50
तेबे जूसुफ आपलो बुआ के पोटारी होउन गागलो, आउर हुनके चूमलो। 2 जूसुफ आपलो सेवा करतो बईदमन के, आपलो बुआ इसराएल चो मोड़ी नी कुओ बलते, मोड़ी ने बास तेल आउर मसला घसतो हुकुम दिलो; तेबे बईदमन, जूसुफ सांगलो असन करला। 3 ए सपाय करतोने चालीस दिन लागली। कसनबलले मोड़ी के कुअतोले बचातो काजे बास तेल आउर मसला घसतोने इतलेही दिन लागुआय, मिसरीमन हुनचो काजे सतर दिन गागा-बोगा होला।4 गागा-बोगा होतो दिन सरलो पाछे जूसुफ, फिरोन चो कुटुम लोग के बललो, “तुमी मोचो ले हरिक आसास जाले मोचो गुहार फिरोन के सांगा, 5 मोचो बुआ असन बलुन किरिया खोआलो, ‘दख मय मोरतो असन होलेसे जोन करपन मय कनान ने खोड़ालेसे, तुय मोके हुताय माटी देस।’ एईकाजे मोके हुता जाउन बुआ के माटी देतो हुकुम देस, पाछे मय बोहड़ुन एयंदे।” 6 तेबे फिरोन बललो, “जा, तुचो बुआ चो खोआलो किरिया हिसाब ले हुनके माटी देस।”
7 एईकाजे जूसुफ, आपलो बुआ के माटी देउक गेलो। हुनचो संगे फिरोन चो सपाय कमेयामन, हुनचो माहाल चो सियानमन आउर मिसर देस् चो सपाय सियानमन बले गेला, 8 जूसुफ चो कुटुम चो सपाय लोग, हुनचो भाईमन, हुनचो बुआ घर चो सपाय लोग बले संगे गेला। मानतर हुनमन आपलो पिला-झीलामन, मेंडा-मेंडीमन आउर गाय-बयलामन के गोसेन परघन ने छांडुन गेला। 9 हुनमन संगे रथमन आउर हुता बसलो लोग बले गेला, तेबे खुबे बड़े भीड़ होली। 10 जिदलदांय हुनमन जरदन नंदी चो हुन पाट आताद चो कोठार लगे अमरला, तेबे हुता खुबे गागा-बोगा होला, आउर जूसुफ सात दिन होओतले आपलो बुआ काजे करलानी होते रये। 11 आताद चो कोठारे गागा-बोगा के दखुन हुन देस् ने रतो कनानीमन बलला, “ए मिसरीमन तो खुबे गागा-बोगा होयसोत।” एईकाजे हुन थान चो नाव आबेल-मिसरेम* पड़ली, ए जरदन नंदी चो हुन पाट आसे। 12 जाकूब* जोन बुतामन करतो काजे हुकुम देउ रये, हुनचो बेटामन उसने ची करला: 13 बललोने, हुनचो मोड़ी के कनान देस् ने नेउन मकपेला ने ममरे चो पुरे चो भुंये रलो करपन ने माटी दिला; जेके अबराहम, मोड़ा-भाटा काजे आपलो निज भुंय होओ बलुन हित्ती एपरोन ले घेनु रये।
जूसुफ आपलो भाईमन के भोरसा देतोर
14 आपलो बुआ के माटी देउन जूसुफ, आपलो भाईमन आउर हुनचो बुआ के माटी देउक गेलो लोगमन संगे मिसर देस् ने बोहड़ुन ईलो।
15 जूसुफ चो भाईमन आपलो बुआ मोरलोके असन बलुक मुरियाला, “एदांय जूसुफ आमके खेदुआय बे, आउर आमी जसन हुनचो अडरा करु रलु, हुनचो पलटा धरुआय बे।” 16 एईकाजे हुनमन जूसुफ लगे असन बलुक पठाला, “तुचो बुआ मोरतो ले आगे आमके असन हुकुम देउ रये, 17 ‘तुमी जूसुफ के असन बलुन गुहारा, तुय आपलो भाईमन चो पाप-दोख खेमा कर; आमी तुचो संगे अडरा करु रलु, मानतर एदांय तुय आपलो बुआ चो महापरभु चो कमेयामन के खेमा कर’।” हुनमन चो गोट के सुनुन जूसुफ गागलो। 18 आउर हुनचो भाईमन जाउन हुनके पांय पड़ला, आउर बलला, “दख, आमी तुचो कमेया आंव।” 19 जूसुफ हुनमन के बललो, “नी डरा, काय मय महापरभु आंय कि तुमके डंड देउक सकें? 20 तुमीमन मोचो अडरा करतो बिचार करलास, मानतर हुनी गोट के महापरभु, मोचो भलई काजे पलटलो, जेचोले आजी दखुक होयसे कि खुबे लोग चो जीव बाचलीसे। 21 एईकाजे एदांय नी डरा; मय तुमचो आउर तुमचो पिला-झीलामन चो पाला-पोसा करते रयंदे।” असन बरन ले जूसुफ हुनमन के समजा-बुजा करुन हुनमन के अस्तिर करलो।
जूसुफ चो मोरतोर
22 जूसुफ आपलो बुआ चो कुटुम संगे मिसर देस् ने रते रलो, जूसुफ एक सव दस बरक जीवलो। 23 जूसुफ आपलो जीव रलो बेरा एपरेम चो नाती-पुती दखलो; जूसुफ चो बेटा मनसे चो बेटा चो नाव माकीर रये। जूसुफ, माकीर चो बेटामन जनमतले जीव रउन हुनमन के आपलो कुटुम ने मिसालो। 24 जूसुफ आपलो भाईमन के बललो, “मय मोरतो असन होलेसे; मानतर महापरभु पक्का तुमके धियान देयदे, आउर तुमके ए देस् ले निकराउन हुन देस् ने नेयदे, जेके देतो काजे अबराहम, इसहाक आउर जाकूब ले बायदा करलोसे।” 25 फेर जूसुफ, इसराएलिमन के असन किरिया खोआउन बललो, “जेबे महापरभु तुमके धियान देयदे, तुमी मोचो हाड़ामन के बले एता ले हुन देस् ने नियासे।” 26 आउर जूसुफ एक सव दस बरक चो रलो बेरा मोरलो; हुनचो मोड़ी नी कुओ बलते बास तेल आउर मसला घसला, आउर मिसर देस् ने गोटोक पेटी* ने संगाला।