जहोवा आउर इसराएलिमन चो मंजी बायदा
24
फेर जहोवा, मोसा के बललो, “तुय, हारून, नादाब, अबीहू आउर इसराएलिमन चो सतर झन धरम-सियानमन संगे डोंगरी उपरे जहोवा लगे इआ आउर लापी ले डंडासरन करा। 2 मोसा एकलाय जहोवा लगे एयदे, मानतर दुसर कोनी नी एओत। दुसर लोगमन तुचो संगे डोंगरी उपरे नी एओत।”3 मोसा लोगमन लगे जाउन जहोवा चो सपाय गोट आउर नीती-नियम सुनालो, तेबे सपाय लोगमन गोटकी संगे बलला, “जितलो गोट जहोवा सांगलोसे, आमी हुन सपाय गोट के मानवां।” 4 तेबे मोसा जहोवा चो सपाय बचन के लिखलो आउर बड़े बियाने उठुन डोंगरी खाले गोटोक बेदी बनालो, आउर इसराएल चो बंस चो गनती हिसाब ले बारा ठन खमामन गाड़लो। 5 तेबे हुन कोनी-कोनी इसराएली जुवानमन के पठालो आउर हुनमन जहोवा काजे होम-जतरा आउर बयलामन के मिला-मिसा जतरा चेगाला। 6 मोसा आदो लोउ के बटका ने धरलो आउर आदो लोउ के बेदी उपरे छीचलो। 7 फेर मोसा, बायदा चो किताप के धरुन लोगमन के पढ़ुन सुनालो, तेबे लोगमन बलला, “जहोवा जोन बले बललोसे, उसनेचे आमी करवां आउर हुनचो हुकुम के मानवां।” 8 तेबे मोसा लोउ धरुन लोगमन उपरे छीचलो आउर हुनमन के बललो, “दखा, ए हुन बायदा चो लोउ आय जेके जहोवा ए सपाय गोटमन ले तुमचो संगे बायदा करलोसे।”
9 तेबे मोसा, हारून, नादाब, अबीहू आउर इसराएलिमन चो सतर धरम-सियानमन संगे डोंगरी उपरे चेगलो। 10 हुनमन, इसराएलिमन चो महापरभु चो दरसन करला, हुनचो पांय खाले नीलमनी पकना बसालोर असन रये, आउर हुन ठान उपरपुर असन छुक-छुका दखा देते रये। 11 इसराएलिमन चो मुखियामन, महापरभु के दखला*। तेबले बले हुनमन चो जीव बाचली आउर हुनमन हुता खादी-पीदी करला।
मोसा सिनाई डोंगरी उपरे जहोवा के भेटतोर
12 जहोवा, मोसा के बललो, “मोचो लगे डोंगरी उपरे आव आउर हुताय रा। मय तुके पकना चो पटी ने लिखलोर मोचो नियम-कानुन आउर हुकुममन के देयंदे, तुय एके हुनमन के सिखाव।” 13 तेबे मोसा आपलो साहरा करु जहोसू संगे महापरभु चो डोंगरी ने चेगलो। 14 हुन, धरम-सियानमन के असन बललो, “जिदलदांय ले आमी तुमचो लगे बोहड़ुन नी एउं, तुमी एताय ची आमचो बाट दखते राहा। दखा, हारून आउर हूर तुमचो मुखिया आसोत, कोचई बले काई नियाव-दाव होले हुनमन लगे जाहा।”
15 मोसा डोंगरी उपरे चेगलो, आउर डोंगरी के बादरी ढाकली। 16 जहोवा चो मयमा उजर सिनाई डोंगरी ने दखा दिली आउर छय दिन होओतले हुता बादरी ढाकुन रये। सातवां दिने बादरी भीतरले जहोवा मोसा के हागदिलो। 17 इसराएलिमन चो नंजर ने जहोवा चो मयमा-उजर डोंगरी उपरे भड़-भड़तो आईग असन दखा देते रये। 18 तेबे मोसा बादरी भीतर ले डोंगरी उपरे चेगलो, आउर हुन डोंगरी उपरे चालीस दिन आउर चालीस राती रलो।