मोसा मिला-मिसा तम्बु के उबातोर आउर हुनचो जाय-जमकमन के सजाउन संगातोर
40
फेर जहोवा, मोसा के बललो, 2 पईल मयना चो पईल दिने तुय मिला-मिसा तम्बु के उबा कर। 3 सबुले पवितर ठाने, बायदा चो डोली के संगाव आउर हुनके भीतर-पड़दा ले ढाकुन देस। 4 टेबुल के भीतरे नेउन जोन-जोन तीजमन के हुनचो उपरे सजातोर आय, सजाउन देस। एचो पाछे, लामन के भीतरे नेउन हुनचो दीयामन के सजाउन संगाव। 5 बायदा चो डोली पुरे चो भीतर-पड़दा पुरे धूप गंधातो सोन चो बेदी के मंडाव आउर तम्बु चो बाट-डेवना चो पड़दा के ओराउन देस। 6 मिला-मिसा तम्बु चो दुआरे होम-जतरा बेदी के संगाव। 7 मिला-मिसा तम्बु आउर बेदी चो मंजिगता गंगार के संगाव आउर हुता पानी भोरुन रा। 8 तम्बु चो चारोकुती दुआर के सजाव आउर दुआर-बाट ने पड़दा ओराउन देस। 9 अबिसेक चो तेल धरुन मिला-मिसा तम्बु के आउर हुता चो सपाय जाय-जमकमन के अबिसेक कर आउर हुता चो सपाय जमक के पवितर कर, तेबे हुन पवितर होयदे। 10 होम-जतरा बेदी के आउर हुनचो सपाय जाय-जमक के अबिसेक करुन पवितर कर, तेबे हुन सबुले पवितर होयदे। 11 गंगार के हुनचो पांय संगे अबिसेक करुन पवितर कर। 12 पाछे, हारून आउर हुनचो बेटामन के मिला-मिसा तम्बु दुआरे नेउन पानी ले आंग धोआव। 13 मोचो काजे पुजारी सेवा-बुता करतो काजे हारून के पवितर फटई पींदाव आउर हुनके अबिसेक करुन पवितर कर। 14 हुनचो बेटामन के बले चोंगा पींदाव। 15 जसन तुय हारून चो अबिसेक करसे उसनेची हुनचो बेटामन चो बले अबिसेक कर कि हुनमन मोचो काजे पुजारी सेवा-बुता करोत। हुनमन के अबिसेक करतोर पीड़ी-पीड़ी ने अमदेया काजे हुनमन चो पुजारीपन चो चीना होयदे।मोसा, मिला-मिसा तम्बु चो जाय-जमक के अबिसेक करुन पवितर करतोर
16 असन बरन ले जोन-जोन हुकुम जहोवा, मोसा के देउन रलो, हुन उसनेची करलो। 17 दुसर बरक चो पईल मयना चो पईल दिने मिला-मिसा तम्बु के उबालो। 18 मोसा मिला-मिसा तम्बु के उबा करलो; हुन, तम्बु चो बयटीमन संगाउन फारामन बसालो, आउर डंडेयामन लगालो आउर हुनचो खमामन उबालो; 19 जसन जहोवा, मोसा के हुकुम देउन रये, उसने हुन मिला-मिसा तम्बु के उबा करुन हुनचो उपरे ओड़ना ढाकलो। 20 फेर हुन, बायदा चो पटीमन के डोली भीतरे संगालो आउर हुनचो ढाकना के डोली उपरे संगालो, फेर डोली के बोअतो काजे हुनचो खाड़ुमन ने डंडेयामन के जोंगड़ालो। 21 जसन जहोवा, मोसा के हुकुम देउन रलो, उसनेची हुन डोली के तम्बु भीतरे आनलो आउर भीतर-पड़दा के लगालो। तेबे हुन बायदा चो डोली, भीतर-पड़दा चो आड़े होली। 22 फेर हुन मिला-मिसा तम्बु चो बेर-उदिया चो डेबरी बाटे भीतर-पड़दा चो बाहरे टेबुल के संगालो। 23 जसन जहोवा, मोसा के हुकुम देउन रलो, उसनेची हुन जहोवा चो पुरे टेबुल उपरे रोटी के सजाउन संगालो। 24 फेर हुन मिला-मिसा तम्बु चो बेर-उदिया उजा बाटे टेबुल चो पुरे लामन के संगालो, 25 आउर जसन जहोवा, मोसा के हुकुम देउन रलो, उसने दीयामन के जहोवा चो पुरे सजारुन संगालो। 26 फेर हुन मिला-मिसा तम्बु ने भीतर-पड़दा पुरे सोन चो बेदी के संगालो। 27 आउर हुता नंगत बास बिती धूप गंधालो, जसन जहोवा, मोसा के हुकुम देउन रलो। 28 हुन तम्बु चो बाट-डेवना ने पड़दा लगालो। 29 फेर हुन मिला-मिसा तम्बु दुआरे होम-जतरा बेदी के संगालो आउर हुता होम-जतरा आउर अरन-जतरा चेगालो। जसन जहोवा, मोसा के हुकुम देउन रलो। 30 फेर हुन मिला-मिसा तम्बु आउर बेदी चो मंजिगता गंगार के संगालो आउर हुता धोअतो काजे पानी भोरलो। 31 हुता मोसा, हारून आउर हुनचो बेटामन आपलाहान हाथ-पांय धोअला। 32 जसन जहोवा, मोसा के हुकुम देउन रलो, उसनेची हुनमन जेबे-जेबे मिला-मिसा तम्बु भीतरे ओलते रला, नोहले बेदी लगे जाते रला, तेबे-तेबे आपलो हाथ-पांय धोअते रला। 33 एचो पाछे, हुन मिला-मिसा तम्बु आउर बेदी चो भोंवरक पड़दा लगाउन दुआर बनालो आउर दुआर-बाट ने पड़दा ओरालो। असन बरन ले मोसा, तम्बु चो सपाय बुता के सारलो।
मिला-मिसा तम्बु उपरे जहोवा चो मयमा
34 तेबे मिला-मिसा तम्बु उपरे बादरी ढाकली आउर जहोवा चो मयमा-उजर तम्बु ने भोरली। 35 मोसा, मिला-मिसा तम्बु भीतरे ओलुक नी सकलो, कसनबलले तम्बु उपरे बादरी ठेबली आउर जहोवा चो मयमा-उजर ले तम्बु भोरली। 36 इसराएलिमन चो जातो बाटे, जेबे-जेबे मिला-मिसा तम्बु उपर ले बादरी उठते रये, तेबे-तेबे हुनमन हुता ले जाते रला। 37 मानतर जेबे बले हुन बादरी तम्बु उपर ले नी उठते रये, हुतलो दिन ले हुनमन हुताय ठेबुन रला। 38 इसराएलिमन जातो गुलाय बाटे, दिन बेरा मिला-मिसा तम्बु उपरे महापरभु जहोवा चो बादरी ढाकते रये आउर राती बेरा हुनी बादरी ने सपाय इसराएली लोग के आईग दखा देते रये।