जूसुफ आपलो बारे ने भाईमन के सांगतोर
45
तेबे जूसुफ, सपाय लोग पुरे आपने के समालुक नी सकलो आउर जोर ले बललो, “मोचो लगे रलो सपाय लोग के बाहरे निकराहा।” एईकाजे जूसुफ आपलो बारे ने भाईमन के सांगतो बेरा हुन लगे आउर कोनी नी रला। 2 हुन किरकिरुन-किरकिरुन गागुक मुरियालो; एके मिसरीमन सुनला, आउर फिरोन चो घर लोग के बले एचो खबर मिरली। 3 तेबे जूसुफ आपलो भाईमन के बललो, “मय जूसुफ आंय, काय मोचो बुआ एबतले जीव आसे?” मानतर हुनचो भाईमन एचो उत्तर देउक नी सकला, कसनबलले हुनमन हुनके खुबे डरुन रला। 4 तेबे जूसुफ आपलो भाईमन के “मोचो लगे इआ” बललो, हुनमन हुनचो लगे गेलोके हुन बललो, “मय तुमचो भाई जूसुफ आंय, तुमी मोके मिसर देस् जातो लोगमन चो हाथे बिकु रलास। 5 एदांय तुमी नी खिसियाहा आउर तुमी मोके बीकलो किरता मुरमुरा नी होआ; कसनबलले महापरभु लोगमन चो जीव बचातो काजे मोके एता तुमचो ले आगे पठालोसे। 6 एबे दुय बरक ले भूक पड़लीसे; आउर पांच बरक असने ची रयदे ता, ए समया ने नांगर नी जोपदे आउर धान-पान बले नी होयदे। 7 मानतर महापरभु मोके तुमचो ले आगे एता पठालो कि तुमचो पिला-झीलामन होओत आउर तुमचो बंस बाड़ोत। 8 असन बरन ले, मोके एता पठालो लोग तुमी नोआहास, मानतर महापरभु ची आय; हुनी मोके फिरोन चो बुआ असन, हुनचो घर चो मालिक आउर गुलाय मिसर देस् चो राजपाल बनालोसे। 9 एदांय तुमी झटके मोचो बुआ लगे जाउन बला, ‘तुचो बेटा जूसुफ असन बलेसे, महापरभु मोके गुलाय मिसर देस् चो मालिक बनालोसे; एईकाजे तुय बेर नी कर, झटके आव। 10 तुय गोसेन परघन ने बसापत करसे, तुचो बेटामन, नाती-पुतीमन, छेरी-मेंडीमन, गाय-बयलामन आउर आपलो सपाय तीज संगे तुय मोचो लगे रसे। 11 एतो पांच बरक चो भूक पड़ा बेरा मय तुके हुताय पाला-पोसा करेंदे; नोहले तुचो कुटुम आउर तुचो सपाय लोग भूके मोरदे।’ 12 तुमी खुदे दखसाहास आउर मोचो भाई बिनयामीन बले दखेसे, मय जूसुफ तुमचो संगे गोटेयायंसे। 13 मिसर देस् ने तुमी मोचो ठाट-बाट दखलासाहास, हुन सपाय के मोचो बुआ के सांगा; आउर झटके मोचो बुआ के एता आना।” 14 तेबे जूसुफ आपलो भाई बिनयामीन के पोटारुन गागलो; आउर बिनयामीन बले हुनके पोटारुन गागलो। 15 हुन आपलो सपाय भाईमन के बले चूमुन गागलो; आउर पाछे हुनचो भाईमन हुनके गोटेयाला।16 जूसुफ चो भाईमन ईलो गोट फिरोन चो माहाल ने बले अमरली, एके सुनुन फिरोन आउर हुनचो कमेयामन हरिक होला। 17 एईकाजे फिरोन, जूसुफ के बललो, “तुचो भाईमन के सांग, ‘अरन के जनावरमन ने लतुन कनान देस् बोहड़ुन जाओत 18 आउर आपलो बुआ आउर आपलाहान घर चो लोग के धरुन मोचो लगे एओत; मय मिसर देस् चो सबु ले नंगत भुंय तुमके देयंदे, आउर तुमके देस् चो सबु ले नंगत तीजमन खाउक मिरेदे।’ 19 एदांय तुय मोचो बाटले हुनमन के असन हुकुम देस, ‘आपलो पिला-झीलामन, बायलेमन आउर आपलो बुआ के आनतो काजे मिसर देस् ले रथमन धरुन जाओत। 20 तुमी आपलो काजे धन-माल चो फिकिर नी करा; कसनबलले मिसर देस् ने जोन सबुले नंगत आय हुन तुमचो आय’।”
21 एईकाजे इसराएल चो बेटामन उसने ची करला; जूसुफ, फिरोन चो हुकुम हिसाब ले हुनमन के रथमन आउर बाट-भाता बले दिलो। 22 जूसुफ, हुन सपाय के गोटोक-गोटोक जोड़ी नवा फटई तो दिलो; मानतर बिनयामीन के तीन सव रूपा चो सिक्कामन आउर पांच जोड़ी नवा फटई दिलो। 23 हुन आपलो बुआ काजे बले मिसर देस् चो नंगत तीजमन लतलोर दस ठन गदाहामन, अरन आउर रोटी लतलोर दस ठन गदहीमन आउर हुनचो बुआ चो एतो बेरा काजे बाट-भाता बले पठालो। 24 तेबे हुन आपलो भाईमन के बिदा करलो, आउर हुनमन हुता ले निकरतो बेरा हुनमन के बललो, “बाटे झगड़ा नी होआ!”
25 हुनमन मिसर देस् ले निकरुन कनान देस् ने आपलो बुआ जाकूब लगे अमरला 26 आउर हुनके बलला, “जूसुफ एबतले जीव आसे! गुलाय मिसर देस् ने हुनी राज करेसे।” तेबे जाकूब भक्याउन टटका होलो, आउर हुनमन चो गोट के नी पतेयालो। 27 मानतर हुनमन आपलो बुआ जाकूब के जूसुफ चो सांगलो सपाय गोटमन सांगला। जिदलदांय जाकूब, आपलो जातो काजे जूसुफ चो पठालो रथमन के दखलो, तेबे हुनचो जीव ने जीव ईली। 28 आउर इसराएल* बललो, “मोचो बेटा जूसुफ एबतले जीव आसे, इतलेही मोचो काजे खुबे आय; मय मोरतो ले आगे हुनके जाउन दखेंदे।”