पुजारीमन चो पवितर फटई
28
तुय, इसराएलिमन ले आपलो भाई हारून आउर हुनचो बेटामन नादाब, अबीहू, एलीआजर आउर ईतामार के तुचो लगे आन कि हुनमन मोचो काजे पुजारी सेवा-बुता करोत। 2 तुय आपलो भाई हारून काजे मान लाईक आउर सुंदर दखतो पवितर फटईमन बनाव। 3 जितलो कारिगिरी करुमन के मय, बुद-गियान ले भोरलेसे, हुनमन के तुय बल: हारून के पुजारीपन सोपतो काजे, हुनचो काजे पवितर फटई बनाओत कि हुन मोचो काजे पुजारी सेवा-बुता करुक सको। 4 जोन जोन फटई हुनचो काजे बनातोर आय हुनमन ए आय: छातीपटा, एपोद, बागा, चोंगा, पागा आउर करांडपटा। ए पवितर फटईमन तुचो भाई हारून आउर हुनचो बेटामन काजे बनाव कि हुनमन मोचो काजे पुजारी सेवा-बुता करोत।5 हुनमन, फटईमन के सोन चो तांत, नीलिया, बांगा रंग आउर लाल रंग चो ऊन आउर मकमल फटई ले बनाओत।
एपोद
6 एपोद के, सोन चो तांत†, नीलिया, बांगा रंग आउर लाल रंग चो ऊन आउर तागलो सूत चो मकमल फटई ले नंगत कारिगिरी करुन बनाव। 7 एपोद चो दुनो खांद के जोड़तो काजे दुय ठन खांद-पटीमन बनाव कि हुन नंगत ले जुड़ुन रओ। 8 एपोद के बांदतो करांड-पटा के बले, एपोद असन सोन चो तांत, नीलिया, बांगा रंग आउर लाल रंग चो ऊन आउर तागलो सूत चो मकमल फटई ले नंगत कारिगिरी करुन बनाव। 9 फेर दुय ठन गोमेदक* मनी-पकनामन धरुन हुता इसराएल चो बेटामन चो नाव गोदुन लिख। 10 इसराएल चो बेटामन चो जनम हिसाब ले, गोटोक मनी-पकना ने छय नाव आउर दुसर मनी-पकना ने छय नाव गोदुन लिख। 11 मनी-पकना गोदुमन, जसन कारिगिरी करुमन मोहर-मूंदी ने छापा गोदुआत, उसनेची ए दुनो पकनामन ने इसराएल चो बेटामन चो नाव गोद आउर हुन मनी-पकनामन के सोन चो खाचामन ने बसाव। 12 फेर ए दुनो मनी-पकनामन के एपोद चो खांद-पटीमन ने लगाव कि ए इसराएलिमन चो सूरता करातो पकना होयदे। हारून, हुनमन चो नाव के आपलो खांदे जहोवा चो पुरे सूरता काजे लगाउन रओ। 13 फेर तुय सोन चो खाचामन बनाव। 14 आउर डोरी गातलो असन निरवा सोन चो दुय ठन सिकरीमन बनाव आउर ए सिकरीमन के खांद-पटा चो सोन चो खाचामन ने बसाव।
छातीपटा
15 फेर नंगत कारिगिरी ले बड़े-पुजारी काजे नियाव चो छातीपटा* बनाव। हुनके एपोद चो असन सोन चो तांत, नीलिया, बांगा रंग आउर लाल रंग चो ऊन आउर तागलो सूत चो मकमल फटई ले बनाव। 16 हुन चार कुटिया आउर दुय दुना रओ। हुन गोटोक-गोटोक बीता लाम आउर ओसार रओ। 17 हुता चार ओरी हीरा-पकनामन के बसाव, पईल ओरी ने: मनी, पीतमनी आउर मरकत, 18 दुसर ओरी ने: पुखराज, नीलमनी आउर हीरा, 19 तीसर ओरी ने: धूमरकांत, लालमनी आउर जाकुत। 20 चवथा ओरी ने: पेरोज, गोमेदक आउर जसब, ए सपाय के सोन चो खाचामन ने बसाव। 21 इसराएल चो बेटामन चो नाव हिसाब ले बारा ठन मनी-पकना रओ, हुता हुनमन चो नाव के छापा गोदलो असन गोटोक-गोटोक मनी-पकना ने गोटोक-गोटोक बंस चो नावमन के कारिगिरी ले गोदुन लिखा। 22 फेर छातीपटा काजे निरवा सोन ले डोरी गातलो असन सिकरीमन के बनाव; 23 आउर छातीपटा काजे सोन चो दुय ठन चूड़ीमन बनाव, ए दुनो चूड़ीमन के छातीपटा चो दुनो टोकमन ने लगाव। 24 सोन ले गातलो दुनो सिकरीमन के छातीपटा चो टोकमन चो दुनो चूड़ीमन ने लगाव; 25 आउर हुन दुनो सिकरीमन चो टीपमन के एपोद चो दुनो खांद-पटीमन पुरे चो दुनो खाचा ने फसाउन लगाव। 26 फेर सोन चो दुय ठन चूड़ीमन बनाव आउर छातीपटा खाले चो दुनो टोकमन ने भीतर पाटे एपोद लगे लगाव। 27 आउर सोन चो दुय ठन चूड़ीमन बनाउन दुनो खांद-पटीमन पुरे खाले पाट, एपोद चो गुतलो करांड पटा चो उपरे लगाव। 28 आउर छातीपटा चो खाले पाट चो चूड़ीमन संगे एपोद चो चूड़ीमन ने नीलिया सुतरी संगे बांद। जेचोले छातीपटा, एपोद चो करांडपटा उपरे रओ। असन बरन ले छातीपटा एपोद ले अलग होउक नी सको। 29 जेबे-जेबे हारून पवितर ठान ने ओलेदे, तेबे-तेबे हुन आपलो छाती उपरे इसराएल चो बेटामन चो नाव रलो नियाव चो छातीपटा के पींदुन ओलो। जेचोले जहोवा चो पुरे हुनमन चो सूरता अमदेया होते रओ। 30 तुय नियाव चो छातीपटा भीतरे ऊरीम आउर तुमीम* संगाव आउर जेबे-जेबे हारून जहोवा लगे एयदे तेबे-तेबे हुनमन, हुनचो छाती पटा भीतरे रओ। असन बरन ले हारून, इसराएलिमन चो नियाव के अमदेया जहोवा चो पुरे आपलो छाती ने ओराउन रओ।
पुजारीपन चो दुसर फटईमन
31 फेर एपोद चो बागा के अबगो नीलिया रंग चो बनाव। 32 हुनके असन बनाव, मुंड ओलातो काजे हुनचो मंजारे भोंगा रओ, हुन भोंगा चो भोंवरक धड़ी गुथुन बनाव जेचोले हुन चीरी नी होओ। 33 हुन बागा खाले चो भोंवरक नीलिया, बांगा रंग आउर लाल रंग चो ऊन ले अनार पाकमन गुथुन बनाव आउर एमन चो मंजारे भोंवरक सोन चो घंटीमन बनाव। 34 बललोने, गोटोक सोन चो घंटी आउर गोटोक अनार पाक, फेर गोटोक सोन चो घंटी आउर गोटोक अनार पाक। 35 हारून हुन बागा के, पुजारी सेवा करतो बेरा मोचो पुरे पींदो आउर जेबे-जेबे हुन पवितर ठान ने मोचो पुरे एयदे, नोहले बाहरे निकरेदे, तेबे-तेबे हुन घंटी बाजतो राग सुना देओ, नोहले हुन मोरेदे।
36 फेर निरवा सोन चो गोटोक पटी कारिगिरी करुन बनाव आउर छापा गोदतो असन हुता, “जहोवा काजे पवितर” गोदुन लिख। 37 तुय, हुनके नीलिया सुतरी संगे बांद आउर हुन पागा चो पुरे रओ। 38 हुन सोन चो पटी हारून चो कपारे रओ। जेबे इसराएलिमन पवितर मानुन जितलो बले पवितर तीजमन के भेंट चेगादे, तेबे हुन पवितर चेगावा ने काई दोख होलोने, हुनचो दोख के, हारून के खुदे भोगुक पड़ेदे। एईकाजे हुन सोन चो पटी अमदेया हारून चो कपारे रओ कि हुनचो चेगावामन ले जहोवा हरिक होओ।
39 चोंगा के मकमल फटई ले बनाव, आउर मकमल फटई ले गोटोक पागा बले बनाव आउर गोटोक करांडपटा के नंगत कारिगरी ले बाना गुथुन बनाव।
40 हारून चो बेटामन काजे बले चोंगामन, करांड-पटामन आउर पागामन बनाव। ए फटई हुनमन चो मान लाईक आउर सुंदर दखतो काजे होओ। 41 तुय आपलो भाई हारून आउर हुनचो बेटामन के एई फटईमन पींदाउन हुनमन चो अबिसेक कर, आउर नीति-नियम हिसाब ले पुजारीपन देतो काजे हुनमन के पवितर कर। जेचोले हुनमन मोचो पुजारी सेवा-बुता करदे। 42 हुनमन काजे मकमल फटई चो जंगियामन बनाव, हुन करांड ले मांडी इतलो रओ, जेचोले हुनमन चो नांगा देहें नी दखा देओ। 43 जेबे-जेबे हारून नोहले हुनचो बेटामन मिला-मिसा तम्बु ने ओलदे नोहले पवितर ठान ने सेवा करतो काजे बेदी लगे जादे, तेबे-तेबे हुनमन जंगियामन पींदुन रओत नोहले हुनमन आपलो दोख भोगुन मोरुन जादे। ए हारून आउर हुनचो थर काजे अमदेया चो नीती-नियम होओ।