बायदा चो डोली बनातोर
37
बसलेल, बमूर रूक चो गोटोक डोली बनालो। हुन ढाई हाथ लाम, डेढ़ हाथ ओसार आउर डेढ़ हाथ डेंग रली। 2 हुनके भीतरे-बाहरे निरवा सोन मड़लो आउर हुनचो चारो-कुती सोन चो पटी बनालो। 3 डोली चो चारो पांयमन ने लगातो काजे सोन चो चार ठन खाड़ुमन बनालो, हुनचो गोटोक पाटे दुय ठन खाड़ुमन आउर दुसर पाटे दुय ठन खाड़ुमन लगालो। 4 बमूर रूक चो डंडेयामन बनालो आउर हुनमन के सोन मड़लो। 5 डोली के बोअतो काजे हुनचो दुनो पाट चो खाड़ुमन ने डंडेयामन जोंगड़ालो। 6 फेर बायदा चो डोली काजे निरवा सोन ले गोटोक ढाकना बनालो, हुन ढाई हाथ लाम आउर डेढ़ हाथ ओसार रली। 7 फेर हुन, सोन ले कारिगिरी करुन दुय ठन करूबमन के बनालो; हुनमन के ढाकना उपरे दुनो पाट रेटे-रेटे लगालो। 8 गोटोक करूब के ढाकना चो गोटोक रेटे आउर दुसर करूब के दुसर रेटे बसालो। हुन, डोली चो ढाकना के आउर हुनचो करूबमन के गोटकी सोन चो गोंदा ले बनालो। 9 दुनो करूबमन, उपर ले आपलो पाटकी पसारुन डोली चो ढाकना के आड़ करुन रओत। हुन करूबमन चो थमना गोटोक-दुसर के दखते रओ आउर ढाकना बाटे रओ।पवितर टेबुल बनातोर
10 फेर हुन, बमूर रूक चो गोटोक टेबुल बनालो, हुन दुय हाथ लाम, गोटोक हाथ ओसार आउर डेढ़ हाथ डेंग रली। 11 हुनके निरवा सोन ले मड़लो आउर हुनचो चारो-कुती सोन चो पटी बनालो। 12 फेर हुन, टेबुल उपरे चारो-कुती चार अंडकी ओसार चो उबा पटरी बनाउन हुन पटरी चो चारो-कुती सोन चो पटी बनालो। 13 फेर हुन सोन चो चार ठन खाड़ुमन बनाउन टेबुल चो चारो पांयमन चो कोनामन ने खाड़ुमन लगालो। 14 डंडेयामन जोंगड़ाउन टेबुल के बोअतो काजे हुन खाड़ुमन के उबा पटरी लगे बनालो। 15 फेर टेबुल के बोअतो काजे बमूर रूक चो डंडेयामन बनालो आउर हुनचो उपरे सोन मड़लो। 16 टेबुल चो सपाय जाय-जमकमन, हुनचो परात, धूप गंधातो आरतीमन, कसलामन आउर बटकामन के निरवा सोन ले बनालो।
सोन चो लामन बनातोर
17 फेर हुन, निरवा सोन ले लामन बनालो। हुनचो पेंदी आउर लामन चो डांडी के नंगत कारिगिरी करुन बनालो; हुनचो फूल-ढेटीमन, फूल-गठमन आउर फूल-केरीमन, ए सपाय के निरवा सोन चो गोटकी गोंदा ले बनालो। 18 हुनचो छय ठन खेंदीमन बनालो, गोटोक पाटे तीन ठन खेंदीमन आउर दुसर पाटे तीन ठन खेंदीमन बनालो। 19 गोटोक-गोटोक खेंदी ने बादाम चो फूल असन तीन-तीन ठन फूल-ढेटीमन, फूल-गठमन आउर फूल-केरीमन बनालो। लामन चो छय ठन खेंदीमन ने असने बरन ले बनालो। 20 लामन चो डांडी ने, बादाम फूल असन चार ठन फूल-ढेटीमन, फूल-गठमन आउर फूल-केरीमन बनालो। 21 लामन चो दुय-दुय खेंदीमन चो जोड़ खाले बललोने, तीनो जोड़-खाले गोटोक-गोटोक फूल-गठ बनालो। 22 हुनचो फूल-गठमन आउर खेंदीमन के निरवा सोन चो गोटकी गोंदा ले कारिगिरी करुन बनालो। 23 लामन चो सातो दीया, आउर हुनके जतनातो जाकमन बललोने, कतरनीमन आउर सुपलीमन के निरवा सोन ले बनालो। 24 असन बरन ले, लामन आउर हुनचो सपाय तीज के एक कोड़ी चवदा किलो निरवा सोन ले बनालो।
धूप गंधातो बेदी के बनातोर
25 फेर हुन बमूर रूक ले धूप गंधातो बेदी बनालो। हुन चार-खुटिया रये आउर गोटोक हाथ लाम, गोटोक हाथ ओसार आउर दुय हाथ डेंग रली। हुन बेदी आउर हुनचो सींगमन के गोटकी रूक-गोंदा ले बनालो। 26 हुनचो उपरे, आउर हुनचो चारो पाट आउर हुनचो सींगमन के निरवा सोन ले मड़लो आउर हुनचो चारो-कुती सोन चो पटी बनालो। 27 हुनके डंडेयामन ने बोउन नेतो काजे सोन चो दुय ठन खाड़ुमन बनालो। हुनमन के बेदी चो दुनो पाट सोन चो पटी खाले लगालो। 28 हुन, बमूर रूक चो डंडेयामन बनाउन सोन मड़लो।
धूप आउर अबिसेक काजे तेल बनातोर
29 हुन, अबिसेक काजे पवितर तेल आउर नंगत बास देतो धूप बले बनालो।