हारून आउर हुनचो बेटामन के अबिसेक करतोर
29
तुय, हारून आउर हुनचो बेटामन के पवितर कर कि हुनमन मोचो काजे पुजारी सेवा-बुता करोत। तुय गोटोक बाछा आउर दोख नोहलोर दुय ठन मेंडामन धर। 2 पाग नोहलो रोटी, तेल संगे चटकलो पाग नोहलो पूड़ी आउर तेल घसलो पाग नोहलो पापड़ी बले धर। एमन के गउं चो नंगत पिसान ले बनाव। 3 ए सपाय के गोटोक टुकना ने धरुन, बाछा आउर दुनो मेंडामन संगे मोचो लगे आन। 4 फेर हारून आउर हुनचो बेटामन के मिला-मिसा तम्बु दुआरे आन आउर पानी ले आंग धोआउन देस। 5 फेर तुय, हुन पवितर फटईमन धरुन जा आउर हारून के चोंगा, बागा, एपोद आउर छातीपटा के पींदाव आउर नंगत कारिगरी ले बाना गुतलो करांड-पटा बांधुन देस। 6 हुनचो मुंडे पागा बांद आउर पागा ने पवितर किरोटी के पींदाव। 7 पाछे अबिसेक चो तेल के हुनचो मुंडे रिकाउन हुनके अबिसेक कर। 8 एचो पाछे हुनचो बेटामन के लगे आनुन हुनमन के चोंगामन पींदाव। 9 हारून चो बेटामन चो करांडे पटा बांद आउर हुनमन चो मुंडे पागा बांद जेचोले हुनमन के अमदेया पुजारीपन चो हक रओ। असन बरन ले हारून आउर हुनचो बेटामन के नीती-नियम हिसाब ले पुजारीपन देस।10 तेबे बाछा के मिला-मिसा तम्बु पुरे आन। हारून आउर हुनचो बेटामन बाछा चो मुंडे आपलाहान हाथ थापोत। 11 पाछे तुय, बाछा के जहोवा पुरे मिला-मिसा तम्बु चो दुआरे जतरा कर। 12 हुन बाछा चो खिंडिक लोउ के धरुन आपलो अंडकी ले बेदी चो सींगमन ने लगाव आउर बाचलो लोउ के बेदी चो पेंदी ने रिकाउन देस। 13 ओंडकी-पोटी ने लटकलो बसील आउर कारजा उपर चो बसील आउर दुनो गुदा के बसील संगे बेदी उपरे डसाव। 14 बाछा चो गोबर, चामड़ी आउर मास के तमु-भाटा चो बाहरे डसाव। कसनबलले हुन पाप-जतरा होयदे।
15 फेर तुय गोटोक मेंडा के धरुन जा, हारून आउर हुनचो बेटामन, मेंडा चो मुंडे आपलाहान हाथ थापोत। 16 तेबे तुय, हुन मेंडा के जतरा कर आउर हुनचो लोउ के बेदी चो चारो पाटे छीचुन देस। 17 पाछे, मेंडा के गोंदा-गोंदा कर। हुनचो ओंडकी-पोटी आउर पांयमन के धोउन मुंडी आउर मास गोंदामन संगे संगाव। 18 मेंडा चो सपाय भाग के बेदी उपरे डसाव। हुन जहोवा काजे होम-जतरा होयदे। हुन जहोवा काजे आईग ने चेगालो नंगत बास देतो चेगावा होयदे।
19 फेर तुय, दुसर मेंडा के धरुन जा, हारून आउर हुनचो बेटामन मेंडा चो मुंडे आपलाहान हाथ थापोत। 20 पाछे तुय, हुन मेंडा के जतरा कर आउर हुनचो लोउ ले खिंडिक धरुन हारून आउर हुनचो बेटामन चो उजा कान आउर उजा हाथ चो अंडका ने आउर उजा पांय चो माय-अंडका ने लगाव आउर लोउ के बेदी चो भोंवरक छीचुन देस। 21 फेर तुय, बेदी ले बाचलो लोउ आउर अबिसेक चो तेल ले खिंडिक धरुन, हारून आउर हुनचो बेटामन के आउर हुनमन चो फटईमन ने छीचुन देस। तेबे हारून आउर हुनचो बेटामन आपलो-आपलो फटईमन संगे पवितर होदे।
22 तेबे तुय, पुजारीपन सोपतो काजे जतरा करलो मेंडा चो बसील, मोट लेंगड़ी, ओंडकी-पोटी संग चो बसील, कारजा चो उपर भाग, बसील संगे दुनो गुदामन आउर उजा जांग के धर, 23 आउर जहोवा पुरे संगालो पाग नोहलो रोटीमन चो टुकना ले गोटोक रोटी आउर तेल संगे चटकलो गोटोक पूड़ी, आउर तेल घसलो गोटोक पापड़ी के धर। 24 तुय, ए सपाय तीजमन के हारून आउर हुनचो बेटामन चो हाथे देस आउर हुनमन के जहोवा चो पुरे उठाउन हलातो-भेंट चेगाओत। 25 पाछे तुय, हुन तीजमन के हुनमन चो हाथ ले धरुन बेदी उपरे होम-जतरा संगे संगाउन डसाव। ए जहोवा काजे आईग ने चेगालो नंगत बास देतो चेगावा होयदे।
26 फेर तुय, हारून के पुजारीपन सोपतो काजे जतरा करलो मेंडा चो छाती के धरुन हलातो-भेंट जानुन जहोवा पुरे उठाव, हुन तुचो बाटा होयदे। 27 फेर तुय, हारून आउर हुनचो बेटामन के पुजारीपन सोपतो काजे जतरा करलो मेंडा चो छाती के, आउर हुनचो जांग के हलातो-भेंट जानुन पवितर कर। ए दुनो हारून आउर हुनचो बेटामन चो बाटा होयदे। 28 ए इसराएलिमन बाटले हारून आउर हुनचो बेटामन काजे नीती-नियम हिसाब ले अमदेया हुनमन चो बाटा होयदे। कसनबलले ए इसराएलिमन चेगालो मिला-मिसा जतरा बाटले, जहोवा काजे चेगालो भेंट आय।
29 हारून चो पींदतो पवितर फटई, हुनचो पाछे हुनचो बेटामन के आउर हुनचो नाती-पुती काजे बले होयदे। हुनके पींदुन हुनमन अबिसेक होओत आउर नीती-नियम हिसाब ले बड़े-पुजारीपन पाओत। 30 हारून चो बेटामन ले जोन हुनचो पलटा बड़े पुजारी बनेदे, आउर जेबे हुन मिला-मिसा तम्बु ने सेवा-बुता करतो काजे एयदे, तेबे हुन पवितर फटई के सात दिन होओतले पींदुन रओ।
31 पुजारीपन सोपतो काजे जतरा करलो मेंडा चो बाचलो मास के पवितर ठाने रांदा। 32 तेबे हारून आउर हुनचो बेटामन मेंडा चो रांदलो मास आउर टुकना चो रोटी के मिला-मिसा तम्बु दुआरे खाओत। 33 हारून आउर हुनचो बेटामन के पवितर करुन पुजारीपन सोपतो बेरा हुनमन चो पाप खंडान काजे जतरा करलो तीजमन के हुनमन खुदे खाओत। कोनी परदेसिया हुनके नी खाओत। कसनबलले हुन पवितर आय। 34 नीति-नियम हिसाब ले पुजारीपन सोपतो काजे जतरा करलो मेंडा चो मास नोहले रोटी बियान पावतले बाचली जाले, हुनके नी खाहा, आईग ने डसाहा। कसनबलले हुन पवितर आय।
35 मय तुके जसन-जसन हुकुम दिलेसे, हुनी हिसाब ले तुय हारून आउर हुनचो बेटामन संगे कर। सात दिन होओतले तुय हुनमन के नीति-नियम हिसाब ले पुजारीपन काजे अबिसेक कर 36 बललोने, रोजे गोटोक बाछा के पाप खंडान काजे पाप-जतरा चेगाव। जतरा करतो बेरा, बेदी काजे बले पाप खंडान करुन पाप-जतरा चेगाव आउर हुनके पवितर करतो काजे हुनचो अबिसेक कर। 37 सात दिन होओतले बेदी काजे खंडान करुन हुनके पवितर कर, तेबे बेदी पवितर होयदे आउर काई बले हुनके छिंवलोने, हुन बले पवितर होयदे।
रोजे दिना चो चेगावा
38 तुय रोजे ए तीजमन के बेदी ने चेगाव। रोजे गोटोक बरक चो दुय ठन मेंडा पिलामन, 39 गोटोक मेंडा पिला के बियाने आउर दुसर मेंडा पिला के सांज बेरा जतरा चेगाव। 40 पईल मेंडा-पिला संगे, कांडुन निकरालो गोटोक लिटर जयतून तेल ने चटकलो गोटोक किलो नंगत पिसान आउर पीदी-जतरा काजे गोटोक लिटर अंगुर-रस चेगाव। 41 आउर दुसर मेंडा पिला के सांज बेरा जतरा चेगाव, हुनचो संगे बियाने करतो नीति-नियम हिसाब ले अरन-जतरा आउर पीदी-जतरा चेगाव कि ए जहोवा काजे आईग ने चेगालो नंगत बास देतो चेगावा होयदे। 42 तुमचो पीड़ी-पीड़ी ले, जहोवा पुरे मिला-मिसा तम्बु दुआरे असने हिसाब ले रोजे दिना होम-जतरा चेगाहा। कसनबलले एई ठाने, मय तुमचो संगे गोटेयातो काजे तुमके भेटेंदे। 43 मय इसराएलिमन के हुताय भेटेंदे आउर मोचो मयमा-उजर ले हुन तम्बु पवितर होयदे। 44 मय, मिला-मिसा तम्बु के आउर बेदी के पवितर करेंदे आउर मोचो काजे पुजारी सेवा-बुता करतो काजे, हारून आउर हुनचो बेटामन के बले पवितर करेंदे। 45 मय इसराएलिमन चो मंजिगता डेरा करेंदे आउर हुनमन चो महापरभु होयंदे। 46 तेबे हुनमन जानदे, मय जहोवा हुनमन चो महापरभु आंय। मय हुनमन चो मंजिगता रतो काजे हुनमन के मिसर देस् ले निकराउन आनलेसे। मय ची हुनमन चो महापरभु जहोवा आंय।