36
बसलेल, ओहोलीआब आउर सपाय कारिगिरी करुमन के जहोवा, पवितर ठान चो सपाय बुता करतो समज आउर बुद-गियान दिलोसे, हुनमन जहोवा चो हुकुम हिसाब ले पवितर ठान चो सपाय बुता कारिगिरी ले करोत।पवितर ठान बनातो काजे तियार होतोर
2 तेबे मोसा, बसलेल, ओहोलीआब आउर सपाय कारिगिरी करुमन बललोने, जोनमन के जहोवा कारिगिरी करतो बुद-गियान देउन रये आउर जोनमन के महापरभु चो बुता करतो मन आसे हुनमन के हागदिलो। 3 तेबे हुनमन, पवितर ठान बनातो काजे इसराएलिमन जितलो बले धन-धन भेंट आनुन रला, मोसा चो हाथ ले धरला। रोजे बियाने इसराएलिमन आपलो मन-इछा ले भेंट आनते ची रला। 4 पवितर ठान चो कारिगिरी करुमन आपलाहान बुता के छांडुन मोसा लगे ईला। 5 हुनमन, मोसा लगे एउन बलला, “जोन बुता करतो काजे जहोवा हुकुम दिलोसे, हुनचो काजे लागतोले आगर भेंट लोग आनेसोत।” 6 तेबे मोसा, तमु-भाटा ने सपाय के हुकुम दिलो, “एदांय ले कोनी बले पवितर ठान काजे भेंट नी आना।” असन बरन ले लोगमन के भेंट आनतोले ठेबालो। 7 कसनबलले लोगमन पवितर ठान बनातो काजे लागतो तीजमन ले आगर आनुन रला।
तम्बु काजे पड़दामन बनातोर
8 सपाय बुद-गियान पावलो कारिगिरी करुमन, मिला-मिसा तम्बु काजे नीलिया, बांगा रंग, लाल रंग चो ऊन आउर तागलो सूत चो मकमल फटई ने, नंगत कारिगिरी ले करूबमन चो छापा गुथुन दस ठन पड़दामन बनाला। 9 गोटोक-गोटोक पड़दा अठाइस हाथ लाम आउर चार हाथ ओसार रली। सपाय पड़दा के गोटकी कटार चो बनाउन रला।
10 पांच ठन पड़दामन के गोटोक दुसर संगे जोड़ला आउर फेर दुसर पांच ठन पड़दामन के गोटोक-दुसर संगे जोड़ला। 11 पड़दा चो जोड़ान चो रेटे-रेटे नीलिया रंग चो फांदामन बनाला। उसनेची दुसर जोड़लो पड़दा काजे बले फांदामन बनाला 12 फेर गोटोक जोड़लो पड़दा चो रेटे दुय कोड़ी दस फांदामन बनाला, उसनेची दुसर जोड़लो पड़दा काजे बले फांदामन बनाला। दुनो पड़दामन चो फांदामन गोटोक-दुसर चो पुरे रये। 13 आउर हुता सोन चो पचास ओकसीमन बनाला आउर हुन ओकसीमन संगे पड़दामन के जोड़ला। असन बरन ले पड़दामन जोड़ुन गोटोक मिला-मिसा तम्बु बनली।
मिला-मिसा तम्बु काजे ओड़नामन
14 फेर मिला-मिसा तम्बु चो उपर भाग ढाकतो काजे बोकड़ा रोंआ चो इगारा ठन पड़दामन बनाला। 15 गोटोक-गोटोक पड़दा तीस हाथ लाम आउर चार हाथ ओसार रली। हुन सपाय इगारा ठन पड़दा के गोटकी कटार चो बनाला। 16 पांच ठन पड़दा के गोटोक-दुसर संगे जोड़ला आउर छय ठन पड़दा के गोटोक-दुसर संगे जोड़ला। 17 पईल जोड़लो पड़दा के जोड़तो काजे हुनचो रेटे दुय-कोड़ी दस फांदामन बनाला। उसने दुसर जोड़लो पड़दा के जोड़तो काजे बले हुनचो रेटे दुय-कोड़ी दस फांदामन बनाला। 18 पड़दामन के जोड़ुन गोटकी बनातो काजे कांस चो दुय-कोड़ी दस ठन ओकसीमन बनाला। 19 फेर तम्बु काजे नंगत सुकालो मेंडा-खाला चो गोटोक ओड़ना आउर हुनचो उपरे ढाकतो काजे सबुले नंगत खाला चो आउर गोटोक ओड़ना बनाला।
मिला-मिसा तम्बु के उबातो फारामन
20 पाछे, मिला-मिसा तम्बु के उबातो काजे बमूर रूक चो फारामन बनाला। 21 गोटोक-गोटोक फारा दस हाथ लाम आउर डेढ़ हाथ ओसार रली। 22 गोटोक-गोटोक फारा के गोटोक-दुसर ले जोड़ुन उबातो काजे दुय-दुय ठन खाचामन बनाला, तम्बु चो सपाय फारामन के असने ची बनाला। 23 तम्बु चो बेर-उदिया उजा बाट काजे एक कोड़ी फारामन बनाला 24 आउर एक कोड़ी फारामन के खाले बसातो काजे रूपा चो दुय कोड़ी बयटीमन बनाला। पईल फारा चो दुनो खाचामन काजे दुय ठन बयटीमन, आउर दुसर फारा चो दुनो खाचामन काजे दुय ठन बयटीमन बनाला। 25 तम्बु चो दुसर बाटे, बेर-उदिया चो डेबरी बाट काजे बले, एक कोड़ी फारामन बनाला। 26 एचो काजे बले, रूपा चो दुय-कोड़ी बयटीमन बनाला, गोटोक-गोटोक फारा खाले दुय-दुय ठन बयटीमन बनाला। 27 तम्बु चो पाटकुती, बेर-बुड़ती बाट काजे छय ठन फारामन बनाला। 28 तम्बु चो पाटकुती चो कोनामन काजे दुय ठन फारामन बनाला। 29 ए कोनामन चो फारामन खाले ले अलगे रला; मानतर ए फारामन चो टीपमन के गोटोक-गोटोक चूड़ा संगे जोड़ला; दुनो कोनामन चो फारामन उसनेची जोड़ुन रला; 30 असन बरन ले आठ ठन फारामन काजे रूपा चो सोला ठन बयटीमन बनाला, गोटोक-गोटोक फारा खाले दुय-दुय ठन बयटीमन बनाला।
31 फेर बमूर रूक चो डांडीमन बनाला, मिला-मिसा तम्बु चो गोटोक पाट चो फारामन काजे पांच ठन डांडीमन, 32 आउर दुसर पाट चो फारामन काजे पांच ठन डांडीमन आउर बेर-बुड़ती बाट चो फारामन काजे बले पांच ठन डांडीमन बनाला। 33 फारामन चो मंजिगता चो डांडी के, फारा चो आदो डेंग, गोटोक टोक ले धरुन दुसर टोक अमरतो असन बनाला 34 आउर फारामन उपरे सोन मड़ला, आउर डांडीमन ओलातो काजे सोन चो चूड़ामन बनाला, आउर डांडीमन के बले सोन मड़ला।
मिला-मिसा तम्बु चो भीतर-पड़दा
35 फेर हुनमन, नीलिया, बांगा रंग आउर लाल रंग चो ऊन आउर तागलो सूत चो मकमल फटई ले भीतर-पड़दा के बनाला आउर हुनी थाने करूबमन चो छापा के नंगत कारिगिरी ले बनाला। 36 भीतर-पड़दा काजे बमूर रूक चो चार ठन खमामन बनाला आउर हुनके सोन मड़ला। हुनचो ओकसीमन के बले सोन ले बनाला आउर रूपा चो चार ठन बयटीमन बनाला। 37 फेर तम्बु चो बाट-डेवना काजे बले नीलिया, बांगा रंग, लाल रंग चो ऊन आउर तागलो सूत चो मकमल फटई ले गोटोक पड़दा बनाला आउर हुता बाना गुथला। 38 हुन पड़दामन के ओरातो काजे पांच ठन खमामन आउर ओकसीमन बनाला। हुनमन चो मोंगरीमन आउर हुनमन के जोड़तो पाटीमन के बले सोन ले मड़ला, मानतर हुनचो पांच ठन बयटीमन के कांस चो बनाला।