चो इछा जानतो काजे एयसोत। 16 जेबे हुनमन चो काई झगड़ा होयसे, तेबे हुनमन मोचो लगे एयसोत आउर मय हुनमन चो नियाव करेंसे आउर महापरभु चो नीती-नियम आउर नियम-कानुन के समजायंसे।” 17 मोसा चो सतरा हुनके बललो, “जोन तुय करसीस ए नंगत नोआय। 18 एचोले तुय आउर ए लोगमन बले जोन तुचो संगे आसोत, सते थाकासे। कसनबलले ए बुता तुचो समालुक सकतोले आगर आय। तुय एकला ए बुता करुक नी सकीस। 19 एईकाजे एदांय तुय मोचो गोट सुन, मय तुके सला देयंसे आउर महापरभु तुचो संगे रओ। तुय ए लोगमन किरता महापरभु चो पुरे जाते रा आउर एमन चो नियाव-दाव के महापरभु पुरे अमराते रा। 20 एमन के महापरभु चो नियम-कानुनमन आउर सिखानीमन आउर कोन बाट ने हिंडतोर आय आउर काय-काय बुता करतोर आय, ए सपाय गोट सांगुन देस। 21 फेर तुय ए सपाय लोगमन ले असन मनुकमन के बाछ, जोनमन ने नंगत गुन, महापरभु चो डर, पतेयातो लाईक आउर धन चो लालच नोहलोर रओत। हुनमन के हजार-हजार ने, सव-सव ने, पचास-पचास ने आउर दस-दस लोगमन उपरे मुखिया बनाव। 22 हुनमन अमदेया ए लोगमन चो नियाव करोत। सपाय बड़े-बड़े नियाव-दाव के तुचो लगे आनोत। मानतर नानी-चुनी नियाव-दाव के हुनमन खुदे नियाव करोत। तेबे तुय ए बुता के समालुक सकसे, कसनबलले हुनमन बले तुचो साहरा होदे। 23 तुय असने करलीस जाले, आउर महापरभु तुके हुकुम दिले जाले, तुय ए बुता करुक सकसे आउर ए सपाय लोगमन आपलो-आपलो घरे अस्तिर ले जाउक सकदे।”
24 मोसा आपलो सतरा चो गोट के सुनुन हुनचेई हिसाब ले सपाय बुता करलो। 25 एईकाजे मोसा सपाय इसराएलिमन ले नंगत गुन चो मनुकमन के बाछुन हजार-हजार, सव-सव, पचास-पचास आउर दस-दस लोगमन उपरे मुखिया बनालो। 26 फेर हुनमन, लोगमन चो नियाव करते रला। बड़े नियाव-दाव के मोसा लगे आनते रला आउर नानी नियाव-दाव हुनमन खुदे करते रला। 27 एचो पाछे, मोसा आपलो सतरा के बिदा दिलो आउर हुन आपलो देस् जाते गेलो।