बायदा चो नवा पटीमन
34
जहोवा, मोसा के बललो, “तुचो टुटालो आगे चो पटीमन असन, फेर पकना चो दुय ठन पटीमन बनाव। आउर जोन बचन आगे चो पटीमन ने लिखलोर रली, हुनी बचनमन के मय ए नवा पटीमन ने लिखुन देयंदे। 2 तुय बियाने तियार रा, आउर सिनाई-डोंगरी उपरे चेगुन मोचो पुरे उबा हो। 3 तुचो संगे आउर डोंगरी ने कोनी नी चेगोत आउर हुन डोंगरी बाटे कोनी दखा नी देओत। छेरी-मेंडी आउर गाय-बयला हुन लगे नी चरोत।” 4 तेबे मोसा आगे चो पटीमन असन फेर दुय ठन पटीमन बनालो आउर बियाने उठुन हुन दुनो पटीमन के धरुन जहोवा चो हुकुम हिसाब ले सिनाई डोंगरी उपरे चेगलो। 5 जहोवा बादरी संगे बड़े डोंगरी ने उतरलो आउर मोसा संगे उबा होउन आपलो नाव “जहोवा” सुनालो। 6 जहोवा हुनचो पुरे ले असन सुनाते गेलो, “जहोवा, जहोवा, जीव-दुखु आउर दया करु, झटके रीस नी होउ, खुबे सत-मया करु आउर पतेयातो लाईक महापरभु आय। 7 हुन हजारो पीड़ी-पीड़ी ले सरलगा सत-मया करु आउर ओधरम, दोख आउर पापमन के खेमा करु आय। मानतर दोसी के हुन दोख नोहलोर नी बले। हुन, लोगमन चो ओधरम चो डंड हुनमन चो बेटा-बेटीमन आउर नाती-पुती के, तीसर आउर चवथा पीड़ी ले देउआय।” 8 तेबे मोसा तूरते पाटा पड़ुन जहोवा के डंडासरन करलो। 9 फेर हुन बललो, “ए परभु, तुय मोचो ले हरिक आसीस जाले, तुय आमचो संगे जो। ए लोगमन तो टेकाहामन आत। फेर बले तुय आमचो ओधरम आउर पाप के खेमा कर आउर आमके आपलो निज बाटा मान।”दुसर देव-धामी के नी मानतो हुकुम
10 जहोवा बललो: सुन, मय गोटोक बायदा करेंसे, तुचो सपाय लोग चो पुरे मय अचरित बुतामन दखायंदे, जसन मंजपुर ने आउर सपाय जात ने केबई नी होलीसे। जोनमन चो मंजिगता तुय रयसीस, हुनमन सपाय जहोवा चो बुता के दखदे। कसनबलले, मय जोन बुता करेंदे हुन डरतो लाईक आय।
11 आजी जोन हुकुम मय तुमके देयंसे हुनके माना। दखा, मय तुमचो पुरे ले एमोरी, कनानी, हित्ती, परिज्जी, हिव्वी आउर जबूसी लोगमन के निकरायंदे। 12 एईकाजे चेत ने राहा, जोन देस् ने तुमी जायसाहास, हुता चो लोगमन संगे काई बायदा नी करा नोहले हुन बायदा तुमचो काजे फांदा होयदे। 13 मानतर तुमी, हुनमन चो बेदीमन के भोसड़ाहा, देव-लाठमन के टुटाहा आउर असेरा देव चो टेंगरी-बड़गीमन के गोंदा-गोंदा करा। 14 तुमी कोनी दुसर देव-धामी के डंडासरन नी करा। जहोवा चो नाव, ईरका होउ आय। हुन, दुसर देव-धामी चो पाट धरतोके नी सहतो महापरभु आय। 15 तुमी हुन देस् चो लोगमन संगे काई बायदा नी करा, नोहले हुनमन तुमके नेवता दिले, हुनमन चो देव-धामी के चेगालो जतरा मास के खाउक पड़ेदे। हुनमन देव-धामीमन संगे बेबिचार करसोत आउर हुनमन काजे जतरा चेगायसोत। 16 आउर तुमी आपलो बेटामन काजे हुनमन चो कुंआरी लेकीमन के आनले, हुनमन चो लेकीमन आपलो देव-धामीमन संगे बेबिचार करदे आउर तुमचो बेटामन के बले हुनमन चो देव-धामी ले बेबिचार करादे।
17 तुमी काई देव-धामी चो मूरत नी बनाहा।
तिहारमन के मानतोर
18 पाग नोहलो रोटी तिहार माना। मोचो हुकुम हिसाब ले आबीब मयना चो कबूल धरालो समया ने सात दिन होओतले पाग नोहलोर रोटी खाहा। कसनबलले तुमी आबीब मयना ने मिसर देस् ले निकरुन ईलास। 19 सपाय पईलात मोचो आत। गाय-बयलामन, छेरी-मेंडीमन चो सपाय पईलात नर मोचो आय। 20 गदही चो पईलात पिला के मेंडा पिला पलटा देउन छोड़ाहा, हुनके पलटा देउन नी छोड़ातोर होले, हुनचो टोडरा के अलटुन दियास। मानतर आपलो सपाय पईलात बेटामन के पलटा देउन छंडाहा। कोनी मोके चुचाय हाथे थमना नी दखाहा।
21 छय दिन तुमी मसागत करा, मानतर सातवां दिने बिसाहा। नांगर जोपतो बेरा, आउर भारा बोअतो बेरा बले बिसाहा। 22 तुमी गउं चो नवा-उबज चो कटई बेरा हपतामन चो तिहार के माना। बरक चो सरासरी ने, उबज रूंडातो तिहार बले माना। 23 तुमचो थानो सपाय मनुकमन बरक ने तीन हार इसराएल चो महापरभु, जहोवा पुरे एओत। 24 कसनबलले मय बिजातीमन के तुमचो पुरे ले निकराउन तुमचो संद के बड़ायंदे आउर जेबे तुमी बरक ने तीन हार आपलो महापरभु-जहोवा लगे ईयासे, तेबे कोनी तुमचो भुंय के लालच नी करदे।
25 जतरा लोउ आउर पाग बिती रोटी के गोटकी संगे नी चेगाहा आउर फसह तिहार चो जतरा मास के बियानत ले नी संगाहा। 26 आपलो बेड़ा-खाड़ा चो नवा-उबज चो सबुले नंगत पईल बाटा के आपलो महापरभु जहोवा चो मंदिर ने आना। छेरी-पिला के हुनचो माय चो गोरस ने नी चुड़ाहा।
सिनाई डोंगरी ने जहोवा संगे मोसा
27 तेबे जहोवा, मोसा के बललो, “ए बचन के लिख, कसनबलले एई बचनमन हिसाब ले मय तुचो संगे आउर इसराएलिमन संगे बायदा करलेसे।” 28 मोसा हुता जहोवा संगे दुय-कोड़ी रात-मंजन रलो, आउर हुतलो दिन हुन काई रोटी नोहले पानी नी खादलो। जहोवा, पकना चो पटीमन ने बायदामन, दस हुकुममन के लिखलो।
29 जिदलदांय मोसा नियम-कानुन चो दुनो पटीमन के धरुन सिनाई-डोंगरी ले उतरलो, हुदलदांय जहोवा संगे गोटेयालो किरता हुनचो थमना बरते रये, मानतर हुन आपलो थमना बरेसे बलुन नी जानते रये। 30 जेबे हारून आउर सपाय इसराएलिमन मोसा चो थमना बरतोके दखला, हुनमन हुनचो लगे जातो काजे डरला। 31 जेबे मोसा हुनमन के हागदिलो, तेबे मंडली चो सपाय मुखियामन संगे हारून हुनचो लगे ईलो, आउर मोसा हुनमन संगे गोटेयालो। 32 एचो पाछे, सपाय इसराएलिमन, मोसा लगे ईला। सिनाई डोंगरी ने, जितलो हुकुम जहोवा मोसा के देउन रये, हुन सपाय हुकुममन के हुनमन के सुनालो। 33 मोसा हुनमन संगे गोटेयाउन सारलो पाछे, आपलो थमना के फटई ले ढाकुन रलो। 34 जेबे-जेबे मोसा, जहोवा संगे गोटेयातो काजे तम्बु भीतरे जाते रये, तेबे-तेबे बाहरे निकरतले, मोसा आपलो थमना के फटई ले नी ढाकते रये; फेर बाहरे एउन जोन-जोन हुकुम जहोवा हुनके सांगते रये, हुन इसराएलिमन के सांगते रये। 35 इसराएलिमन मोसा चो थमना बरतोके दखते रला, आउर जिदलदांय हुन जहोवा संगे गोटेयातो काजे तम्बु भीतरे नी जाते रये, हुदलदांय हुन आपलो थमना के फटई ले ढाकुन रते रये।