निकरुन जातोर 39

पुजारी सेवा-बुता काजे पवितर फटईमन

जसन जहोवा, मोसा के हुकुम देउन रलो, उसनेची हुनमन पवितर ठाने सेवा-बुता करु हारून पुजारी काजे नीलिया, बांगा रंग, आउर लाल रंग चो ऊन ले पवितर फटईमन बनाला।

2 हुनमन सोन चो तांत, नीलिया, बांगा रंग आउर लाल रंग चो ऊन आउर तागलो सूत चो मकमल फटई ले एपोद बनाला। 3 हुनमन सोन के ठेचुन-ठेचुन पातर बनाला आउर हुन पातर सोन के काटुन तांत बनाला। फेर हुन सोन चो तांत, नीलिया, बांगा रंग आउर लाल रंग चो ऊन आउर तागलो सूत चो मकमल फटई ने नंगत कारिगिरी करला। 4 एपोद काजे दुय ठन खांद-पटीमन बनाउन दुनो खांद ने एपोद के जोड़ला। 5 आउर जसन जहोवा, मोसा के हुकुम देउन रये, उसनेची एपोद के बांदतो करांडपटा के, सोन चो तांत, नीलिया, बांगा रंग आउर लाल रंग चो ऊन आउर मकमल फटई ले नंगत कारिगिरी करुन बनाला।

6 फेर हुनमन दुय ठन गोमेदक^* पकनामन के काटुन सोन चो खाचामन ने बसाला। फेर जसन कारिगिरी करुमन छापा गोदुआत, उसने दुनो मनी-पकनामन ने इसराएल चो बारा झन बेटामन चो नावमन के गोदला। 7 जसन जहोवा, मोसा के हुकुम देउन रलो, उसने मनी-पकनामन के एपोद चो दुनो खांद-पटीमन उपरे बसाला कि हुन मनी-पकनामन, इसराएल चो बेटामन के सूरता कराओ।

छातीपटा बनातोर

8 फेर हुनमन एपोद चो असन छातीपटा के बले सोन चो तांत, नीलिया, बांगा रंग आउर लाल-रंग चो ऊन आउर तागलो सूत चो मकमल फटई ने नंगत कारिगिरी ले बाना गुथुन बनाला। 9 छातीपटा के चार कुटिया आउर दुय-दुना करुन बनाला। दुय-दुना करतोके, हुन गोटोक भीता लाम आउर गोटोक भीता ओसार रये। 10 हुता चार ओरी बनाउन हीरा-पकनामन बसाला। पईल ओरी ने: मनी, पीतमनी, मरकत; 11 दुसर ओरी ने: पुखराज, नीलमनी आउर हीरा; 12 तीसर ओरी ने: धूमरकांत, लालमनी, जाकुत; 13 चवथा ओरी ने: पेरोज, गोमेदक, जसब। ए सपाय के सोन चो खाचामन ने बसाला। 14 इसराएल चो बेटामन चो नाव हिसाब ले बारा ठन हीरा-पकनामन रली। छापा गोदलो असन कारिगिरी ले बारा बंस चो गोटोक-गोटोक चो नाव के गोटोक-गोटोक पकना ने गोदला। 15 छातीपटा चो उपर भाग ने हुनमन, डोरी गुतलो असन निरवा सोन चो सिकरीमन बनाला; 16 फेर हुनमन, सोन चो दुय ठन खाचामन बनाला आउर सोन चो दुय ठन चूड़ीमन बनाउन छातीपटा चो दुनो रेटे चूड़ीमन के लगाला; 17 पाछे हुनमन, सोन चो दुय ठन सिकरीमन के छातीपटा चो रेटे रलो दुय ठन चूड़ीमन ने लगाला। 18 फेर दुनो सिकरीमन चो टीपमन के, सोन चो खाचा ने लगाला, आउर एपोद चो पुरे खांद-पटीमन ने ओराला। 19 फेर हुनमन, सोन चो दुय ठन चूड़ीमन बनाउन छातीपटा चो खाले-पाट भीतरे, दुनो रेटे, एपोद लगे लगाला। 20 सोन चो दुय ठन चूड़ीमन बनाला आउर दुनो खांद-पटीमन पुरे खाले पाट, एपोद चो गुतलो करांडपटा चो उपर पाट एपोद ने लगाला। 21 आउर जसन जहोवा, मोसा के हुकुम देउन रये, उसने छातीपटा चो खाले चो चूड़ीमन संगे एपोद चो चूड़ीमन ने नीलिया सुतरी संगे बांदला कि छातीपटा, एपोद चो करांडपटा उपरे रओ। असन बरन ले छातीपटा, एपोद ले अलग नी होओ।

पुजारी सेवा-बुता काजे दुसर फटई बनातोर

22 फेर अबगो नीलिया रंग चो ऊन चो सूत ले एपोद चो बागा के बनाला; 23 ए बागा के पींदतो काजे मंजिगता गोटोक भोंगा बनाला आउर हुन भोंगा चो भोंवरक धड़ी गुतला कि हुन नी चीरी होओ। 24 फेर हुनमन बागा चो आंचरा ने नीलिया, बांगा रंग आउर लाल रंग चो ऊन आउर तागलो सूत चो मकमल फटई ले अनार-पाकमन गुथुन बनाला। 25 फेर निरवा सोन चो घंटीमन बनाउन बागा चो खाले पाट आंचरा ने गुतलो अनार पाकमन चो भोंवरक लगाला; 26 बललोने, जसन जहोवा, मोसा के हुकुम देउन रये, उसने बागा चो खाले पाट आंचरा ने गोटोक सोन चो घंटी आउर गोटोक गुतलो अनार पाक, फेर गोटोक सोन चो घंटी आउर गोटोक गुतलो अनार पाक। उसने बागा चो भोंवरक लगाला कि हुनके पींदुन पुजारी सेवा-बुता करो।

27 फेर हुनमन, हारून आउर हुनचो बेटामन काजे मकमल फटई ले चोंगामन बनाला। 28 फेर मकमल फटई ले पागा, मकमल फटई ले टोपी आउर तागलो सूत चो मकमल फटई ले जंगियामन के बनाला। 29 करांडपटा के नीलिया, बांगा रंग आउर लाल रंग चो ऊन आउर तागलो सूत चो मकमल फटई ले बाना गुथुन बनाला। सपाय के जसन जहोवा, मोसा के हुकुम देउन रये, उसनेचे बनाला।

30 फेर हुनमन निरवा सोन ले पवितर किरोटी बनाला, हुता कारिगिरी ले “जहोवा काजे पवितर” गोदुन लिखला। 31 जसन जहोवा, मोसा के हुकुम देउन रये, उसने किरोटी के पागा उपरे नीलिया सुतरी संगे बांदला।

मिला-मिसा तम्‍बु बनाउन सारतोर

32 असन बरन ले मिला-मिसा तम्‍बु बनातो बुता सरली आउर जसन-जसन बुता करतो हुकुम जहोवा, मोसा के देउन रये, हुनी हिसाब ले सपाय बुता के इसराएलिमन करला। 33 तेबे हुनमन मिला-मिसा तम्‍बु आउर हुनचो बनालो सपाय जाय-जमक के मोसा लगे आनला बललोने, तम्‍बु चो ओकसीमन, फारामन, डांडीमन, खमामन आउर हुनचो बयटीमन, 34 नंगत सुकालो मेंडा-खाला चो ओड़ना, सबुले नंगत खाला चो ओड़ना, भीतर-पड़दा, 35 बायदा चो डोली, हुनचो ढाकना आउर हुनचो डंडेयामन, 36 टेबुल आउर हुनचो जाय-जमक, भेंट चो पवितर रोटी, 37 निरवा सोन चो लामन संगे हुनचो दीयामन आउर हुनचो जाय-जमक, हुनके बारतो काजे तेल, 38 सोन चो बेदी, अबिसेक काजे तेल, नंगत बास देतो धूप आउर तम्‍बु चो बाट-डेवना चो पड़दा, 39 कांस चो बेदी, कांस चो झंझरी, हुनचो डंडेयामन आउर हुता चो सपाय जाय-जमक, गंगार आउर हुनचो पांय, 40 दुआर चो पड़दामन, खमामन, बयटीमन, दुआर-बाट चो पड़दामन, डोरीमन, खुटीमन आउर मिला-मिसा तम्‍बु ने सेवा-बुता चो सपाय जाय-जमकमन के आनला। 41 पवितर ठान ने सेवा-बुता करतो काजे हारून पुजारी काजे गातलो फटई आउर हुनचो बेटामन चो फटईमन जेके हुनमन पींदुन पुजारी सेवा-बुता करतोर रली 42 बललोने, जोन-जोन हुकुम जहोवा, मोसा के देउन रलो हुनी हिसाब ले इसराएलिमन सपाय बुता करला। 43 तेबे मोसा हुनमन करलो सपाय बुता के नंगत ले दखलो आउर जहोवा चो हुकुम हिसाब ले करलासोत बलुन पावलो आउर मोसा हुनमन के बर दिलो।