सिनाई डोंगरी ले जातो हुकुम
33
फेर जहोवा, मोसा के बललो, “तुय आउर तुचो मिसर देस् ले निकराउन आनलो लोगमन हुन देस् ने जाहा, जेचो बारे ने मय अबराहम, इसहाक आउर जाकूब के, ‘मय तुचो थरलर के ए देस् के देयंदे’ बलुन किरिया खाउन रले। 2 मय तुचो पुरे-पुरे गोटोक दूत के पठायंदे, आउर मय कनानी, एमोरी, हित्ती, परिज्जी, हिव्वी, जबूसी लोगमन के खेदुन निकरायंदे। 3 जोन देस् ने गोरस आउर ओंडार-तेल बोहेसे हुन देस् ने तुमी जाहा। तुमी कटुर आहास, एईकाजे मय तुमचो मंजिगता नी रयें, नोहले तुमी जातो बाटे ची सत्यानास होआसे।”4 जहोवा चो असन खीजतोके सुनुन सपाय लोग गागला, आउर कोनी बले सोन-रूप चो माला-मूंदी नी पींदला। 5 कसनबलले जहोवा, मोसा के बलुन रलो, “इसराएलिमन के मोचो ए गोट सांग, ‘तुमी टेकाहामन आहास, मय तुमचो मंजिगता डंडिक बले रले, तुमके सत्यानास करुन देयंदे। एईकाजे एदांय आपलो-आपलो माला-खिलवा के हिटाहा, तेबे मय फासला करेंदे, तुमचो संगे काय करतोर आय’।” 6 एईकाजे इसराएलिमन होरेब डोंगरी ले पुरे जातो बेरा सोन-रूप नी पींदला।
मिला-मिसा तम्बु ले जहोवा गोटेयातोर
7 मोसा, तम्बु के इसराएलिमन चो डेरा ले लापी गाड़ते रये आउर हुनके मिला-मिसा तम्बु बलते रये। जोन कोनी बले जहोवा चो इछा जानतो मन करले, हुन निकरुन मिला-मिसा तम्बु लगे जाते रये। 8 जेबे-जेबे मोसा मिला-मिसा तम्बु लगे जाते रये, तेबे-तेबे सपाय लोगमन आपलो-आपलो डेरा ले निकरुन डेवना लगे ठिंया होते रओत आउर मोसा मिला-मिसा तम्बु भीतरे जाओतले हुनके दखते रओत। 9 जेबे मोसा मिला-मिसा तम्बु भीतरे ओलते रये तेबे मिला-मिसा तम्बु चो बाट-डेवना ने बादरी-खमा ढाकते रये आउर जहोवा, मोसा संगे गोटेयाते रये। 10 जेबे लोगमन, मिला-मिसा तम्बु चो बाट-डेवना लगे बादरी-खमा ढाकतो के दखते रला, तेबे सपाय लोगमन उठुन आपलो-आपलो तमु चो डेवना लगे डंडासरन करते रला। 11 जसन कोनी आपलो संगवारी संगे गोटेयाउआय उसने जहोवा, मोसा संगे चमाचम गोटेयाते रये। हुनचो पाछे, मोसा तमु-भाटा ने बोहड़ुन एते रये, मानतर मोसा चो साहरा करु नून चो जुवान बेटा जहोसू मिला-मिसा तम्बु भीतरे ची रते रये।
मोसा, महापरभु चो मयमा दखुक मन करतोर
12 मोसा, जहोवा के बललो, “सुन, तुय तो मोके, ‘ए लोगमन के संगे नेउक बलसीस’, मानतर मोचो संगे कोके पठाउआस ए गोट के तुय नी सांगलीस। फेर बले तुय मोके बलसीस, ‘मय तुके नंगत ले जाने आउर मय तुचोले हरिक आसे’। 13 एईकाजे एदांय मय तुचोले गुहारेंसे, तुय मोचोले हरिक आसीस जाले, मोके तुचो बाट दखाव। तेबे मय तुके जानुक सकेंदे आउर तुचोले हरिक रउक सकेंदे। दख, ए लोग तुचो रयत आत, एमन के नी भूलक।” 14 जहोवा हुनके बललो, “मय खुदे तुचो संगे जायंदे आउर तुके अस्तिर देयंदे।” 15 मोसा, जहोवा के बललो, “तुय खुदे आमचो संगे नी ईलोने तुय आमके एताले नी ने। 16 नोहले कसन ने कोनी जानेदे, मोचो ले आउर तुचो रयत ले तुय हरिक आसीस? तुय आमचो संगे-संगे ईलोने ची मंजपुर चो दुसर सपाय लोगमन ले आमी भिने होउंदे।”
17 तेबे जहोवा, मोसा के बललो, “जसन तुय बललीस उसने मय करेंदे। मय तुचोले हरिक आसे आउर मय तुके नंगत ले जानेसे।” 18 मोसा बललो, “मोके तुचो मयमा-उजर के दखाव।” 19 जहोवा बललो, “मय तुचो पुरे मोचो सपाय भलई बुता दखायंदे आउर तुचो पुरे मोचो नाव, ‘जहोवा’ सुनायंदे। जेचो उपरे मय जीव-दुखुक मन करले, हुनके मय जीव-दुखेंदे, आउर जेचो उपरे दया करुक मन करले, हुनके मय दया करेंदे।” 20 फेर जहोवा बललो, “तुय मोके चमाचम दखुक नी सकीस। कसनबलले कोनी मनुक मोचो थमना के दखुन जीव रउक नी सके।” 21 जहोवा बललो, “मोचो लगे गोटोक सिलपट आसे, तुय हुनचो उपरे ठिंया रा। 22 मोचो मयमा-उजर तुचो पुरे ले जाओतले, मय तुके सिलपट डांगरा चो आड़े संगायंदे, आउर मय तुचो पुरे ले जाओतले, तुके आपलो हाथ ले आड़ करुन देयंदे। 23 पाछे, मय आपलो हाथ के गुचायंदे, तेबे तुय मोचो पाट के दखुक सकसे। मानतर मोचो थमना के दखुक नी सकीस।”