होम-जतरा काजे बेदी बनातोर
38
फेर बसलेल, होम-जतरा काजे बमूर रूक चो गोटोक बेदी बनालो। हुन पांच हाथ लाम, पांच हाथ ओसार आउर तीन हाथ डेंग रली, हुन चार-खुटिया रली। 2 हुन बेदी चो चारो कोना ने चार ठन सींगमन बनालो। हुन, बेदी के आउर सींगमन के रूक चो गोटकी गोंदा ले बनालो आउर हुनके कांस मड़लो। 3 बेदी चो सपाय जाय-जमक बललोने, घघरामन, रापामन, तगाड़ीमन, काटामन आउर झीकरीमन के कांस चो बनालो। 4 हुन कांस चो गोटोक झंझरी बनालो आउर हुनके बेदी भीतरे आदो डेंग मंजारे लगालो। 5 डंडेयामन जोंगड़ातो काजे कांस चो झंझरी चो चारो कोनामन ने कांस चो चार ठन खाड़ुमन बनालो। 6 फेर हुन, बमूर रूक चो डंडेयामन बनाउन कांस मड़लो। 7 बेदी के बोअतो काजे बेदी चो कोनामन चो खाड़ुमन ने डंडेयामन जोंगड़ालो; असन बरन ले बसलेल, फारामन ले पोलका बिती बेदी बनालो।कांस चो गंगार बनातोर
8 फेर हुन, गोटोक कांस चो गंगार आउर हुनचो पांय के कांस ले बनालो। हुन गंगार के बसलेल, मिला-मिसा तम्बु दुआरे सेवा-बुता करु बायलेमन चो कांस चो दरपनमन* ले बनालो।
मिला-मिसा तम्बु चो दुआर बनातोर
9 फेर हुन मिला-मिसा तम्बु चो दुआर के बनालो। बेर-उदिया उजा बाट काजे सव हाथ लाम तागलो सूत चो मकमल फटई ले पड़दा बनालो। 10 हुन पड़दामन काजे कांस चो एक कोड़ी खमामन आउर एक कोड़ी बयटीमन बनालो। हुन खमामन काजे रूपा चो ओकसीमन आउर पाटीमन बनालो। 11 बेर-उदिया डेबरी बाट चो दुआर काजे बले सव हाथ लाम पड़दा बनालो, एचो काजे कांस चो एक कोड़ी खमामन आउर एक कोड़ी बयटीमन बनालो आउर खमामन काजे रूपा चो ओकसीमन आउर पाटीमन बनालो। 12 बेर-बुड़ती बाट चो सपाय पड़दामन दुय कोड़ी दस हाथ लाम रली। हुनचो काजे कांस चो दस ठन खमामन आउर दस ठन बयटीमन बनालो। खमामन काजे रूपा चो ओकसीमन आउर पाटीमन बनालो। 13 बेर-उदिया बाटे, तम्बु पुरे चो दुआर काजे बले दुय-कोड़ी दस हाथ लाम पड़दा बनालो।
मिला-मिसा तम्बु चो दुआर-देवड़ी काजे पड़दा
14 फेर दुआर चो गोटोक पाट काजे पंदरा हाथ लाम पड़दा ओरातो काजे तीन खमामन आउर तीन बयटीमन बनालो। 15 दुआर चो दुसर पाट काजे बले असनेचे पड़दा ओरालो बललोने, दुआर चो ए पाट आउर हुन पाट काजे पंदरा-पंदरा हाथ चो पड़दा रली। आउर हुनचो काजे तीन खमामन आउर तीन बयटीमन बनालो। 16 दुआर चो सपाय पड़दा के तागलो सूत चो मकमल फटई ले बनाउन रलो। 17 खमामन चो बयटीमन के कांस ले बनालो। मानतर ओकसीमन के आउर पाटीमन के रूपा ले बनालो। हुनमन चो मोंगरीमन के रूपा ले मड़लो, दुआर चो सपाय खमामन के रूपा चो पाटीमन ले जोड़ुन रलो।
18 तम्बु चो दुआर-बाट चो पड़दा के नीलिया, बांगा रंग, लाल रंग चो ऊन आउर तागलो सूत चो मकमल फटई ले नंगत ले बाना गुथुन बनाला, हुन एक कोड़ी हाथ लाम रली आउर दुआर चो पड़दा कटार इतलो पांच हाथ डेंग रली। 19 हुनचो काजे कांस चो चार ठन खमामन आउर चार ठन बयटीमन बनालो। हुनमन चो ओकसीमन के रूपा ले बनालो आउर हुनमन चो मोंगरीमन आउर हुनचो पाटीमन के रूपा ले मड़लो। 20 तम्बु चो आउर दुआर चो सपाय खुटीमन कांस चो रये।
मिला-मिसा तम्बु काजे बनालो तीजमन
21 मोसा चो हुकुम हिसाब ले, हारून पुजारी चो बेटा ईतामार, लेवीमन बाटले गनती कराउन लिखलो मिला-मिसा तम्बु चो सेवा-बुता करतो सपाय जाय-जमक चो हिसाब असन आय: 22 महापरभु जहोवा, मोसा के जोन-जोन जाय-जमकमन बनातो हुकुम देउ रये, हुन सपाय के जहूदा बंस चो हूर चो नाती आउर ऊरी चो बेटा बसलेल बनालो। 23 हुनचो संगे दान बंस चो अहीसामाक चो बेटा ओहोलीआब रये, जोन मनी-पकना काटुन बसातो, रूक-गोंदामन ने गोदतो आउर नीलिया, बांगा रंग, लाल रंग चो ऊन आउर मकमल फटई गाततो आउर नंगत कारिगरी ले बाना गुततो बीता रलो।
24 पवितर ठान बनातो काजे लोगमन भेंट ने आनलो सोन, पवितर ठान चो हिसाब ले एक हजार किलो रये। 25 इसराएल मंडली चो लोगमन दिलो भेंट, पवितर ठान चो हिसाब ले तीन हजार चार सव तीस किलो रूपा रये। 26 बीस बरक आउर हुनचो ले आगर उमर चो लोग छय लाख तीन हजार पांच सव पचास मनुकमन रला। हुनमन गोटोक-गोटोक झन हिसाब ले पवितर ठान काजे छय मासा रूपा दिला। 27 पवितर ठान आउर हुनचो भीतर-पड़दा चो बयटीमन के बनातो काजे बललोने, सव ठन बयटीमन काजे तीन हजार चार सव किलो रूपा लागली। गोटोक-गोटोक बयटीमन काजे एक कोड़ी चवदा किलो रूपा लागली। 28 आउर बाचलो तीस किलो रूपा ले खमामन काजे ओकसीमन बनाला, मोंगरीमन के रूपा मड़ला आउर हुनमन जोड़तो पाटीमन के रूपा ले बनाला। 29 भेंट दिलो कांस, दुय हजार चार सव एक कोड़ी पांच किलो रली। 30 एचोले मिला-मिसा तम्बु चो बाट-डेवना चो बयटीमन, कांस चो बेदी, कांस चो झंझरी आउर बेदी चो सपाय जाय-जमक के बनाला, 31 तम्बु-दुआर भोंवरक चो बयटीमन आउर तम्बु चो दुआर-देवड़ी चो बयटीमन के, तम्बु चो सपाय खुटीमन आउर तम्बु-दुआर भोंवरक चो सपाय खुटीमन के बले बनाला।