तम्बु बनातो काजे भेंट आनतोर
25
जहोवा मोसा के बललो, 2 “इसराएलिमन के असन बल, हुनमन मोचो काजे भेंट आनोत। जितलो लोग आपलो मन-इछा ले भेंट आनदे हुनीमन ले भेंट धर। 3 हुनमन ले भेंट ने ए तीजमन : सोन, रूपा, कांस, 4 नीलिया, बांगा रंग आउर लाल रंग चो ऊन, मकमल फटई आउर बोकड़ा रोंआ, 5 नंगत सुकालो मेंडा-खाला, सबुले नंगत खाला*, बमूर रूक, 6 दीया बारतो काजे तेल, अबिसेक तेल काजे आउर नंगत बास देतो धूप काजे मसला 7 एपोद आउर छातीपटा काजे गोमेदक* पकना आउर मनी-पकनामन के धर। 8 हुनमन मोचो काजे गोटोक पवितर ठान बनाओत कि मोके हुनमन चो मंजी रउक होओ। 9 मोचो दखालो घटन हिसाब ले, मोचो रतो ठान आउर हुनचो सपाय जाय-जमकमन के बनाव।बायदा चो डोली
10 बमूर रूक चो गोटोक डोली बनाव, हुन ढाई हाथ लाम, डेढ़ हाथ ओसार आउर डेढ़ हाथ डेंग रओ। 11 हुनके भीतरे-बाहरे निरवा सोन ले मड़ाउन देस आउर हुनचो चारो-कुती सोन चो पटी बनाव। 12 डोली चो चारो पांयमन ने लगातो काजे सोन चो चार ठन खाड़ुमन बनाव, हुनचो गोटोक पाटे दुय ठन खाड़ुमन आउर दुसर पाटे दुय ठन खाड़ुमन लगाव। 13 बमूर रूक चो डंडेयामन बनाव आउर हुनमन के सोन ले मड़ाउन देस। 14 डोली चो दुनो पाट चो खाड़ुमन ने डंडेयामन के जोंगड़ाव, जेचोले हुनके बोउक होओ। 15 हुन डंडेयामन के डोली ले केबई नी निकराहा। हुनमन डोली चो खाड़ुमन ने ची रओत। 16 मय नियम-कानुन लिखलो पकना चो पटीमन तुके देयंदे, हुनके डोली भीतरे संगाव। 17 फेर डोली काजे निरवा सोन ले गोटोक ढाकना* बनाव, हुन ढाई हाथ लाम आउर डेढ़ हाथ ओसार रओ। 18 फेर तुय, सोन ले कारिगिरी करुन दुय ठन करूबमन के बनाव; हुनमन के ढाकना उपरे दुनो पाट रेटे-रेटे लगाव। 19 गोटोक करूब के ढाकना चो गोटोक रेटे आउर दुसर करूब के दुसर रेटे लगाव। तुय, डोली चो ढाकना के आउर हुनचो रेटे चो करूबमन के सोन चो गोटकी गोंदा ले बनाव। 20 दुनो करूबमन, उपर ले आपलो पाटकी पसारुन डोली चो ढाकना के आड़ करुन रओत। हुन करूबमन चो थमना गोटोक-दुसर के दखते रओ आउर ढाकना बाटे रओ। 21 हुन ढाकना के डोली उपरे मंडाव आउर जोन नियम-कानुन लिखलो पकना चो पटी, मय तुके देयंदे हुनके हुन डोली भीतरे संगाव। 22 बायदा चो डोली चो ढाकना उपर चो दुनो करूबमन चो मंजार ले मय तुके भेट होयंदे। फेर इसराएलिमन काजे जितलो हुकुम मय तुके देतोर होयदे हुन सपाय चो बारे ने मय तुचो संगे हुताय ले गोटेयायंदे।
पवितर रोटी संगातो टेबुल
23 फेर तुय, बमूर रूक चो गोटोक टेबुल बनाव। हुन दुय हाथ लाम, गोटोक हाथ ओसार आउर डेढ़ हाथ डेंग रओ। 24-25 टेबुल के निरवा सोन ले मड़ाउन हुनचो चारो-कुती सोन चो पटी बनाव। हुनचो उपरे चारो-कुती चार अंडकी ओसार चो उबा पटरी बनाव आउर हुन पटरी चो चारो-कुती सोन चो पटी बनाव। 26-27 सोन चो चार ठन खाड़ुमन बनाउन टेबुल चो चारो पांयमन चो कोनामन ने हुनमन के लगाव। हुन खाड़ुमन उबा पटरी लगे ची रओ। खाड़ुमन ने डंडेयामन जोंगड़ाउन टेबुल के बोउक होओ। 28 फेर बमूर रूक चो डंडेयामन बनाउन हुनचो उपरे सोन मड़ाव। हुनीमन ले टेबुल के बोउक होओ। 29 हुनचो परात, धूप गंधातो आरतीमन, आउर पीदी-जतरा रिकातो कसलामन आउर बटकामन के निरवा सोन ले बनाव। 30 मोचो पुरे टेबुल उपरे भेंट चो पवितर रोटी* रोजे संगाहा।
सोन चो लामन
31 फेर निरवा सोन ले गोटोक लामन बनाव। हुनचो पेंदी आउर डांडी के कारिगिरी करुन बनाव; हुनचो फूल-ढेटीमन, फूल-गठमन आउर फूल-केरीमन, ए सपाय के सोन चो गोटकी गोंदा ले बनाव। 32 हुनचो छय ठन खेंदीमन बनाव। हुनचो गोटोक पाटे तीन ठन खेंदीमन आउर दुसर पाटे तीन ठन खेंदीमन रओ। 33 गोटोक-गोटोक खेंदी ने बादाम फूल असन तीन-तीन ठन फूल-ढेटीमन, फूल-गठमन आउर फूल-केरीमन बनाव। लामन चो छय ठन खेंदीमन ने असने बरन ले बनाव। 34 लामन चो डांडी ने, बादाम फूल असन चार ठन फूल-ढेटीमन, फूल-गठमन आउर फूल-केरीमन रओ। 35 लामन चो छय खेंदीमन ने, दुय-दुय खेंदी-जोड़ खाले गोटोक-गोटोक फूल-गठ रओ। 36 हुनचो फूल-गठमन आउर खेंदीमन के निरवा सोन चो गोटकी गोंदा ले कारिगिरी करुन बनाव। 37 लामन काजे सात ठन दीयामन बनाव। एमन के असन संगाव कि लामन चो पुरे उजर पड़ो। 38 दिया चो बाती के जतनातो जाकमन बललोने, कतरनीमन आउर सुपलीमन के निरवा सोन ले बनाव। 39 लामन आउर हुनचो सपाय तीज के एक कोड़ी पंदरा किलो निरवा सोन ले बनाव। 40 आउर धियान देउन ए सपाय तीजमन के हुनी घटन हिसाब ले बनाव जसन मय, तुके डोंगरी ने दखालोर आसे।”