जाकूब, एपरेम आउर मनसे के बर देतोर
48
गोटोक दिने, जूसुफ के कोनी सांगलो, “तुचो बुआ बेमार पड़लोसे।” तेबे जूसुफ आपलो दुनो बेटामन मनसे आउर एपरेम के धरुन हुनचो लगे जातो काजे निकरलो। 2 जाकूब के कोनी सांगलो, “तुचो बेटा जूसुफ तुचो लगे एयसे।” तेबे इसराएल आपने के समालुन खटेया ने बसलो। 3 जाकूब, जूसुफ के बललो, “सबुले सकत महापरभु, कनान देस् चो लूज सहर ने मोके दरसन देउन असन बर दिलो, 4 ‘सुन, मय तुचो लेउर बड़ाउन तुके खुबे बाड़ती करायंदे, तुचो थर के राज-राज ने खुबे बाड़ती कराउन तुचो पाछे तुचो बंस के ए देस् देयंदे आउर अमदेया काजे हुनचो हकदार बनायंदे।’ 5 मोचो मिसर एतो ले आगे मिसर देस् ने जनमलो तुचो दुनो बेटामन, एदांय मोचेई होदे; बललोने जसन रूबेन आउर सिमोन मोचो आत उसने एपरेम आउर मनसे बले मोचेई होदे। 6 हुनमन चो पाछे जनमलो पिलामन तुचो तो होदे; मानतर भुंय-बाड़ी बाटतो बेरा हुनमन चो भाईमन संगे हुनमन चो बले हक रयदे। 7 मय पदन-अराम ले एतो बेरा एफराता अमरा-अमरी के कनान देस् चो बाटे राहेल मोरली; मय हुनके एफराता जातो बाटे माटी दिले” (जेके बेतलहम बले बलसोत।)8 इसराएल, जूसुफ चो बेटामन के दखुन पूछलो, “एमन कोन आत?” 9 जूसुफ आपलो बुआ के बललो, “एमन, महापरभु मोके एता दिलो मोचो बेटामन आत।” जाकूब बललो, “हुनमन के मोचो लगे आन, मय हुनमन के बर देयंदे।” 10 इसराएल* डोकरा होलो किरता हुनके झांवरी-झांवरी ची दखा देते रये। एईकाजे जूसुफ, हुनमन के हुनचो लगे नीलो; जाकूब हुनमन के पोटारुन चूमलो। 11 तेबे इसराएल, जूसुफ के बललो, “मोके फेर ले तुके दखतो आसा नी रली : मानतर दख, महापरभु मोके तुचो थर के बले दखालो।” 12 तेबे जूसुफ, पिलामन के हुनचो कोरा ले गुचाउन भुंये पाटा पड़ुन डंडासरन करलो। 13 जूसुफ हुन दुनो के बललोने एपरेम के इसराएल चो डेबरी बाटे पड़ो बलते आपलो उजा बाटे संगालो, आउर मनसे के इसराएल चो उजा बाटे पड़ो बलते आपलो डेबरी बाटे करुन हुनचो लगे नीलो। 14 मानतर इसराएल आपलो उजा हाथ नानी बेटा एपरेम चो मुंडे आउर आपलो डेबरी हाथ मनसे चो मुंडे थापलो; मनसे तो बड़े रलो मानतर जानुन-बुजुन हुन असन करलो। 15 फेर हुन, जूसुफ के बर देउन बललो,
“जोन महापरभु चो बाट ने मोचो पुरखा, अबराहम आउर इसहाक चलते रओत,
हुनी महापरभु, मोचो जनम ले धरुन एबतले, धोरई असन मोके बाट दखायसे;
16 जोन दूत मोके सपाय बिपती ले छंडालो, हुनी एदांय ए लेकामन के बले बर देओ;
आउर एमन बाटले मोचो आउर मोचो पुरखा, अबराहम आउर इसहाक चो मान बाड़ो;
आउर मंजपुर ने एमन चो खुबे लेउर बाड़ो।”
17 आपलो बुआ, एपरेम उपरे उजा हाथ थापलो के दखुन जूसुफ के अडरा लागली; एईकाजे हुन आपलो बुआ चो हाथ एपरेम चो मुंड ले गुचाउन मनसे चो मुंडे संगातो बिचार ले धरलो। 18 जूसुफ आपलो बुआ के बललो, “ए बुआ, पईलात बेटा एई आय, एचो उपरे आपलो उजा हाथ संगाव।” 19 मानतर हुनचो बुआ बललो, “नाई, ए मोचो बेटा सुन, मय ए गोट के पक्का जानें : एचो बाटले बले लोग खुबे जन होदे, आउर ए बले माहान होयदे, तेबले बले एचो नानी भाई एचो ले आगर माहान होयदे, आउर हुनचो थर ने खुबे जात-जात चो लोगमन निकरदे।” 20 फेर जाकूब हुनी दिने हुनमन के असन बलुन बर दिलो,
“इसराएलिमन तुमचो नाव धरुन असन बर देदे,
‘महापरभु तुके एपरेम आउर मनसे असन बनाओ’।”
आउर हुन, मनसे ले आगे एपरेम चो नाव धरलो। 21 तेबे इसराएल, जूसुफ के बललो, “दख, मय तो मोरतो असन होलेसे : मानतर महापरभु तुमीमन संगे रयदे आउर तुमके, तुमचो पुरखामन चो देस् ने फेर अमरायदे। 22 मय तुके तुचो भाईमन ले आगर गोटोक भुंय-बाटा देयंसे बललोने, सेकेम डोंगरी, जेके मय मोचो खांडा आउर धनु चो सकत ले एमोरेयामन ले जीतु रले।”