रूप चो बटका
44
एचो पाछे, जूसुफ आपलो घर चो भंडारी के हुकुम दिलो, “हुनमन चो बोरामन ने जितलो अरन धरेदे हुतलो भोरुन देस, आउर सपाय चो बोरामन ने हुनमन चो पयसा के बले भोरुन देस। 2 आउर नानी बीता चो बोरा ने अरन आउर पयसा संगे मोचो रूप चो बटका के बले भोरुन देस।” हुन, जूसुफ चो हुकुम हिसाब ले ची करलो। 3 दुसर दिने बियान पावते खन हुनमन के आपलो गदाहामन संगे बिदा करुन दिला। 4 हुनमन सहर ले निकरुन खंडिक लापी गेलो पाछे, जूसुफ आपलो घर चो भंडारी के बललो, “हुनमन के खेदुन ने आउर हुनमन के भेटलीस जाले बल, ‘आमी तुमचो संगे भलई करलो पलटा तुमी काय काजे अडरा करलास? काय काजे तुमी मोचो मालिक चो रूप चो बटका के चोरुन आनलास? 5 काय ए हुनी बटका नोआय जोन थाने मोचो मालिक पीउआय? आउर जेचोले हुन भेद चो गोट जानुआय? एके चोरुन तुमी खुबे अडरा करलास’।”6 तेबे हुन जाउन हुनमन के भेटलो, आउर हुनमन के उसने ची बललो। 7 हुनमन हुनके बलला, “ए आमचो मालिक, तुय असन काय काजे बलसीस? आमी तुचो कमेयामन, असन बुता करुक नी सकुं। 8 दख, जोन पयसा आमचो बोरामन ने रली, आमी हुनके कनान देस् ले एउन तुके बोहड़ाउन दिलु, तेबे फेर तुचो मालिक चो घर ले काय काजे सोन-रूप के चोरुआंव? 9 तुचो कमेयामन ले कोचई लगे रूप चो बटका मिरली जाले हुनके मोरते मार; आउर आमी बले हुन मालिक चो कमेया होउंदे।” 10 हुन बललो, “तुमचेई गोट असन होओ, जेचो लगे हुन बटका मिरेदे, हुनी मोचो कमेया होयदे; आउर दुसर सपाय छुट होउन जाते जाहासे।” 11 तेबे हुनमन झटके आपलाहान बोरामन के भुंये उतराउन ढीलुक मुरियाला। 12 तेबे हुन, बड़े ले धरुन नानी, सपाय चो बोरामन ने डगराउक मुरियालो; आउर बिनयामीन चो बोरा ने बटका मिरली। 13 तेबे हुनमन आपलाहान फटई चीरला, आउर आपलाहान बोरामन के गदाहामन उपरे लतुन सहर बाटे बोहड़ला। 14 जहूदा आउर हुनचो भाईमन जूसुफ घरे अमरलो बेरा, जूसुफ हुताय रये। तेबे हुनमन हुनके डंडासरन करला। 15 जूसुफ हुनमन के बललो, “तुमी असन काय काजे करलास? काय तुमी नी जानते रलास, मोके भेद सांगतो सकत आसे?” 16 जहूदा बललो, “आमी आमचो मालिक ले काय बलुआंव? आमी काय बलुन आपने के दोख नोहलो बनाउआंव? आमी तुचो कमेयामन चो पाप किरता महापरभु आमके धरा पड़ालोसे। एदांय आमी आउर बटका धरलो बीता सपाय आमचो मालिक चो कमेया ची आंव।” 17 मानतर जूसुफ बललो, “मय असन नी करें, जेचो लगे बटका मिरली हुनी मोचो कमेया होयदे; आउर तुमी सपाय आपलो बुआ लगे अस्तिर ने जाहा।”
जहूदा, बिनयामीन काजे गुहारतोर
18 तेबे जहूदा, जूसुफ लगे जाउन बललो, “ए मोचो मालिक, तुचो कमेया के आपलो मालिक ले गोटोक गोट बलुक देस, आउर तुय आपलो कमेया के रीस नी हो; कसनबलले तुय फिरोन कटार आस। 19 आमी पईल हार ईलो बेरा मोचो मालिक आपलो कमेयामन के पूछु रलो, ‘तुमचो बुआ आउर भाई आसोत कि नाई’? 20 तेबे आमी आमचो मालिक के बललु, ‘हव, आमचो बुआ आसे, हुन खुबे डोकरा होलोसे आउर हुनचो डोकरा बेरा चो गोटोक बेटा बले आसे। मानतर हुनचो भाई मोरलोसे; हुन आपलो आया चो गोटकी ची बेटा बाचलोसे, एईकाजे हुनचो बुआ हुनके खुबे मया करुआय।’ 21 तेबे तुय आपलो कमेयामन के बलु रलीस, ‘हुनके मोचो लगे आना, मय हुनके दखेंदे।’ 22 तेबे आमी आमचो मालिक के बलु रलु, ‘हुन लेका आपलो बुआ के छांडुन नी एउक सके; नोहले हुनचो बुआ मोरुन जायदे।’ 23 तेबे तुय आपलो कमेयामन के बललीस, ‘तुमचो नानी भाई तुमचो संगे नी ईलो जाले तुमी फेर मोचो पुरे नी इआ।’ 24 एईकाजे आमी, तुचो कमेया आमचो बुआ लगे जाउन आमचो मालिक चो गोट सांगलु। 25 तेबे आमचो बुआ बललो, ‘फेर जाउन आमचो काजे खिंडिक अरन घेनुन आना।’ 26 आमी बललु, ‘आमी असनी नी जाउं; आमचो नानी भाई आमचो संगे ईलो जाले आमी जाउंदे; कसनबलले आमचो नानी भाई आमचो संगे नी ईलो जाले आमी हुन मनुक चो पुरे जाउक नी सकुंदे।’ 27 तेबे तुचो कमेया मोचो बुआ बललो, ‘तुमी तो जानास मोचो बायले ले दुय झन बेटामन जनमला। 28 हुनमन ले गोटोक मोके छांडुन गेलो, आउर मोके पक्का लागेसे, कोनी जनावर हुनके खादला होती; हुदलदांय ले मय हुनचो थमना नी दखलेसे। 29 तुमी एके बले मोचो ले लापी नीलोने आउर एचो उपरे काई बिपती पड़ली जाले मोचो डोकरा बेरा तुमचो किरता मय, खिसियाउन-खिसियाउन मोरुन जायंदे।’ 30 तुचो कमेया, आमचो बुआ चो जीव एचई उपरे अटकु रउआय, एईकाजे ए लेका मोचो संगे नी गेले 31 आउर हुन, ए लेका के नी दखलो जाले आमचो किरता आमचो बुआ खुबे खिसियाउन-खिसियाउन मोरुन जायदे। 32 मय तुचो कमेया, आपलो बुआ पुरे असन बलुन जुमे होलेसे, ‘मय एके तुचो लगे नी अमराउन दिले अमदेया काजे तुचो दोसी होयंदे।’ 33 एईकाजे ए लेका चो पलटा मोके, मोचो मालिक चो कमेया होउन रतो हुकुम देस, आउर ए लेका के आपलो भाईमन संगे जाउक देस। 34 कसनबलले ए लेका आमचो संगे नी गेलोने मय आपलो बुआ लगे जाउक नी सकें; आउर मोके मोचो बुआ चो खिसियातो के दखुक पड़ेदे।”