सोन चो बाछा
32
मोसा बड़े डोंगरी ले उतरतो काजे गमलो, तेबे लोगमन हारून लगे रूंडा होउन हुनके बलला, “आमके बाट दखातो काजे देव के बनाव। कसनबलले मोसा, आमके मिसर देस् ले निकराउन आनलो आउर हुनके काय होली जाले, आमी नी जानुं।” 2 हारून हुनमन के बललो, “तुमचो बायलेमन आउर बेटा-बेटीमन कान ने पींदलो सोन चो बालीमन के हिटाउन मोचो लगे आना।” 3 तेबे सपाय लोगमन आपलाहान कान ने पींदलो सोन चो बालीमन के हिटाउन हारून लगे आनला। 4 हारून हुनमन चो हाथ ले सोन धरुन बाछा चो मूरत घड़लो। तेबे लोगमन बलला, “ए इसराएल, तुके मिसर देस् ले निकराउन आनलो तुचो देव एई आय!” 5 एके दखुन हारून हुनचो पुरे गोटोक बेदी बनालो, आउर डारा बुलालो, “जहोवा काजे काली के तिहार होयदे।” 6 दुसर दिने लोगमन बड़े बियाने उठुन होम-जतरा आउर मिला-मिसा जतरा हुता चेगाला। पाछे, हुनमन बसुन खादला-पीवला आउर भुक्कल्ला।7 तेबे जहोवा, मोसा के बललो, “तुय झटके खाले उतर, कसनबलले मिसर देस् ले तुचो निकराउन आनलो लोग नसलासोत। 8 मय हुनमन के जोन बाट ने हिंडतो हुकुम देउ रले, हुनके झटके भूलकला। हुनमन आपलो काजे गोटोक बाछा चो मूरत के घड़ुन हुनके डंडासरन करला आउर हुनचो काजे जतरा बले चेगाला। हुनमन असन बले बलला, ‘ए इसराएल, तुमके मिसर देस् ले निकराउन आनलो तुमचो देव एई आय’।” 9 फेर जहोवा, मोसा के बललो, “मय ए लोगमन के दखले, हुनमन एरा आत। 10 एदांय तुय सुन, मोके नी ठेबाव, मोके जंजाल रीस लागेसे, मय हुनमन के सत्यानास करेंदे। मानतर तुचोले गोटोक बड़े जात उबजायंदे।”
11 तेबे मोसा, महापरभु-जहोवा के गुहारुक मुरियालो, “ए जहोवा, तुय आपलो रयत उपरे काय काजे रीस होयसीस, जोनमन के तुय आपलो बड़े सकत आउर बांहा चो बल ले मिसर देस् ले निकराउन आनलिसीस। 12 तुय असन करलीस जाले मिसरीमन असन बलदे, ‘काय हुन, हुनमन के अडरा उआट ले बड़े डोंगरीमन ने सत्यानास करतो काजे निकराउन आनलो’? तुय रीस नी हो, आउर आपलो रयत चो नोकसान नी कर। 13 आपलो कमेया अबराहम, इसहाक, आउर इसराएल के सूरता कर, जोनमन ले तुय खुद चो किरिया खाउन असन बलुन रलीस, ‘मय तुमचो थर-लर के बादरी चो तारामन असन खुबे बड़ायंदे आउर ए गुलाय देस् जेचो बारे ने मय सांगलेसे, तुमचो थर-लर के अमदेया काजे देयंदे आउर हुनमन हुनचो हकदार होदे’।” 14 तेबे जहोवा जीव-दुखलो आउर आपलो रयत चो नोकसान नी करलो।
15 मोसा नियम-कानुन चो दुनो पटीमन के हाथे धरुन डोंगरी ले उतरलो, हुन पटीमन चो दुनो पाट लिखलोर रये। 16 हुन दुनो पटी के महापरभु बनाउ रये आउर हुन पटीमन ने महापरभु खुदे गोदुन लिखुन रये। 17 जहोसू लोगमन चो कोलार के सुनुन मोसा के बललो, “तमु-भाटा ले लड़ई होतो कोलार सुना देयसे।” 18 तेबे मोसा बललो, “ए कोलार, जीतलो लोगमन चो नोहले हारलो लोगमन चो नोआय। मोके तो गीत गावलो असन सुना देयसे।” 19 मोसा तमु-भाटा ने ईलोके, हुनमन चो बनालो बाछा चो मूरत आउर हुनमन चो नाचा-डगाव होतोके दखलो। तेबे मोसा खुबे रीस होलो आउर हुन दुनो पटी के आपलो हाथ ले डोंगरी खाले कचाड़ुन टुटालो। 20 पाछे हुन, हुनमन चो घड़लो सोन चो बाछा चो मूरत के आईग ने पकालो आउर हुनके गुंड-गुंडा पिसुन पानी ने मिसालो आउर हुन पानी के इसराएलिमन के खुआलो।
21 तेबे मोसा, हारून के बललो: “ए लोगमन तुके काय करला, कसन तुय एमन के इतलो बड़े पाप ने पाड़लीस?” 22 हारून बललो, “ए मोचो मालिक रीस नी हो, तुय तो एमन के जानसीस, एमन अमदेया अडरा बुता करतो काजे ची मन करते रउआत। 23 हुनमन मोके बलला, ‘आमचो पुरे-पुरे हिंडतो काजे आमचो काजे देव-धामी बनाव, कसनबलले जोन मोसा आमके मिसर देस् ले निकराउन आनलो हुनके काय होली जाले आमी नी जानुं’। 24 तेबे मय हुनमन के बलले, ‘जेचो लगे सोन चो माला-खिलवा आसे मोचो लगे आना’। हुनमन मोके दिला, मय हुनके आईग ने पकाले, तेबे हुन बाछा चो मूरत निकरली!”
25 जेबे मोसा दखलो, हारून हुनमन के लेक-परीक नी करलो, तेबे बयरीमन चो पुरे हुनमन चो हांसी-खेली होली। 26 एईकाजे मोसा, तमु-भाटा चो देवड़ी लगे उबा होउन हुनमन के बललो, “जोन कोनी जहोवा बाटे आसे, मोचो लगे एओ!” तेबे सपाय लेवीमन हुनचो लगे रूंडा होला। 27 हुन, हुनमन के बललो, “इसराएल चो महापरभु जहोवा बलेसे, ‘आपलो-आपलो करांड ने खांडा बांदुन तमु-भाटा चो ए रेटे ले धरुन हुन रेटे अमरतले आपलो भाईमन के, संगीमन के आउर आपलो-आपलो तमु लगे रउमन के मोरते मारा’।” 28 मोसा चो गोट हिसाब ले, लेवीमन करला आउर हुन दिने, तीन हजार लोगमन के मोरते मारला। 29 फेर मोसा बललो, “आजी जहोवा तुमके आपलो पुजारी-सेवा सोपलोसे, कसनबलले (हुनचो हुकुम हिसाब ले) तुमी आपलाहान बेटामन आउर भाईमन के मोरते मारलास। असन बरन ले तुमी जहोवा बाटले बर पावलास।”
30 दुसर दिने मोसा, लोगमन के बललो, “तुमी बड़े भारी पाप करलासाहास। मय डोंगरी उपरे जहोवा लगे जायंदे; असन होओ कि मय तुमचो पाप खंडान करुक सके।” 31 तेबे मोसा जहोवा लगे जाउन बललो, “आह, ता, हुन लोगमन सोन चो देव-धामी के बनाउन बड़े भारी पाप करलासोत। 32 फेर बले तुय हुनमन चो पाप के खेमा कर, नोहले तुय, आपलो लिखलो किताप ले मोचो नाव के मेटाउन देस।” 33 जहोवा, मोसा के बललो, “जोन मोचो बिरुद ने पाप करलोसे हुनचेई नाव के मोचो किताप ले मेटायंदे। 34 एदांय तुय जाउन हुन लोगमन के हुता ने, जोन ठान चो बारे ने मय तुके सांगलेसे। दख, मोचो दूत तुचो पुरे-पुरे जायदे। मानतर डंड चो दिने मय हुनमन के, ए पाप चो डंड देयंदे।”
35 जहोवा हुनमन उपरे बिपती पठालो, कसनबलले हारून बनालो बाछा चो मूरत के हुनीमन बाटले बनाउन रला।