बेदी बनातोर
27
बमूर रूक चो पांच हाथ लाम आउर पांच हाथ ओसार गोटोक बेदी बनाव। हुन बेदी, तीन हाथ डेंग आउर चार-खुटिया रओ। 2 बेदी चो चारो कोना ने चार ठन सींगमन बनाव, हुन सींगमन के आउर बेदी के रूक चो गोटकी गोंदा ले बनाव आउर हुनचो उपरे कांस मड़। 3 बेदी चो लाकड़ी संगातो काजे घघरामन, रापामन, तगाड़ीमन, काटामन आउर झीकरीमन बनाव। ए सपाय जमक के कांस चो बनाव। 4 हुनचो काजे कांस चो गोटोक जाली बिती झंझरी बनाव; आउर हुन झंझरी चो चारो कोनामन ने कांस चो चार ठन खाड़ुमन बनाव। 5 हुन झंझरी के बेदी भीतरे आदो डेंग मंजारे लगाव। 6 बेदी उठातो काजे बमूर रूक चो डंडेयामन बनाउन हुनचो उपरे कांस मड़; 7 डंडेयामन के खाड़ुमन ने जोंगड़ाव। कसनबलले बेदी बोअतो बेरा डंडेयामन बेदी चो दुनो पाट रओत। 8 मय जसन तुके डोंगरी ने दखाउन रये, उसने तुय फारामन ले पोलका बिती बेदी बनाव।मिला-मिसा तम्बु चो दुआर
9 फेर तुय मिला-मिसा तम्बु चो दुआर बनाव। हुनचो बेर-उदिया उजा बाट चो दुआर काजे तागलो सूत चो मकमल फटई चो सव हाथ लाम पड़दा बनाव; 10 हुन पड़दा काजे एक कोड़ी खमामन आउर कांस चो एक कोड़ी बयटीमन बनाव। खमामन काजे रूपा चो ओकसीमन आउर पाटीमन बनाव। 11 असनी बरन ले बेर-उदिया डेबरी बाट चो दुआर काजे सव हाथ लाम पड़दा बनाव। एचो काजे एक कोड़ी खमामन बनाव जेचो थाने कांस चो एक कोड़ी बयटीमन रओ। खमामन काजे रूपा चो ओकसीमन आउर पाटीमन बनाव। 12 बेर-बुड़ती बाट चो दुआर काजे दुय कोड़ी दस हाथ ओसार पड़दामन बनाव। हुनचो काजे दस ठन खमामन बनाव जेचो दस ठन बयटीमन रओ। 13 बेर-उदिया बाट चो दुआर काजे दुय कोड़ी दस हाथ ओसार पड़दा बनाव। 14 मिला-मिसा तम्बु ने, दुआर-देवड़ी चो गोटोक पाट चो पड़दा, पंदरा हाथ लाम रओ, हुनचो काजे तीन ठन खमामन आउर तीन ठन बयटीमन रओ। 15 आउर दुसर पाट काजे बले पंदरा हाथ लाम पड़दा बनाव। हुनचो काजे बले तीन ठन खमामन आउर तीन ठन बयटीमन रओ। 16 तम्बु चो बाट-डेवना काजे नीलिया, बांगा रंग आउर लाल रंग चो ऊन आउर तागलो सूत चो मकमल फटई ने बाना गुथुन एक कोड़ी हाथ लाम चो गोटोक पड़दा बनाव। एचो काजे चार ठन खमामन आउर चार ठन बयटीमन रओ। 17 दुआर चो चारो कुती चो सपाय खमामन रूपा चो पाटीमन ले जुड़ुन रओ, हुनचो ओकसीमन रूपा चो आउर बयटीमन कांस चो रओ। 18 दुआर सव हाथ लाम आउर पचास हाथ ओसार रओ। हुनचो पड़दामन पांच हाथ डेंग रओ आउर हुन पड़दामन के तागलो सूत चो मकमल फटई ले बनाव, आउर खमामन चो बयटीमन कांस चो रओ। 19 मिला-मिसा तम्बु चो सपाय खुटीमन आउर दुआर चो सपाय खुटीमन, बरन-बरन चो बुतामन चो सपाय नकी-भंडवामन, ए सपाय के कांस चो बनाव।
लामन चो दखा-रखा
20 “फेर तुय इसराएलिमन के हुकुम देउन बल, ‘कांडुन निकरालो निरवा जयतून तेल के दीया बारतो काजे मोचो लगे आनोत, जेचोले दीया अमदेया बरते रओ। 21 मिला-मिसा तम्बु ने बायदा चो डोली पुरे चो भीतर-पड़दा चो बाहरे, सांज ले धरुन बियान पाओतले, हारून आउर हुनचो बेटामन जहोवा पुरे दीयामन के बराउन संगाओत। ए नीती-नियम, इसराएलिमन चो पीड़ी-पीड़ी काजे अमदेया बनुन रओ’।”