जाकूब (इसराएल) आपलो सपाय कुटुम संगे मिसर देस् जातोर
46
तेबे इसराएल* आपलो सपाय के धरुन मिसर देस् जातो काजे निकरलो आउर बेरसेबा अमरुन आपलो बुआ इसहाक चो महापरभु काजे हुता जतरा चेगालो। 2 तेबे महापरभु राती बेरा इसराएल के दरसन देउन बललो, “ए जाकूब! ए जाकूब!” जाकूब बललो, “दख, मय एताय आंसे।” 3 हुन बललो, “मय महापरभु, तुचो बुआ चो महापरभु आंय, तुय मिसर देस् जातो काजे नी डर; हुता मय तुचो ले गोटोक बड़े जात बनायंदे। 4 मय तुचो संगे-संगे मिसर देस् एयंदे, आउर मय तुके पक्का हुता ले निकराउन आनेंदे; तुचो मोरतो बेरा जूसुफ खुदे आपलो हाथ ले तुचो आंईकमन के ढाकेदे।”5 तेबे इसराएल चो बेटामन आपलो बुआ, आपलो बायलेमन आउर आपलो पिला-झीलामन संगे फिरोन चो पठालो रथमन ने बसुन बेरसेबा ले निकरला। 6 जाकूब आउर हुनचो बेटामन आपलो छेरी-मेंडीमन, गाय-बयलामन आउर कनान ने रूंडालो आपलो धन-माल के धरुन मिसर देस् ने ईला। 7 जाकूब आपलो बेटा-बेटीमन, नाती-पुतीमन आउर आपलो कुटुम चो सपाय लोग के धरुन मिसर देस् ने ईलो।
8 मिसर देस् ने ईलो इसराएलिमन एमन आत, जाकूब, हुनचो बेटामन, हुनचो नाती-पुतीमन। हुनमन चो नाव ए आय : जाकूब चो बड़े बेटा रूबेन; 9 रूबेन चो बेटामन हनोक, पललू, हेसरोन आउर करमी रला। 10 सिमोन चो बेटामन: जमूएल, जामीन, ओहद, जाकीन, सोहर आउर कनानी बायले ले जनमलो साऊल बले रये। 11 लेवी चो बेटामन गेरसोन, कहात आउर मरारी रला। 12 जहूदा के एर, ओनान, सेला, पेरेस आउर जेरह नाव चो बेटामन रला; मानतर एर आउर ओनान, कनान देस् ने ची मोरला; पेरेस चो बेटामन, हिसरोन आउर हामूल रला। 13 इसाकार चो बेटामन, तोला, पुब्बा, जोब आउर सिमरोन रला। 14 जबूलून चो बेटामन, सेरेद, एलोन, आउर जहलेल रला। 15 लिआ आउर जाकूब ले पदन-अराम ने जनमलो बेटामन एईमन आत, हुनमन चो गोटोक बेटी दीना बले रली; असन बरन ले हुनचो बेटा-बेटीमन तंयतीस झन रला।
16 गाद चो बेटामन, सियोन, हेगी, सूनी, एसबोन, एरी, अरोदी आउर अरेली रला। 17 आसेर चो बेटामन, इमना, इसवा, इसवी आउर बरीआ रला, हुनमन चो बईन सेरह रली; बरीआ चो बेटामन हेबेर आउर मलकीएल रला। 18 जिलपा के लाबान आपलो बेटी लिआ चो कमेयीन होतो काजे देउ रलो, हुनचो बेटा नाती-नतरा एईमन रला। हुनचो बाटले जाकूब चो सोला झन पिला-झीलामन रला।
19 जाकूब चो बायले राहेल चो बेटामन जूसुफ आउर बिनयामीन रला। 20 मिसर देस् ने ओन चो पुजारी, पोतीपेरा चो बेटी आसनत ले जूसुफ के दुय झन बेटामन मनसे आउर एपरेम होला। 21 बिनयामीन चो बेटामन, बेला, बेकेर, असबेल, गेरा, नामान, एही, रोस, मुपीम, हुपीम आउर आरद रला। 22 राहेल के जाकूब बाटले जनमलो बेटामन एईमन आत; हुनमन चो थर ने चवदा लोग रला।
23 दान चो बेटा हूसीम रलो। 24 नपताली चो बेटामन, जहसेल, गूनी, सेसेर आउर सिलेम रला। 25 बिलहा के लाबान आपलो बेटी राहेल चो कमेयीन होतो काजे दिलो, हुनचो बेटा-बेटी, नाती-नतरा एईमन आत; एचो बाटले जाकूब चो सात झन पिला-झीलामन रला।
26 जाकूब चो थर ले जोनमन मिसर देस् ने ईला, हुनचो बुआरीमन के छांडुन छंयसठ झन रला। 27 जूसुफ बाटले मिसर देस् ने जनमलो बेटामन दुय झन रला; असन बरन ले जाकूब चो कुटुम चो सपाय लोग सतर झन रला।
मिसर देस् ने जाकूब आउर हुनचो कुटुम लोग
28 इसराएल, जहूदा के जूसुफ लगे आपलो ले आगे पठालो कि जूसुफ एउन गोसेन चो बाट दखाओ; आउर हुनमन गोसेन परघन ने ईला। 29 तेबे जूसुफ आपलो रथ तियार करुन आपलो बुआ इसराएल के भेटतो काजे गोसेन ने गेलो। हुन बुआ के दखुन पोटारी होलो आउर खुबेदांय ले गागते रये। 30 तेबे इसराएल, जूसुफ के बललो, “एदांय मोरले बले मोके फिकिर नीआंय, कसनबलले तुय जीव आसीस, आउर तुचो थमना दखुक मिरली।” 31 तेबे जूसुफ आपलो भाईमन के आउर आपलो बुआ चो कुटुम लोग के बललो, “मय जाउन फिरोन के असन खबर देयंदे, ‘कनान ने रतो मोचो भाईमन आउर मोचो बुआ चो कुटुम लोगमन मोचो लगे ईलासे। 32 हुनमन धोरईमन आत, आउर जनावरमन पोसुआत; एईकाजे हुनमन आपलो छेरी-मेंडीमन, गाय-बयलामन आउर हुनमन चो सपाय के धरुन ईलासोत।’ 33 जेबे फिरोन तुमके हागदेउन ‘तुमी काय बुता करुआहास’ बलुन पूछले 34 तुमी असन सांगा, ‘आमी तुचो कमेयामन, पिला बेरा ले धरुन एबतले छेरी-मेंडी चराउमन आंव आउर आमचो पुरखामन बले असने ची करते रओत।’ तेबे तुमी गोसेन ने रउक सकासे; कसनबलले सपाय मिसरीमन धोरईमन के घिनियाउआत।”