पलटा धरतो चो बारे ने नियम
22
“कोनी मनुक, बयला नोहले मेंडी के चोरुन खातो काजे मारले नोहले बिकले, गोटोक बयला चो पलटा पांच ठन बयला आउर गोटोक मेंडी चो पलटा चार ठन मेंडी देओ। 2 कोनी चोर, चोरतो बेरा धरा पड़ले आउर कोनी हुनके मोरते मारुन दिले, हुनचो लोउ चो दोख कोचई उपरे नी पड़ो।3 मानतर मंजन बेरा हुन धरा पड़ेदे आउर कोनी हुनके मोरते मारलोने, हुनचो लोउ चो दोख, मारु बीता उपरे पड़ेदे। हुन धरा पड़लो चोर, हुनचो करलो नोकसान के भोरुक ची पड़ेदे आउर नोकसान भोरतो काजे हुनचो लगे काईची नी रलोने, हुन चोर के बिकुन दियास। 4 चोरलो गाय-बयला, नोहले गदाहा, नोहले छेरी-मेंडी हुनचो लगे जीव मिरली जाले, हुन हुनचो दुय गुना भोरुन देओ।
5 कोनी आपलो गाय-बयलामन के दुसर चो बाड़ी-खिड़ी नोहले अंगुर-पदर ने चरायदे नोहले आपलो पसुमन के छुट छांडुन देयदे आउर हुनमन कोचई बेड़ा चो उबज के खादे, तेबे हुन पसुमन चो मालिक आपलो बेड़ा चो सबुले नंगत उबज, हुनके बोहड़ाउन देओ।
6 कोनी आईग धरालो आउर आईग, लाटा-बुटा ने धरते-धरते कोचई बाड़ी चो उबज के नोहले कोटार ने संगालो उबज नोहले बेड़ा-खाड़ा चो धान-पान के आईग धरली जाले, आईग धरालो मनुक हुनचो नोकसान भोरुन देओ।
7 कोनी, आपलो घर लग चो लोग लगे पयसा नोहले काई तीज के नंगत संगाउक देउन रले आउर हुनके कोनी चोरलोने, जेबे चोर धरा पड़ेदे, तेबे हुन नोकसान चो दुय-गुना भोरुन देओ। 8 मानतर चोर धरा नी पड़लो जाले, घर चो मालिक के महापरभु पुरे निया, जेचोले ए जानुक होयदे, हुन आपलो घर-लग चो लोग चो धन के चोरलोसे कि नाई।
9 बयला, गदाहा, छेरी-मेंडी, फटई-टुटई नोहले काईचे बरन चो तीज हाजुन रले, आउर हुनके दुय झन, ‘मोचो आय’ बलते रले, हुन दुनो के महापरभु पुरे निया, आउर जेके महापरभु दोसी मानेदे, हुन दुसर चो नोकसान चो दुय गुना भोरुन देओ।
10 कोनी आपलो बयला, गदाहा, मेंडी नोहले आउर काई पसु के चरातो काजे घर-लग चो लोग के सोपुन रदे, आउर हुन पसु मोरुन जायदे नोहले हुनके काई पायदे, नोहले कोनी नी दखतो बेरा, कोनी हुनके चोरुन नेयदे, 11 तेबे घर-लग चो माने, मय हुन पसु के काई नोकसान नी करलेसे बलुन, जहोवा चो पुरे किरिया खाओ। तेबे पसु चो मालिक ए गोट के सत मानो, आउर किरिया खाउ मनुक, मालिक के काई पलटा देउक नी लागे। 12 मानतर सते, हुनचो थान ले कोनी चोरुन नीलासोत जाले, हुन हुनचो मालिक के पलटा देओ। 13 आउर हुनके काई रान-जियाद धरुन खाउन रले, काई खादलो चीना दखाओ, तेबे हुनके काई पलटा देउक नी पड़े।
14 कोनी दुसर ले पसु मांगुन आनुन रयदे, आउर हुनचो मालिक नी रतो बेरा, हुनके काई पायदे नोहले मोरुन जायदे तेबे हुन हुनचो नोकसान भोरुन देओ। 15 मानतर हुनचो मालिक हुनचो संगे रलोने हुन जनावर के मांगुन आनलो बीता, नोकसान भोरुक नी पड़े। हुन पसु के भूती देउन बुता काजे आनुन रले, हुनचो भूती के ची देओ।”
जीवना काजे नियम
16 “कोनी मनुक, माहला नी होलोर, कोनी कुंआरी लेकी के फुसियाउन हुनचो संगे सोवलो जाले, हुनचो दाईज देउन हुनके बिया होओ। 17 मानतर लेकी चो बुआ हुन माने के आपलो बेटी देउक मन नी करलो जाले, हुन माने, हुन कुंआरी लेकी चो बुआ के दाईज कटार मोल देओ।
18 पांगन-नासन करु बायले के तुय जीव नी संगाव।
19 जोन कोनी पसु संगे देहें उगाड़ुन सोयदे, हुनके मोरते मारा।
20 जोन कोनी जहोवा महापरभु के छांडुन दुसर देव-धामी काजे जतरा चेगायदे, हुनके मोरते मारा।
21 परदेसिया के डाटा-टेवा नी करा आउर हुनके हिनस्ता बले नी करा, कसनबलले तुमी बले मिसर देस् ने परदेसिया रलास। 22 कोनी रांडी बायले के नोहले पोरटा-पिला के तकलीस नी दिया। 23 तुमी हुनमन के काई बरन चो तकलीस दिलास जाले, आउर हुनमन मोके गुहारले, तेबे सते मय हुनमन चो गुहार के सुनेंदे। 24 मय खुबे रीस होउन तुमके खांडा ले मोरते मारेंदे, जेचोले तुमचो बायलेमन, रांडीमन होदे आउर तुमचो पिलामन, पोरटा-पोरटीमन होदे।
25 तुचो संगे रतो, मोचो गरीब रयतमन ले कोकेई बले पयसा लागा ने देउन, सवकारमन असन बियाज नी धर†। 26 तुय केबई बले आपलो भाई-बंद चो फटई के गाहना ने संगाउ रले, बेर नी बसु-बसु हुनचो फटई के बोहड़ाउन देस; 27 कसनबलले हुनचो लगे ओड़तो काजे गोटकीचे फटई आसे जाले, फेर हुन काय के ओड़ुन सोयदे? जेबे हुन मोके गुहारेदे, तेबे मय हुनचो सुनेंदे, कसनबलले मय दया-करु जहोवा आय।
28 महापरभु के सराप नी देस आउर आपलो लोग चो मुखिया के बले नी सराप।
29 आपलो बेड़ा चो उबज आउर पाक-फर चो रस ले मोचो काजे चेगातोने, बेर नी कर। आपलो पईलात बेटा के बले मोके सोपुन देस।
30 असनेचे गाय-बयलामन आउर छेरी-मेंडीमन चो पईलात के बले मोके देस। सात दिन होओतले पिला माय संगे रओ। मानतर आठवां दिने तुय हुनके मोके सोपुन देस।
31 तुमी मोचो काजे पवितर होआ। एईकाजे रान-जियाद धरुन चीरलो पसु चो मास के नी खाहा। हुनके कुकुरमन के दियास।”