धूप गंधातो बेदी
30
धूप गंधातो काजे बमूर रूक चो गोटोक बेदी बनाव। 2 हुनचो लाम गोटोक हाथ आउर ओसार गोटोक हाथ रओ। हुन चार खुटिया आउर दुय हाथ डेंग रओ। हुनचो सींगमन के बले गोटकी रूक-गोंदा ले बनाव। 3 तुय, हुन बेदी चो उपर भाग के, हुनचो चारो-कुती आउर हुनचो सींगमन के निरवा सोन ले मड़ आउर हुनचो चारो-कुती सोन चो पटी बनाव। 4 हुन बेदी चो दुनो पाट, सोन चो दुय ठन खाड़ुमन बनाउन सोन चो पटी बनालो खाले लगाउन देस, जेचोले ए खाड़ुमन ने डंडेयामन जोंगाड़ुन बेदी के उठाउक होओ। 5 डंडेयामन के बमूर रूक चो बनाउन सोन ले मड़। 6 तुय, धूप गंधातो बेदी के, भीतर-पड़दा चो पुरे संगाव, जोन बायदा चो डोली चो पुरे आसे। हुन बायदा चो डोली चो ढाकना† उपर ले मय तुचो संगे भेट होयंदे। 7 हारून, हुनी बेदी ने नंगत बास देतो धूप गंधाओ, रोजे दिने बियाने जेबे हुन दिया जतनाउक एयदे तेबे धूप गंधाओ। 8 आउर सांज बेरा जेबे हारून दिया बारुक एयदे तेबे धूप गंधाओ। तुमचो पीड़ी-पीड़ी ने जहोवा पुरे रोजे असने धूप गंधाहा। 9 तुय, हुन बेदी ने काई असुद धूप नी गंधाव, आउर हुन बेदी ने होम-जतरा, अरन-जतरा आउर पीदी-जतरा बले नी चेगाहा। 10 हारून, रोजे बरक गोटोक हार बेदी चो सींगमन के पवितर करो। तुमचो पीड़ी-पीड़ी काजे रोजे बरक गोटोक हार पाप खंडान काजे पाप-जतरा चो लोउ ले बेदी चो सींगमन के पवितर कर। ए जहोवा काजे सबुले पवितर आय।जीव चो पलटा दिलो मोल
11 जहोवा, मोसा के बललो, 12 “जेबे तुय इसराएलिमन चो गनती करसे, तेबे गनती होलो लोगमन आपलाहान जीव काजे महापरभु के पलटा देओत, जेचोले गनती होतो बेरा हुनमन उपरे काई मरी नी एओ। 13 गनती होलो लोगमन पवितर ठान चो सिक्का चो मोल हिसाब ने, रूपा चो आदा सिक्का* जहोवा काजे भेंट चेगाओत 14 बीस बरक चो नोहले हुनचो ले आगर उमर चो लोग गोटोक-गोटोक झन जहोवा के भेंट चेगाओत। 15 जेबे तुमचो जीव चो खंडान काजे जहोवा के भेंट चेगाहासे, तेबे कोनी सवकार हुनचो ले आगर नी चेगाओ आउर कोनी गरीब बले हुनचो ले कम नी चेगाओ। 16 तुय इसराएलिमन चो जीव चो खंडान काजे मिरतो पयसा के धरुन मिला-मिसा तम्बु चो सेवा-बुता ने लगाव। हुन जहोवा पुरे इसराएलिमन चो जीव बचालो चो सूरता होओ।”
कांस चो गंगार
17 फेर जहोवा मोसा के बललो, 18 “धोअतो काजे कांस चो गोटोक गंगार बनाव आउर हुनचो पांय के बले कांस चो बनाव। हुनके मिला-मिसा तम्बु आउर बेदी चो मंजिगता मंडाव आउर हुता पानी भोरुन संगाव। 19 हुता हारून आउर हुनचो बेटामन हाथ-पांय धोओत। 20 मिला-मिसा तम्बु ने ओलतो बेरा हुनमन हाथ-पांय धोओत, बललोने, बेदी लगे सेवा-बुता करुक एतो बेरा आउर जहोवा काजे आईग ने चेगावा चेगातो बेरा हुनमन हाथ-पांय धोओत नोहले मोरुन जादे। 21 हारून आउर हुनचो थर-लर आपलो हाथ-पांय नी धोअले मोरुन जादे, एई पीड़ी-पीड़ी काजे अमदेया चो नीती-नियम बनो।”
अबिसेक करतो काजे पवितर तेल
22 जहोवा मोसा के बललो, 23 “तुय सबुले नंगत मसला धर: छय किलो गंधरस, तीन किलो दालचीनी आउर तीन किलो नंगत बास देतो अगर, 24 आउर पवितर ठान चो सिक्का हिसाब ने, छय किलो तेजपाना आउर चार लिटर जयतून तेल धर। 25 ए सपाय ले पवितर अबिसेक तेल बनाव बललोने, नंगत बास बिती तीजमन ले अबिसेक करतो काजे पवितर तेल बनाव। 26 ए तेल ले मिला-मिसा तम्बु के, बायदा चो डोली के 27 आउर सपाय जाय-जमक संगे टेबुल के, आउर जाय-जमक संगे लामन के आउर धूप गंधातो बेदी के 28 आउर सपाय जाय-जमक संगे होम-जतरा चेगातो बेदी के आउर समपुरन गंगार के अबिसेक कर; 29 तुय हुनमन के पवितर कर जेचोले हुनमन सबुले पवितर होओ। आउर जोन बले हुनमन के छिंयेदे हुन बले पवितर होयदे। 30 फेर हारून आउर हुनचो बेटामन चो अबिसेक कर। असन बरन ले हुनमन के मोचो पुजारी सेवा-बुता करतो काजे पवितर कर। 31 तुय इसराएलिमन के मोचो ए हुकुम सुनाव, ‘ए तेल तुमचो पीड़ी-पीड़ी ने मोचो काजे पवितर अबिसेक चो तेल होयदे। 32 ए तेल के सादा लोग चो देहें ने नी रिकाहा आउर एचो असन काई दुसर तेल नी बनाहा। ए पवितर तेल आय, ए तुमचो काजे बले पवितर आय। 33 कोनी बले ए तेल असन काई आउर तेल बनालोने, नोहले पुजारी के छांडुन कोनी परदेसिया ए तेल के देहें ने घसलोने, हुनके आपलेई लोग भात छांडोत’।”
पवितर धूप बनातोर
34 फेर जहोवा, मोसा के बललो, “तुय ए नंगत बास बिती मसला धर: धूप, गंधरस, नखी, नंगत बास देतो अगर संगे सुद धूप (ए सपाय गोटकी हिसाब चो रओ) 35 ए सपाय के बासतेल बनाउ बीता चो नीती-नियम ले लोन मिसाउन सुद आउर पवितर धूप बनाव। 36 फेर हुनके गुंड-गुंडा पिसुन हुनचो गोटोक भाग के मिला-मिसा तम्बु ने बायदा चो डोली चो पुरे संगाव, जोन थाने मय तुके भेटेंदे। हुन तुमचो काजे सबुले पवितर होयदे। 37 हुन धूप चो असन, तुय आपलो काजे काई दुसर धूप नी बनाव। तुय हुनके, आपलो जहोवा काजे पवितर मान। 38 जोन कोनी बले बास देतो काजे हुनचो असन काई बले बनालोने, हुनके आपलेई लोग भात छांडोत।”