47
तेबे जूसुफ, फिरोन लगे जाउन ए खबर दिलो, “मोचो बुआ आउर मोचो भाईमन, आपलो छेरी-मेंडीमन, गाय-बयलामन आउर आपलो सपाय के धरुन कनान ले ईलासोत; हुनमन एबे गोसेन परघन ने आसोत।” 2 जूसुफ आपलो भाईमन ले पांच झन के फिरोन चो पुरे आनलो। 3 फिरोन हुनचो भाईमन के पूछलो, “तुमी काय बुता करुआहास?” हुनमन फिरोन के बलला, “आमी तुचो कमेयामन धोरईमन आंव, आउर आमचो पुरखामन बले धोरई रला।” 4 हुनमन फिरोन के फेर बलला, “आमी ए देस् ने परदेसिया होउन रतो काजे ईलुसे; कसनबलले कनान देस् ने खुबे भूक पड़लो किरता तुचो कमेयामन चो छेरी-मेंडीमन काजे चारा नीआय; एईकाजे आपलो कमेयामन के गोसेन परघन ने रउक देस।” 5 तेबे फिरोन, जूसुफ के बललो, “तुचो बुआ आउर तुचो भाईमन तुचो लगे ईलासोत, 6 मिसर देस् तुचो हाथे आसे; ए देस् चो सबु ले नंगत ठान ने तुचो बुआ आउर भाईमन के बसापत कराउन देस। हुनमन गोसेन परघन ने ची रओत; आउर तुचो नंजर ने हुनमन ले कोकेई, जनावरमन के नंगत ले दखा-राखा करतो गुन आसे जाले मोचो पसुमन के हुनचेई जुमे सोपुन देस।” 7 तेबे जूसुफ आपलो बुआ जाकूब के फिरोन चो पुरे आनलो; आउर जाकूब, फिरोन के बर दिलो। 8 तेबे फिरोन, जाकूब के पूछलो, “तुचो कितलो उमर होलीसे?” 9 जाकूब, फिरोन के बललो, “मय तो परदेसिया होउन एक सव तीस बरक जीवलेसे, मोचो जीवना खिंडिक दिन चो रली आउर दुख-तकलीस ले भोरु रली, एबतले मय मोचो पुरखा-पाटी परदेसिया होउन जीवलो इतलो नी जीवलेसे।” 10 जाकूब, फिरोन के बर देउन हुनचो पुरे ले गेलो।11 तेबे जूसुफ आपलो बुआ आउर भाईमन के बसापत करालो आउर फिरोन चो हुकुम हिसाब ने मिसर देस् चो सबु ले नंगत रामसेस भुंय हुनमन के सोपलो। 12 जूसुफ आपलो बुआ, भाईमन आउर कुटुम-लोग चो पिलामन चो गनती हिसाब ले खादी-पीदी देउन पोसुक मुरियालो।
भूक-पड़ा बेरा जूसुफ दखा-राखा करतोर
13 गुलाय देस् ने खातो काजे काई ची नी बाचली; कसनबलले बड़े भारी भूक-पड़ुन रये, भूक-पड़ा किरता मिसर देस् आउर कनान देस् नास होली। 14 जूसुफ, मिसर देस् आउर कनान देस् चो लोग, अरन घेनलो सपाय पयसा के रूंडाउन फिरोन चो माहाल ने अमराउन दिलो। 15 मिसर देस् आउर कनान देस् चो पयसा सरलोके मिसरीमन जूसुफ लगे एउन बलला, “आमके खातो तीज देस, तुचो रउ-रउ आमचो लगे पयसा नीआय गुने काय आमी तुचो पुरे भूके मोरुंदे?” 16 जूसुफ बललो, “पयसा नीआय जाले आपलाहान पसुमन के दियास, तेबे मय हुनमन चो पलटा तुमके खातो तीज देयंदे।” 17 एईकाजे हुनमन आपलाहान पसुमन, जूसुफ लगे आनला; आउर जूसुफ हुनमन चो घोड़ामन, छेरी-मेंडीमन, गाय-बयलामन, आउर गदाहामन चो पलटा खातो तीजमन देउक मुरियालो; हुन बरक सपाय बरन चो पसुमन चो पलटा खादी-पीदी देउन हुन, हुनमन के पोसलो। 18 हुन बरक सरलोके हुनमन हुनचो लगे एउन बलला, “आमी आमचो मालिक ले ए गोट के नी लुकाउं, आमचो पयसा-कोहड़ी सरली, आमचो सपाय बरन चो पसुमन आमचो मालिक चो आसोत; एईकाजे आमचो लगे एबे आमचो मालिक के देतो लाईक आमचो देहें आउर भुंय के छांडुन आउर काई नीआय। 19 आमी काय काजे तुचो पुरे मोरुआंव, आमी आउर आमचो भुंय काय काजे नास होउआय? खादी चो पलटा, आमके आउर आमचो भुंय के धर। आमी आमचो भुंय-बाड़ी संगे फिरोन चो कमेया होउंदे, आउर आमके बीच देस, तेबे आमी नी मरुं, जीव रउंदे, आउर भुंय बले सत्यानास नी होये।”
20 तेबे जूसुफ, मिसर देस् चो सपाय भुंय के फिरोन काजे घेनलो; कसनबलले जंजाल भूक पड़लोके मिसरीमन आपलाहान बेड़ामन के बिकला; असन बरन ले सपाय भुंय फिरोन चो होली। 21 मिसर देस् चो गोटोक कोना ले धरुन दुसर कोना ने रतो सपाय रयत के कमेया बुता करुक पड़ली। 22 मानतर पुजारीमन चो भुंय के हुन नी घेनलो; कसनबलले पुजारीमन के फिरोन बाटले अमदेया खादी-पीदी मिरते रये, आउर फिरोन चो दिलो खादी-पीदी ले हुनमन चो जीवना-खावना चलते रये, एईकाजे हुनमन के आपलो भुंय बिकुक नी पड़ली। 23 तेबे जूसुफ, लोगमन के बललो, “सुना, एबे मय तुमके आउर तुमचो भुंय के फिरोन काजे घेनलेसे; दखा, तुमचो काजे एता बीच आसे, एके तुमी भुंये बुना। 24 मानतर एता जितलो उबज होयदे, हुनचो पांच भाग ले गोटोक भाग फिरोन के दियास, आउर चार भाग तुमचो काजे, तुमचो पिला-झीलामन आउर घर-लोग चो खातो काजे आउर तुमचो बेड़ा ने बुनतो काजे होयदे।” 25 हुनमन बलला, “तुय आमके बचालीसीस; आमचो मालिक आमचो ले अमदेया हरिक रओ, आमी फिरोन चो कमेया बनुन रउंदे।” 26 जूसुफ, मिसर देस् चो भुंय चो बारे ने असन नियम बनालो कि पांच भाग ले गोटोक भाग फिरोन के मिरो; हुन नियम एबे बले चलेसे, सोजे पुजारीमनचेई भुंय फिरोन चो नी होली।
जाकूब चो सरासरी मन-इछा
27 इसराएलिमन, मिसर देस् चो गोसेन परघन ने रते रओत; हुता चो भुंय हुनमन चो हक ने रये; हुनमन खुबे जन होला आउर बाड़ती करला।
28 मिसर देस् ने जाकूब सतरा बरक जीव रलो: असन बरन ले जाकूब एक सव सयंतालीस बरक जीवलो। 29 इसराएल आपलो सरासरी दिनमन ने आपलो बेटा जूसुफ के हागदेउन बललो, “तुय मोचो ले हरिक आसीस जाले मोचो जांघ खाले हाथ थापुन किरिया खा कि तुय मोचो उपरे दया आउर सत दखाउन मोके मिसर देस् ने माटी नी देसे। 30 मानतर मय मोरलोदांय मोके मिसर देस् ले नेउन मोचो पुरखा-पाटी चो मोड़ा-भाटा ने माटी देसे।” तेबे जूसुफ बललो, “मय तुचो बललो गोट असने ची करेंदे।” 31 जाकूब फेर बललो, “मोचो ले किरिया खा।” तेबे जूसुफ किरिया खादलो आउर इसराएल आपलो खटेया ने खाले मुंडी करुन पारथना करलो।