मिला-मिसा तम्बु
26
तुय, मिला-मिसा तम्बु काजे दस ठन पड़दामन बनाव। ए पड़दामन के नीलिया, बांगा रंग आउर लाल रंग चो ऊन आउर तागलो सूत चो मकमल फटई ले बनाव; तुय हुनमन थाने करूबमन चो छापा के नंगत कारिगिरी ले गुथुन बनाव। 2 गोटोक-गोटोक पड़दा, एक कोड़ी आठ हाथ* लाम आउर चार हाथ ओसार रओ; असने सपाय पड़दामन गोटकी कटार चो रओ। 3 पांच ठन पड़दामन के गोटकी संगे जोड़ आउर असने बाचलो पांच ठन पड़दामन के गोटकी संगे जोड़। 4 ए जोड़लो पईल पड़दामन चो टोक ने नीलिया रंग चो सूत ले फांदामन बनाव, उसनेची जोड़लो दुसर पड़दामन चो टोक ने बले नीलिया रंग चो सूत ले फांदामन बनाव। 5 तुय, पईल जोड़लो पड़दा चो टोक ने दुय कोड़ी दस फांदामन बनाव, उसनेची दुसर जोड़लो पड़दा चो टोक ने बले दुय कोड़ी दस फांदामन बनाव, आउर जोड़लो दुनो पड़दामन चो फांदामन गोटोक-दुसर चो पुरे रओ। 6 तुय, सोन चो दुय कोड़ी दस ओकसीमन बनाव आउर पड़दामन चो फांदामन के ओकसीमन संगे जोड़ुन गोटकी बनाव कि हुन सपाय मिसुन मिला-मिसा तम्बु होओ।7 तुय, मिला-मिसा तम्बु उपरे ढाकतो काजे बोकड़ा रोंआ चो इगारा ठन पड़दामन बनाव। 8 गोटोक-गोटोक पड़दा एक कोड़ी दस हाथ लाम आउर चार हाथ ओसार रओ। असने सपाय इगारा ठन पड़दामन गोटकी कटार चो रओ। 9 पांच ठन पड़दामन के गोटकी संगे जोड़, फेर बाचलो छय ठन पड़दामन के बले गोटकी संगे जोड़। मानतर छटवां पड़दा के दुय-दुना करुन तम्बु चो पुरे ओराव। 10 फेर तुय गोटकी संगे जोड़लो पांच ठन पड़दामन चो टोक ने दुय कोड़ी दस फांदामन बनाव आउर जोड़लो दुसर छय ठन पड़दामन चो टोक ने दुय कोड़ी दस फांदामन बनाव।
11 फेर कांस चो दुय कोड़ी दस ठन ओकसीमन बनाव आउर पड़दामन चो फांदामन के ओकसीमन संगे जोड़ुन गोटकी बनाव कि हुन सपाय मिसुन गोटकी रओ। 12 फेर पड़दामन चो बाचलो आदो भाग मिला-मिसा तम्बु चो पाटकुती ओरालोर रओ। 13 मिला-मिसा तम्बु के ढाकतो काजे, पड़दामन चो बाचलो भाग, गोटोक हाथ लाम ए पाट आउर गोटोक हाथ लाम हुन पाट ओराय होलोर रओ। 14 फेर तुय, मिला-मिसा तम्बु काजे नंगत सुकालो मेंडा-खाला चो गोटोक ढाकनी बनाव आउर हुन ढाकनी उपरे ढाकतो काजे सबुले नंगत खाला चो आउर गोटोक ढाकनी बनाव।
मिला-मिसा तम्बु के उबातो काजे लागतो तीजमन
15 तुय, मिला-मिसा तम्बु के उबातो काजे बमूर रूक चो फारामन बनाव। 16 ए फारामन, दस हाथ लाम आउर डेढ़ हाथ ओसार रओ। 17 ए फारामन के, गोटोक-दुसर ले जोड़तो काजे हुनमन चो खाले दुय-दुय ठन खाचामन बनाव; असने बरन ले मिला-मिसा तम्बु चो सपाय फारामन ने खाचामन बनाव। 18 मिला-मिसा तम्बु चो बेर-उदिया उजा बाट काजे एक कोड़ी फारामन; 19 आउर हुन एक कोड़ी फारामन के खाले बसातो काजे रूपा चो दुय कोड़ी बयटीमन बनाव। पईल फारा चो दुनो खाचामन काजे दुय ठन बयटीमन, आउर दुसर फारा चो दुनो खाचामन काजे दुय ठन बयटीमन बनाव। 20 मिला-मिसा तम्बु चो दुसर पाट, बेर-उदिया डेबरी बाट काजे एक कोड़ी फारामन बनाव, 21 आउर हुनमन काजे रूपा चो दुय कोड़ी बयटीमन बनाव, गोटोक-गोटोक फारामन खाले दुय-दुय ठन बयटीमन रओ; 22 मिला-मिसा तम्बु चो पाटकुती, बेर बुड़ती बाट काजे छय ठन फारामन बनाव। 23 आउर मिला-मिसा तम्बु चो पाटकुती चो कोनामन काजे दुय ठन फारामन बनाव। 24 ए फारामन खाले ले अलगे रयदे; मानतर दुनो फारामन चो टीपमन गोटोक चूड़ा संगे जुड़ुन रयदे; दुनो कोनामन चो फारामन उसनेची जुड़ुन रओ; हुन दुनो, कोनामन होदे। 25 आउर आठ ठन फारामन आउर हुनमन काजे सोला ठन रूपा चो बयटीमन बनाव; गोटोक फारा काजे दुय ठन बयटीमन, आउर दुसर फारा काजे दुय ठन बयटीमन।
26 फेर तुय, मिला-मिसा तम्बु चो गोटोक पाट चो फारामन काजे बमूर रूक चो पांच ठन डांडीमन बनाव। 27 हुनचो दुसर पाट चो फारामन काजे बले पांच ठन डांडीमन आउर हुनचो बेर-बुड़ती बाट चो फारामन काजे बले पांच ठन डांडीमन बनाव। 28 मंजिगता चो डांडी, फारामन चो आदो डेंग ने तम्बु चो गोटोक टोक ले धरुन दुसर टोक लगले अमरो। 29 फेर फारामन के सोन ले मड़, आउर हुनचो डांडीमन के समालतो काजे सोन चो खाड़ुमन बनाव आउर हुन डांडीमन के बले सोन ले मड़। 30 जसन तुके डोंगरी ने दखालोर रये, उसने तुय मिला-मिसा तम्बु के उबाव।
मिला-मिसा तम्बु काजे पड़दामन बनातोर
31 फेर तुय, नीलिया, बांगा रंग आउर लाल रंग चो ऊन आउर तागलो सूत चो मकमल फटई ले गोटोक भीतर-पड़दा बनाव; हुन भीतर-पड़दा ने करूबमन चो छापा के नंगत कारिगिरी ले गुथुन बनाव। 32 फेर पड़दा के बमूर रूक चो चार ठन डेरीमन ने ओराव, जेके सोन मड़लोर आसे। हुन पड़दा चो ओकसीमन सोन चो बनालोर रओ आउर हुनचो डेरीमन रूपा चो चार ठन बयटीमन ने उबा रओ। 33 भीतर-पड़दा के ओकसीमन ने ओराव आउर बायदा चो डोली के भीतरे आनुन, हुनी भीतर-पड़दा चो पाटकुती संगाव। असन बरन ले भीतर-पड़दा, पवितर ठान के, सबुले पवितर ठान* ले अलग करेदे। 34 फेर सबुले पवितर ठाने, बायदा चो डोली उपरे ढाकना के संगाव। 35 आउर भीतर-पड़दा चो बाहरे तम्बु चो बेर-उदिया डेबरी बाटे टेबुल मंडाव; आउर हुन टेबुल चो पुरे, बेर उदिया उजा बाटे, लामन के मंडाव।
36 मिला-मिसा तम्बु चो बाट-डेवना काजे नीलिया, बांगा रंग आउर लाल रंग चो ऊन आउर तागलो सूत चो मकमल फटई ले गोटोक पड़दा बनाव आउर हुता छापा गुथलोर रओ। 37 आउर बाट-डेवना पड़दा काजे बमूर रूक* चो पांच ठन खमामन बनाव आउर हुनमन के सोन ले मड़; हुनचो ओकसीमन के सोन ले बनाव, आउर हुनचो काजे कांस चो पांच ठन बयटीमन बनाव।