सिनाई डोंगरी लगे इसराएलिमन
19
इसराएलिमन, मिसर देस् ले निकरुन सिनाई डोंगरी चो टंग-टंगा भाटा ने अमरलो दिने, तीन मयना पुरली। 2 तेबे हुनमन रपीदीम ले निकरुन सिनाई चो टंग-टंगा भाटा ने अमरला आउर हुताय तमु गाड़ला; इसराएलिमन डोंगरी पुरे चो टंग-टंगा भाटा ने डेरा धरला। 3 तेबे मोसा, महापरभु जहोवा लगे डोंगरी ने चेगलो आउर जहोवा डोंगरी उपर ले हुनके बललो, “जाकूब चो कुटुम के असन सांग आउर इसराएलिमन के मोचो ए गोट सुनाव: 4 मय मिसरीमन संगे काय-काय करले तुमी एके दखलास, मय तुमके सारंया चड़ई चो पाटकी ने बसाउन आनलो असन मोचो लगे आनलेसे। 5 एईकाजे एदांय तुमी मोचो गोट मानासे आउर मोचो बायदा हिसाब ले चलासे जाले, सपाय लोगमन ले तुमी ची मोचो निज-धन होआसे। गुलाय मंजपुर तो मोचोई आय। 6 मानतर तुमी मोचो काजे गोटोक पुजारीमन चो राज आउर पवितर बंस होआसे। तुय इसराएलिमन के ए गोट सांग।”7 तेबे मोसा एउन सपाय धरम-सियानमन के रूंडा करलो आउर जोन गोटमन जहोवा हुनके सांगतो काजे हुकुम देउ रलो, हुन सपाय गोटमन हुनमन के सांगलो। 8 तेबे सपाय लोग मिसुन बलला, “जितरो बले गोट जहोवा बललोसे, हुन सपाय के आमी पक्का करवां।” लोगमन चो ए गोट के मोसा जहोवा के सांगलो। 9 तेबे जहोवा मोसा के बललो, “सुन, मय बादरी ने होउन तुचो लगे एयंसे, जेबे मय तुचो संगे गोटेयायंदे, तेबे हुनमन सुनोत आउर अमदेया तुके पतेयाओत।” मोसा लोगमन चो सपाय गोट के जहोवा के सांगलो।
10 फेर जहोवा, मोसा के बललो, “लोगमन लगे जा, आउर हुनमन के बल, मोके भेट होतो काजे आजी आउर काली हुनमन आपने के सुद करोत आउर आपलो फटई के धोओत। 11 हुनमन तीसर दिने तियार रओत, कसनबलले तीसर दिने जहोवा सपाय लोग चो दखते-दखते सिनाई डोंगरी उपरे उतरेदे। 12 तुय लोगमन काजे डोंगरी चो भोंवरक बाड़ी बनाव आउर हुनमन के सांग, ‘चेत ने राहा, कोनी बले डोंगरी ने नी चेगा आउर हुनचो बाड़ी के बले नी छींआ। कोनी बले हुन डोंगरी के छिंयेदे हुनके मोरते मारा। 13 जोन कोनी बले डोंगरी के छियदे, हुनके कोनी बले हाथ ले नी छींआ, मानतर हुनके पकना ले मोरते मारा नोहले धनु-कांड ले बींदा, लोग होओ नोहले पसु होओ हुन जीव नी रओ’। जेबे तोड़ी फूकतो राग खुबे दांय ले सुना देयदे तेबे लोगमन डोंगरी लगे एओत।” 14 तेबे मोसा डोंगरी ले उतरुन लोगमन लगे ईलो आउर हुनमन के सुद करलो आउर हुनमन आपलो-आपलो फटईमन धोअला। 15 हुन, लोगमन के बललो, “तीसर दिन काजे तियार राहा, बायले लगे नी जाहा।”
16 तीसर दिन चो बियान पावते खन बादरी घुड़ल-चड़ल होउक मुरियाली आउर डोंगरी ने भींग करेया बादरी ढाकली। फेर जोर ले तोड़ी फूकतो राग सुना दिली, तेबे तमु-भाटा ने रलो सपाय लोग डर काजे थरथरला। 17 तेबे मोसा, लोगमन के महापरभु ले भेट करातो काजे तमु-भाटा ले बाहरे निकरालो आउर हुनमन डोंगरी खाले उबा रला। 18 जहोवा, आईग ने होउन सिनाई डोंगरी उपरे उतरलो। एईकाजे गुलाय डोंगरी ने कुमला ढाकुन रली आउर भाटी थानो कुमला असन दखा देते रये आउर डोंगरी थरथरली। 19 फेर जेबे तोड़ी फूकतो राग खुबे जोर ले होउक मुरियाली, तेबे मोसा गोटेयालो, आउर महापरभु हुनके बादरी घुड़लाउन उत्तर दिलो। 20 महापरभु सिनाई डोंगरी उपरे उतरलो आउर मोसा के डोंगरी उपरे हागदिलो, तेबे मोसा डोंगरी उपरे चेगलो। 21 जहोवा मोसा के बललो, “खाले उतरुन लोगमन के चेतानी देस, हुनमन बाड़ी के टुटाउन जहोवा के दखतो काजे लगे नी एओत, नोहले हुनमन ले खुबे लोग मोरुन जादे। 22 आउर जहोवा लगे एतो पुजारीमन बले आपने के पवितर करोत। नोहले मय जहोवा, हुनमन के डंड देयंदे।” 23 मोसा, जहोवा के बललो, “हुनमन सिनाई डोंगरी उपरे नी चेगुक सकोत। कसनबलले तुय खुदे आमके असन बलुन चेतानी दिलीसीस कि डोंगरी चो भोंवरक बाड़ी बनाउन हुनके पवितर संगाहा।” 24 जहोवा हुनके बललो, “खाले उतर, आउर हारून के उपरे आन; मानतर पुजारीमन आउर कोनी लोगमन बाड़ी के टुटाउन जहोवा लगे नी एओत, नोहले मय जहोवा हुनमन के नास करेदे।” 25 तेबे मोसा खाले उतरुन लोगमन के ए सपाय गोट सुनालो।