बिसातो दिन के मानतोर
35
मोसा, इसराएलिमन चो सपाय मंडली के रूंडा करुन बललो, “जोन-जोन हुकुम जहोवा दिलोसे हुनमन ए आय: 2 छय दिन तुमी बुता करा, मानतर सातवां दिन के तुमी बिसातो दिन माना बललोने, महापरभु काजे पवितर दिन माना। हुन दिने कोनी बले काई बुता करलोने, हुनके मोरना-डंड दिया। 3 बिसातो दिने तुमी आपलाहान घर चो चूला ने आईग नी धराहा।”पवितर तम्बु काजे भेंट
4 फेर मोसा, इसराएलिमन चो सपाय मंडली के बललो, “जहोवा जोन हुकुम दिलोसे हुन ए आय: 5 तुमी जहोवा काजे भेंट दियास, तुमी आपलो-आपलो मन-इछा ले जहोवा काजे ए भेंटमन दियास, सोन, रूपा, कांस, 6 नीलिया, बांगा रंग आउर लाल रंग चो ऊन, मकमल फटई आउर बोकड़ा रोंआ, 7 नंगत सुकालो मेंडा-खाला, सबुले नंगत खाला, बमूर रूक, 8 दीया बारतो काजे तेल, अबिसेक तेल बनातो काजे मसला आउर नंगत बास देतो धूप, 9 एपोद आउर छातीपटा काजे गोमेदक पकना आउर मनी-पकनामन।
तम्बु काजे दुसर जाय-जमकमन
10 तुमीमन ले जितरो लोग के बुद आउर गियान आसे, हुनमन सपाय एउन जोन-जोन तीजमन चो जहोवा हुकुम दिलोसे हुनके बनाओत। 11 मिला-मिसा तम्बु आउर हुनचो ओड़ना, हुनचो खाड़ुमन, फारामन, डांडीमन, खमामन आउर हुनचो बयटीमन; 12 फेर बायदा चो डोली, हुनचो ढाकना, हुनचो डंडेयामन, आउर भीतर-पड़दा, 13 टेबुल आउर हुनचो डंडेयामन आउर हुनचो सपाय जाय-जमक; आउर भेंट चो पवितर रोटी; 14 उजर देतो काजे लामन आउर हुनचो सपाय जाय-जमक; दीया जरातो काजे तेल; 15 धूप गंदातो बेदी, आउर हुनचो डंडेयामन, अबिसेक काजे बास-तेल, नंगत बास देतो धूप आउर मिला-मिसा तम्बु चो दुआर काजे पड़दा; 16 होम-जतरा काजे बेदी, कांस चो झंझरी, डंडेयामन आउर हुनचो सपाय जाय-जमक, आउर गंगार आउर हुनचो पांय; 17 तम्बु-दुआर चो पड़दामन, हुनचो खमामन आउर बयटीमन; तम्बु चो दुआर-बाट काजे पड़दा 18 मिला-मिसा तम्बु चो खुटीमन आउर तम्बु दुआर चो खुटीमन आउर हुनचो डोरीमन; 19 पवितर ठाने सेवा-बुता करतो काजे गातलो फटई आउर पुजारी सेवा-बुता करतो काजे हारून पुजारी काजे पवितर फटई आउर हुनचो बेटामन काजे फटईमन।”
लोगमन भेंट आनतोर
20 तेबे इसराएली मंडली, मोसा लग ले बोहड़ुन गेला। 21 जितलो लोग चो मन हरिक होली, हुनमन आपलो मन-इछा ले, मिला-मिसा तम्बु, हुनचो सपाय बरन चो सेवा-बुता आउर पवितर फटईमन बनातो काजे जहोवा लगे भेंट आनला। 22 जितलो लोग चो मन-इछा होली, हुनमन सपाय सोन चो पिन, बाली-खिलवा, मूंदी आउर चूड़ीमन धरुन ईला। असन बरन ले जहोवा काजे लोगमन सोन चो भेंट दिला। 23 जितलो लोगमन लगे नीलिया, बांगा रंग आउर लाल रंग चो ऊन आउर मकमल फटई, आउर बोकड़ा रोंआ, नंगत सुकालो मेंडा-खाला, आउर सबुले नंगत खाला रये, हुनमन ए सपाय के आनला। 24 जितलो लोगमन लगे रूपा आउर कांस रये, हुनमन जहोवा काजे भेंट धरुन ईला, आउर जेचो-जेचो लगे बमूर रूक रये हुनमन बले जहोवा काजे हुनके दिला। 25 फेर नंगत कारिगिरी करतो बायलेमन, आपलो हाथ ले नीलिया, बांगा रंग, लाल रंग ऊन चो आउर मकमल चो तागलो सूत आनला। 26 फेर जितलो बायलेमन के कारिगिरी करतो बुद रली हुनमन बोकड़ा रोंआ के बले तागला। 27 मुखियामन, बड़े-पुजारी चो एपोद आउर छातीपटा ने बसातो काजे गोमेदक पकना आउर मनी-पकनामन आनला 28 आउर हुनमन दीया बारतो काजे जयतून तेल, अबिसेक तेल आउर नंगत बास देतो धूप बनातो काजे मसला आनला। 29 जोन-जोन तीजमन बनातो हुकुम जहोवा, मोसा बाटले देउन रये, सपाय बायले-मनुकमन आपलो-आपलो मन-इछा ले हुन तीजमन के भेंट आनला। असन बरन ले इसराएलिमन आपलो मन-इछा ले जहोवा काजे धन-धन भेंट आनला।
तम्बु बनातो काजे कारिगिरीमन के बाछतोर
30 तेबे मोसा इसराएलिमन के बललो, “सुना, जहूदा बंस चो बसलेल के जोन ऊरी चो बेटा आउर हूर चो नाती आय जहोवा हुनके नाव धरुन बाछलोसे। 31 जहोवा हुनके पवितर आत्मा ले भोरलोसे, जेचोले सपाय बरन-बरन चो तीजमन के बनातो बुद-गियान आउर सकत पावलोसे 32 कि हुन, कारिगिरी ले सोन-रूप, कांस 33 आउर हीरा-पकनामन काटुन बसातो आउर रूक-गोंदामन ने गोदतो आउर बरन-बरन चो कारिगिरी करुक सको। 34 फेर जहोवा, बसलेल चो मन ने आउर दान बंस चो अहीसामाक चो बेटा ओहोलीआब चो मन ने दुसरमन के सिखातो सकत दिलोसे। 35 ए दुनो के जहोवा असन बुद-गियान ले भोरलोसे कि हुनमन के मनी-पकना बसातोर, रूक-गोंदामन ने गोदतोर आउर नीलिया, बांगा रंग, लाल रंग चो ऊन आउर मकमल फटई ने गुथतोर बललोने, सपाय बरन चो तीजमन के बुद-गियान ले नंगत कारिगिरी ले करुक सकोत।”