दस हुकुममन
20
तेबे महापरभु ए सपाय गोट सांगलो:2 “मय तुचो महापरभु, जहोवा आंय, जोन तुके मिसर देस् चो कमेया-बुता ले निकराउन आनलेसे।
3 तुय, मोके छांडुन कोनी दुसर देव-धामी के महापरभु नी मान।
4 तुय आपलो काजे उपरपुर नोहले मंजपुर नोहले मंजपुर खाले पानी भीतर चो काई रूप चो मूरत घड़ुन नी बनाव। 5 तुय हुनमन के डंडासरन नी कर आउर हुनमन चो सेवा-सासन बले नी कर। कसनबलले मय, तुचो महापरभु जहोवा ईरका होउ महापरभु आय। मोके बईर करतो लोग चो पीड़ी-पीड़ी के डंड देउआंय बललोने, आया-बुआ के मिरतो पाप चो डंड, हुनमन चो बेटा-बेटी आउर नाती-पुती के बले देउआंय। 6 मानतर मोके मया करतो आउर मोचो हुकुममन मानतो लोगमन चो हजारो पीड़ी-पीड़ी उपरे सत-मया करुआंय।
7 तुय आपलो महापरभु जहोवा चो नाव फोकाहा नी धर। कसनबलले, जोन कोनी बले जहोवा चो नाव फोकाहा धरेदे जहोवा हुनके डंड देयदे ची।
8 तुय बिसातो दिन के पवितर मानतो काजे सूरता करुन रा। 9 छय दिन तुय मसागत कर आउर आपलो सपाय बुता-बयना कर। 10 मानतर सातवां दिन तुचो महापरभु जहोवा काजे बिसातो दिन आय। हुन दिने तुय, तुचो बेटा-बेटीमन, तुचो कमेया-कमेयीनमन, तुचो पसुमन आउर तुचो घरे रतो परदेसियामन बले काई बरन चो बुता नी करोत। 11 कसनबलले जहोवा, बादरी, मंजपुर, समदूर आउर जितलो बले हुता आसोत, सपाय के छय दिन ने बनाउन सारलो आउर सातवां दिने बिसालो। एईकाजे जहोवा बिसातो दिन के बर दिलो आउर हुनके पवितर करलो।
12 तुय आपलो आया-बुआ चो इजित-मान कर, तेबे जोन देस् के तुचो महापरभु जहोवा तुके देयदे, हुन थाने तुय खुबे दिन ले रउक सकसे।
13 तुय कोकेई मोरते नी मार।
14 तुय बेबिचार नी कर।
15 तुय नी चोर।
16 तुय कोचई बिरुद फंद गवई नी देस।
17 तुय कोचई घर चो लालच नी कर। कोचई बायले चो लालच नी कर, कोचई कमेया-कमेयीन चो नोहले गाय-बयला चो, नोहले गदाहा चो, नोहले कोचई काई तीज चो बले लालच नी कर।”
18 जेबे लोगमन बादरी घुड़ल-चड़ल होतोके आउर तोड़ी फूकतो राग के सुनला आउर बड़े डोंगरी ले कुमला उठतोके दखला, तेबे हुनमन खुबे डरुन थर-थरते लापी उबा रला। 19 हुनमन मोसा के बलला, “तुयचे आमचो संगे गोटेयाव, तेबे आमी सुनुक सकुंदे। मानतर महापरभु आमचो संगे नी गोटेयाओ नोहले आमी मोरुन जाउंदे।” 20 मोसा लोगमन के बललो, “नी डरा, कसनबलले तुमके महापरभु परखतो काजे ईलोसे कि तुमचो मन ने अमदेया हुनचो डर रओ, जेचोले तुमी पाप नी करासे।”
21 हुन लोगमन लापी ची उबा रला। मानतर मोसा हुन भींग अंधार ने गेलो जोन थाने महापरभु रये। 22 तेबे जहोवा मोसा के बललो, “तुय इसराएलिमन के मोचो ए गोट सांग, तुमी खुदे दखलासाहास कि मय तुमचो संगे बादरी उपर ले काय गोटेयालेसे। 23 तुमी आपलो काजे सोन-रूप ले घड़ुन कोनी देव-धामी चो मूरत बनाउन मोचो पलटा हुनमन चो डंडासरन नी करा। 24 मोचो काजे माटी चो गोटोक बेदी बनाहा आउर हुताय आपलो छेरी-मेंडी, गाय-बयला के होम-जतरा आउर मिला-मिसा जतरा चेगाहा। जोन-जोन थाने मय मोचो नाव चो सूरता काजे बाछेंदे, हुता-हुता मय एउन तुमके बर देयंदे। 25 आउर तुमी मोचो काजे पकना चो बेदी बनातोर होले, गोदलो पकना ले नी बनाहा। कसनबलले जोन थाने तुमी आपलो हतियार छींयाहासे तुमी हुनके अपवितर करासे। 26 आउर मोचो बेदी ने चेगनी ले केबई नी चेगा, जेचोले तुमचो नांगा देहें दखा नी देओ।”