जाकूब मोरतो ले आगे आपलो बेटामन के बर देतोर
49
फेर जाकूब, आपलो सपाय बेटामन के हागदेउन बललो, “रूंडा होआ, मय तुमके एतो दिनमन ने तुमचो संगे होतो गोटमन सांगेंदे।2 ए जाकूब चो बेटामन, रूंडा होउन
आपलो बुआ इसराएल चो गोट के कान डेरुन सुना।
3 ए रूबेन, तुय मोचो पईलात बेटा आस,
मोचो सकत आउर मोचो जुवान-समो बेरा चो पईल फर आस;
तुय ची मान आउर सकत चो नंगत भाग आस।
4 तुय तो पानी असन केहेंचे होओ बोहुआस, एदांय मोचो दुसर बेटामन इतलो तुचो मान नी रयदे;
कसनबलले तुय आपलो बुआ चो खटेया ने सोवलीस
आउर मोचो ओचना के असुद करलीस!
5 सिमोन आउर लेवी भाई-भाई आत,
हुनमन चो खांडामन उबढंगरी बुता काजे आय।
6 ए मोचो मन, हुनमन चो गोट नी धर,
ए मोचो जीव, हुनमन चो मंडली ने नी मिस__
कसनबलले हुनमन रीस होउन लोगमन के मोरते मारला,
आउर आपलो हरिक काजे बयलामन के खोड़ेया बनाला।
7 हुनमन चो बाय-बिकाल रीस
आउर दया नोहलो जंजाल रीस के हाय लागो,
मय हुनमन चो थर के जाकूब चो बंस ने भिने-भिने करेंदे
आउर इसराएल देस् ने भिड़कायंदे।
8 ए जहूदा, तुचो भाईमन तुचो जय-जय करदे,
तुय तुचो हाथ ले बयरीमन चो टोडरा के धरसे,
तुचो बुआ चो बेटामन तुके डंडासरन करदे।
9 जहूदा, जुवान बीजापुलिया-बाग असन आय।
ए मोचो बेटा, तुय पारदी करुन करपन ने गेलीसीस:
हुन, बीजापुलिया-बाग नोहले बागिन असन घत ने बसलोसे;
फेर कोन हुनके खुरलाउक सकेदे?
10 हकदार सीलोह ले एओतले
राजपाट जहूदा चो हक ने रयदे,
आउर राज-गुबा हुनचो थर ने ची रयदे
राज-राज चो लोग हुनचो हक ने होदे।
11 हुन आपलो जुवान गदाहा के अंगुर-डीरा ने
आउर आपलो गदही पिला के नंगत बरन चो अंगुर डीरा ने बांदेदे,
हुन आपलो फटई के अंगुर रस ने
आउर आपलो कुड़ता के अंगुर चो लाल रस ने धोअलोसे।
12 हुनचो आंईकमन अंगुर-मंद ले आगर लाल दखेसे,
हुनचो दातमन गोरस ले आगर पंडरी आसे।
13 जबूलून, समदूर खंडे बसापत करेदे,
हुन ठान, पानी-जाहाजमन काजे नंगत घाट रयदे,
हुनचो राज चो संद सीदोन देस् लगले रयदे।
14 इसाकार, गोटोक बरसक गदाहा असन आय,
हुन पसु-कोटामन मंजारे बिसायसे।
15 हुन दखलो कि आपलो बिसातो ठान नंगत
आउर देस् सुंदर आसे,
एईकाजे बोजा बोअतो काजे लोंहलो
आउर कमेया बुता करुक मुरियालो।
16 दान, इसराएल बंस चो लोग असन
आपलो जात भाईमन चो नियाव करेदे।
17 दान, बाटे रतो साप आय,
खोरे रलो करीत साप असन आय,
हुन, घोड़ा चो पांय के चाबेदे,
जेचोले हुता बसलो बीता चित खाउन पड़ेदे।
18 ए जहोवा, मय तुचो बाटले मुक्ति पावतो बाट दखेंसे।
19 गाद चो बिरुद लड़ई करुक गोटोक खंगार गोहड़ी एयदे,
मानतर गाद, हुनमन के लड़ुन खेदेदे।
20 आसेर चो खादी-पीदी खुबे नंगत तीजमन ले होयदे,
आउर हुन, राजामन खातो असन सुवाद बिती खादी-पीदी देयदे।
21 नपताली, छुट ने रतो चीतर आय;
हुन सुंदर गोट गोटेयाउआय।
22 जूसुफ, फर धरलो गोटोक खेंदा आय,
हुन, पजरा लगे फर धरलो रूक आय;
हुनचो खेंदामन भीती उपर ले चेगुन गुलाय बिगरेदे।
23 धनु-कांडेयामन हुनचो बिरुद करला,
हुनमन हुनके बींदला आउर लड़ई करला।
24 मानतर हुनचो धनु चमकट रली
आउर हुनचो बांहामन के
जाकूब चो सकत महापरभु बाटले बल-बपू मिरली,
जोन इसराएल चो धोरई आउर सकत सिलपट आय।
25 तुचो बुआ चो महापरभु तुके साहरा करेदे,
हुन सबुले सकत महापरभु तुके,
उपर सरग ले,
खाले गड़िया पानी ले,
आउर पिला-झीला पावतो आउर पोसतो बर देयदे।
26 तुचो बुआ ले मिरतो बर
जुग-जुग रतो डोंगरीमन
आउर जुग-जुग रतो सिगमन ले बले खुबे बरसक रयदे,
ए सपाय बर जूसुफ चो मुंडे
आउर हुनचो कपार ने रओ जोन आपलो भाईमन ले बाछलोर आय।
27 बिनयामीन चीरतो डुरकी आय,
बियाने पारदी करुआय,
आउर सांज बेरा झीका-उड़मा करलो तीज के बाटुआय।”
28 एईमन इसराएल चो बारा बंस आत; आउर एई गोटमन ले हुनमन चो बुआ हुनमन के बर दिलो, हुन, हुनमन ले सपाय के हुनमन चो गुन हिसाब ने बर देउ रये।
जाकूब चो मोरतोर आउर हुनके माटी देतोर
29 तेबे हुन, हुनमन के असन हुकुम दिलो, “दखा, मय आपलो पुरखा-पाटी लगे जाउआय बे! एईकाजे मोके मोचो दादी-पेपी के माटी दिलोर हित्ती एपरोन चो बाड़ी ने रलो करपन ने माटी दियास 30 बललोने, हुनी करपन ने, जोन कनान देस् ने ममरे चो पुरे मकपेला चो भुंय ने आसे; हुन भुंय के अबराहम, हित्ती एपरोन ले एईकाजे घेनलो कि हुनके मोड़ा-भाटा बनातो काजे हुनचो निज भुंय होओ। 31 हुता अबराहम आउर हुनचो बायले सारा के माटी दिला; हुता इसहाक आउर हुनचो बायले रिबका के बले माटी दिला; आउर लिआ के बले मय हुताय माटी दिले। 32 हुन भुंय आउर हुता चो करपन के हित्तीमन चो हाथ ले घेनलोर आसे।” 33 जाकूब आपलो बेटामन के असन हुकुम देउन सारलो पाछे, आपलो खटेया ने लोंडुन जीव छांडलो आउर आपलो पुरखा-पाटी संगे मिसलो।