सत नियाव
23
“फंद गोट नी बिगराव। फंद गवई देउन ओधरमीमन चो पाटेया नी हो। 2 अडरा बुता करतो काजे लोगमन चो पाट-पाट नी जा आउर हुनमन बाटे होउन नियाव नसातो काजे फंद गवई नी देस। 3 गरीब-धुरीब चो नियाव-दाव ने बले पाटेया नी हो।4 तुय, तुचो बयरी चो बयला नोहले गदाहा के बाट भुलकलोके दखलीस जाले, हुनके हुनचो मालिक घरे नेउन देस। 5 फेर तुय आपलो बयरी चो गदाहा के बोजा ले चेपाय होलोर दखलीस जाले, तुचो मन नी होले बले, गदहा चो मालिक चो साहरा करुन गदहा के बचाव।
6 तुचो लोगमन ने जितरो गरीब-धुरीब आसोत हुनमन चो नियाव बेरा ओनियाव नी कर। 7 फंद नियाव ने नी भीड़ आउर दोख नोहलोर मनुक के आउर धरमी मनुक के मोरते नी मार, कसनबलले मय दुसट मनुक के धारनिक आय नी मानें। 8 घूस नी धर। कसनबलले घूस, दखतो बीता के बले काना बनाउआय आउर धरमीमन चो नियाव के पलटाउन देउआय।
9 परदेसिया के डाटा-टेवा नी कर। तुय तो परदेसिया चो मन चो गोट के जानीस, कसनबलले तुय बले मिसर देस् ने परदेसिया रलीस।
सातवां बरक आउर सातवां दिन
10 छय बरक आपलो बेड़ा-खाड़ा के कमाव आउर हुनचो उबज के रूंडाव। 11 मानतर सातवां बरक ने हुनके पड़ेया छांडुन देस। हुता काईची नी बुन, कसनबलले तुचो भाई-बंधमन चो मंजी रतो गरीब-धुरीबमन हुता आपनी होलो उबज के खाओत आउर बाचलो बिती के जनावरमन खाओत। आपलो अंगुर-डीरा आउर जयतून पदर संगे बले असने कर।
12 तुय छय दिन बुता-भयना कर, मानतर सातवां दिने बिसाव। जेचोले तुचो गाय-बयला आउर गदाहामन बले सुसताओत। कसनबलले तुचो घरे जनमलो कमेया-कमेयीनमन आउर परदेसियामन बले बिसाओत। 13 जितलो गोट मय तुके सांगलेसे, हुनके पक्का ले मान आउर दुसर देव-धामी चो नाव नी धर, बललोने तुचो टोंड ले हुनमन चो नाव सुनुक नी होओ।
रोजे बरक मानतो तिहारमन
14 रोजे बरक ने तीन हार मोचो काजे तिहार मान। 15 पईल तिहार, पाग नोहलो रोटी चो तिहार मान। मोचो हुकुम हिसाब असन अबीब मयना चो कबूल धरालो समया ने सात दिन होओतले पाग नोहलो रोटी खा। कसनबलले हुनी मयना ने तुय मिसर देस् ले निकरुन एउ रलीस। कोनी मोके, चुचाय हाथे थमना नी दखाओत। 16 दुसर तिहार, तुचो बेड़ा-खाड़ा ने बुनलो नवा-उबज काटतो बतर होले, कटई चो तिहार मान। तीसर तिहार, बरक चो सरासरी ने जेबे तुय कमालो पाक-फरमन रूंडा करसे, तेबे उबज रूंडातो तिहार मान। 17 तुचो सपाय मनुकमन रोजे बरक तीन हार महापरभु जहोवा चो पुरे एओत।
18 जतरा पसु चो लोउ के पाग बिती रोटी संगे नी चेगाव, आउर मोचो तिहार चो जतरा पसु चो बसील के बियान पाओतले नी संगाव।
19 आपलो भुंय चो नवा-उबज चो पईल-फर के आपलो महापरभु, जहोवा चो मंदिर ने आन। छेरी-पिला के हुनचो माय चो गोरस ने नी रांद।”
बायदामन आउर चेतानीमन
20 जहोवा बलेसे, “दख, मय गोटोक दूत के तुचो पुरे-पुरे पठायंदे। हुन, बाट ने तुचो रखेया करेदे आउर तुचो काजे तियार करलो ठाने अमरायदे। 21 हुनचो पुरे तुय चेत ने रा आउर हुनचो गोट मान। हुनचो बिरुद नी कर, नोहले हुन तुचो पाप के खेमा नी करेदे; कसनबलले मोचो नाव हुनचोने रयसे।
22 सते, तुय हुनचो गोट के मानले आउर मय जोन बलेंदे उसनेची करले, मय तुचो बिरुद करुमन चो बिरुद होयंदे, आउर तुचो बयरीमन चो बयरी होयंदे।
23 असन बरन ले मोचो दूत तुचो पुरे-पुरे जाउन तुके एमोरी, हित्ती, परिज्जी, कनानी, हिव्वी आउर जबूसी लोगमन थाने अमरायदे आउर मय हुनमन चो सत्यानास करेंदे। 24 हुनमन चो देव-धामीमन के डंडासरन नी कर, हुनमन चो सेवा-सासन बले नी कर आउर हुनमन असन नी हो। मानतर हुन देव-धामीमन चो मूरतमन के सत्यानास करुन देस आउर हुनमन चो देव-खमामन के गोंदा-गोंदा करुन देस। 25 तुय आपलो महापरभु जहोवाचेई आराधना कर, तेबे मय तुचो खादी-पीदी ने बर देयंदे आउर तुचो मंजी ले बेमार-अजार के गुचायंदे। 26 तुचो देस् ने, कोनी बले पेटेहारिन बायले चो पिला नी छिंयेदे आउर कोनी बले बांझीन नी होदे। मय तुचो उमर के बड़ायंदे। 27 जोन लोगमन चो मंजिगता तुय जासे, मय हुनमन चो मन के भुलकायंदे, आउर हुनमन के डरायंदे, आउर तुचो सपाय बयरीमन पाट करुन परादे। 28 मय तुचोले आगे बीस बिती टेकारमन के पठायंदे, जोन हिव्वी, कनानी आउर हित्ती लोगमन के तुचो पुरे ले लापी खेददे। 29 मय हुन लोगमन के तुचो मंजिगता ले गोटकी बरक ने नी निकरायें नोहले देस् चिमचामनाय होयदे, आउर रान-जियादमन गनती ने बाड़ती करदे आउर तुके तकलीस देदे। 30 तुय गनती ने बाड़ती करुन, देस् के आपलो हक ने करतले, मय हुनमन के खिंडिक-खिंडिक करुन तुचो पुरे ले निकरायंदे। 31 मय तुचो देस् चो संद के, लाल समदूर ले धरुन पलिस्तीमन चो समदूर लग ले आउर टंग-टंगा भाटा ले धरुन फरात महानंदी लग ले बनायंदे। मय हुन देस् चो लोगमन के बले तुचो हक ने करुन देयंदे। तुय हुनमन के आपलो पुरे ले खेदसे। 32 तुय हुनमन संगे नोहले हुनमन चो देव-धामी संगे काई बायदा नी कर। 33 हुनमन तुचो देस् ने नी रओत नोहले हुनमन तुके मोचो बिरुद ने पाप करादे। तुय हुनमन चो देव-धामी के सेवा-सासन करले, तुचो काजे फांदा होयदे।”