मिला-मिसा तम्बु चो कारिगिरी करुमन
31
फेर जहोवा, मोसा के बललो, 2 “सुन, मय जहूदा बंस चो बसलेल के बाछलेसे, जोन ऊरी चो बेटा आउर हूर चो नाती आय। 3 मय जहोवा, हुनके मोचो आत्मा ले भोरलेसे आउर हुन, बुद, गियान, अकल ले सपाय बरन चो कारिगिरी करुक सकेदे। 4 हुन, नंगत कारिगिरी करुन सोन-रूप आउर कांस चो 5 आउर हीरा-पकनामन काटतोर आउर बसातोर, रूक-गोंदामन ने गोदतो आउर बरन-बरन चो कारिगिरी करुक सकेदे। 6 दख, मय दान बंस ले, अहीसामाक चो बेटा ओहोलीआब के हुनचो संगी बनालेसे आउर जितलो बुद बितामन आसोत, हुन सपाय के मय, कारिगिरी करतो सकत दिलेसे कि जितलो तीजमन के बनातो हुकुम मय तुके दिलेसे, हुन सपाय के हुनमन बनाओत 7 बललोने, मिला-मिसा तम्बु, बायदा चो डोली आउर हुनचो ढाकना आउर तम्बु चो सपाय जाय-जमक, 8 टेबुल आउर हुनचो सपाय जाय-जमक, आउर निरवा सोन ले बनालो लामन आउर हुनचो सपाय जाय-जमक आउर धूप गंधातो बेदी, 9 आउर होम-जतरा चेगातो बेदी चो सपाय जाय-जमक, कांस चो गंगार आउर हुनचो पांय, 10 आउर गातलो फटईमन आउर हारून पुजारी काजे पुजारी सेवा-बुता करतो काजे पींदतो पवितर फटई आउर पुजारी सेवा-बुता करतो काजे हुनचो बेटामन चो फटईमन, 11 आउर पवितर ठान काजे अबिसेक चो तेल आउर नंगत बास देतो बिती धूप। ए सपाय के हुनमन, जसन मय तुके हुकुम दिलेसे उसनेची बनाओत।”बिसातो दिन मानतो हुकुम
12 फेर जहोवा, मोसा के बललो, 13 “तुय इसराएलिमन के असन बल, ‘तुमी मोचो बिसातो दिन के पक्का माना, कसनबलले ए मोचो आउर तुमचो मंजी तुमचो पीड़ी-पीड़ी काजे चीना रयदे, जेचोले तुमी जानासे कि तुमके पवितर करु जहोवा मय आंय। 14 तुमी बिसातो दिन के माना, कसनबलले हुन तुमचो काजे पवितर दिन आय। हुन दिन के नी मानतो सपाय लोग के मोरते मारा, जोन कोनी बले बुता करुन हुन दिन के अपवितर करलोने, हुनके आपलेई लोग भात छांडा। 15 छय दिन बुता करा, मानतर सातवां दिन के तुमी बिसातो दिन माना बललोने, जहोवा काजे पवितर दिन माना। एईकाजे जोन कोनी बले बिसातो दिने काई बुता करले, हुनके मोरना डंड दिया। 16 एईकाजे इसराएलिमन बिसातो दिन के मानोत, आउर हुनमन चो पीड़ी-पीड़ी बले हुनके जुग-जुग चो बायदा समजुन मानोत। 17 ए मोचो आउर इसराएलिमन चो मंजी अमदेया काजे गोटोक चीना रयदे। कसनबलले जहोवा बादरी आउर मंजपुर के छय दिन ने बनालो आउर सातवां दिने बिसाउन अस्तिर होलो’।”
18 जेबे महापरभु सिनाई डोंगरी उपरे, मोसा ले गोटेयालो, तेबे हुन आपलो अंडकी ले लिखलोर नियम-कानुन चो दुय ठन पटीमन हुनके दिलो।