कमेयामन संगे नंगत ले बेबार करतोर
21
फेर जोन नियममन तुय हुनमन के देसे, हुन एमन आय। 2 “जेबे कोनी इबरी के कमेया-बुता काजे घेनासे, तेबे हुन छय बरक मालिक चो सेवा-बुता करो। मानतर सातवां बरक ने हुन छुट होउन जाओ, हुनके काई मोल देउक नी पड़े। 3 हुन एकलाय मालिक लगे एउन रले, एकलाय जाओ आउर आपलो बायले संगे एउन रले, हुनचो बायले बले हुनचो संगे जाओ। 4 हुनचो मालिक, हुनचो काजे बायले बिया करुन देउन रले आउर हुनचो बाटले बेटा-बेटीमन होउन रले, हुनचो बायले आउर हुनचो बेटा-बेटीमन हुन मालिक चो रओत आउर कमेया एकलाय जाओ। 5 मानतर हुन कमेया बलेदे, ‘मय छुट होउन नी जायें, मय मोचो मालिक के, मोचो बायले आउर मोचो बेटा-बेटीमन के मया करेंसे’। 6 तेबे हुनचो मालिक हुनके महापरभु पुरे नेओ आउर हुनके बाट चो कपाट नोहले चवकट लगे नेउन हुनचो कान छड़ाओ। कसनबलले हुन कमेया आपलो मालिक चो सेवा-बुता अमदेया करते रओ।7 कोनी आपलो बेटी के कमेयीन होतो काजे बिकलोसे जाले हुन, कमेयामन असन छुट होउन जाउक नी सकेदे। 8 मानतर कमेयीन, आपलो मालिक के हरिक नी करलीसे जाले, हुनचो बुआ ले मोल धरुन मालिक, हुनके जाउक देओ। मानतर मालिक हुनके परदेसियामन चो हाथे बिकुक नी सकेदे। कसनबलले उसन करले हुनचो संगे निमकधुसा होयदे। 9 मालिक, हुन कमेयीन के आपलो बेटा काजे बिया करुन रले, हुनचो संगे बेटी असन बेबार करो। 10 हुन दुसर बिया करलोने बले, हुनचो खादी-पीदी, फटई-टुटई आउर बायले चो हक देतोने काई उना नी करो। 11 मानतर हुन, ए सपाय नी दिलोने, हुन बायले काई मोल नी देउन छुट होउन जाउक सकेदे।
ओधरम करतो चो डंड काजे नियम
12 जोन बले कोनी मनुक के मार-पेट करेदे आउर हुन मोरुन जायदे, हुनके बले मोरते मारा। 13 मानतर हुन जानुन-बुजुन नी मारुन रले, आउर महापरभु चो मन-इछा ले हुनचो हाथे पड़ुन रले, तेबे हुन मारलो लोगमन काजे मय गोटोक ठान संगायंदे, जोन थाने पराउन हुन आपलो जीव बचाउक सकेदे। 14 मानतर कोनी जानुन-बुजुन नोहले कपट करुन कोकेई मोरते मारदे, तेबे हुनके मोरते मारतो काजे मोचो बेदी ले ओड़गोड़ते लापी निया।
15 जोन कोनी आपलो आया-बुआ के मार-पेट करेदे, हुनके पक्का मोरते मारा।
16 कोनी मनुक कोकेई चोरुन नेउन कोनी थाने हुनके बिकेदे नोहले आपलो घरे संगायदे, हुनके मोरते मारा।
17 जोन बले आपलो आया-बुआ के सरापेदे, हुनके बले मोरते मारा।
18 कोनी बले मारा-पेटा होतो बेरा गोटोक-दुसर के मुटका ले नोहले पकना ले खुबे मारेदे, हुन नी मोरले बले दुखा काजे ओचना ने पड़ुन रयदे 19 पाछे, हुन खिंडिक चेकरुन ठेंगा धरुन हिंडा-बुला होउक सकलोने, हुनके मारलो बीता दोख नोहलो होयदे। मानतर जितलो दिनतले हुन ओचना ने पड़ुन रलो उतलो दिन चो नोकसान चो पयसा-कोड़ी मारु बीता भरो आउर हुन चेकरतले हुनचो दखा-राखा करो।
20 कोनी आपलो कमेया के नोहले कमेयीन के बड़गा संगे मोरते मारलो जाले, हुनके मोरते मारतो चो डंड दियास। 21 मानतर हुन कमेया-कमेयीन गोटोक-दुय दिन जीव रले, हुनचो मालिक के डंड नी दियास, कसनबलले हुन कमेया-कमेयीन हुनचो धन आय।
22 कोनी बले मारा-पेटा होतो बेरा, कोनी पेटेहारिन बायले के पिला उतरुन जातो असन पायदे, आउर हुनके काई दुसर नोकसान नी होली जाले, हुन बायले चो मनुक जितलो पलटा बलेदे, आउर पंच जितलो पयसा-कोड़ी भोरुक बलेदे हुतलेई हुन मारु बीता भरो। 23 मानतर हुनके आउर काई नोकसान होली जाले, जीव चो पलटा जीव, 24 आंईक चो पलटा आंईक, दात चो पलटा दात, हाथ चो पलटा हाथ, पांय चो पलटा पांय, 25 जरलो पलटा जरतोर, घाव चो पलटा घाव आउर मारलो पलटा मारतो डंड दियास।
26 जेबे कोनी मालिक आपलो कमेया नोहले कमेयीन के आंईक फुटतले मारेदे, तेबे हुन, हुनचो आंईक चो पलटा हुनके छुट होउन जाउक देओ। 27 कोनी आपलो कमेया नोहले कमेयीन के दात टुटतले मारले, हुनचो टुटलो दात पलटा हुनके छुट होउन जाउक देओ।
जनावर चो मालिक काजे नियम
28 कोनी मनुक नोहले बायले के, कोनी बयला सींग ले ढुसमुन मोरालो जाले, हुन बयला के पकना ले मोरते मारा, आउर हुन बयला चो मास के नी खाहा। मानतर मालिक दोख नोहलोर रयदे। 29 हुन बयला, आगतले ढुसमतो काजे रोंअटलोसे जाले, आउर चेतानी दिलो पाछे बले, हुनचो मालिक हुन बयला के नी बांधलो, आउर हुन कोनी मनुक नोहले बायले के मोरते मारलो जाले, बयला के पकना ले मोरते मारा, आउर हुनचो मालिक के बले मोरते मारा। 30 मानतर मालिक आपलो जीव बचाउक मन करेसे जाले, हुन मोरु बीता चो जीव चो पलटा हुनचो घर-लोग, जितलो बले मांगदे उतलेई मोल हुनके भोरुक पड़ेदे। 31 बयला कोनी लेका नोहले लेकी के मारलो जाले, हुनचो मालिक संगे हुनी नियम हिसाब ले बेबार करा। 32 कोनी बयला, कोनी कमेया नोहले कमेयीन के ढुसमलो जाले, बयला चो मालिक हुन कमेया चो मालिक के तीस सेकेल रूपा देओ आउर हुन बयला के पकना संगे मोरते मारो।
33 कोनी मनुक खोदरा खोड़ुन हुनके नी ढाकले, आउर कोचई बयला नोहले गदाहा हुन थाने घसरले, 34 तेबे जोन खोदरा खोड़ुन रये हुन, नोकसान चो पलटा देओ। हुन, पसु चो मालिक के हुनचो मोल देओ आउर मोरलो पसु, खोदरा खोड़लो बीता चो रयदे।
35 कोचई बयला हुनचो घर-लग चो कोनी दुसर चो बयला के ढुसमलो किरता हुन मोरलो जाले, हुन जीव रलो बयला के बिकुन हुनचो पयसा के आदा-आदा बाटोत आउर मोरलो पसु के बले असनेचे बाटोत। 36 मानतर हुन बयला के आगतले ढुसमतो टकर आसे जाले, आउर हुनचो मालिक हुनके बांदुन नी संगाले, तेबे हुनचो मालिक के बयला चो पलटा बयला देउक ची पड़ेदे आउर मोरलो बयला मालिक चो होयदे।”