जूसुफ चो भाईमन, बिनयामीन के धरुन मिसर देस् फेर जातोर
43
कनान देस् ने बड़े भारी भूक पड़ली। 2 मिसर देस् ले आनलो अरन सरलोके हुनमन चो बुआ हुनमन के बललो, “फेर जाउन आमचो काजे आउर खिंडिक अरन घेनुन आना।” 3 तेबे जहूदा हुनके बललो, “हुन मनुक आमके चेतानी देउन बललोसे, ‘तुमचो भाई के संगे नी आनलास जाले तुमी मोचो पुरे नी इआ।’ 4 एईकाजे तुय आमचो भाई के आमचो संगे पठालीस जाले आमी जाउन तुचो काजे अरन घेनुन आनुंदे, 5 मानतर तुय हुनके नी पठालोने आमी नी जाउं, कसनबलले हुन मनुक आमके बललोसे, ‘तुमचो भाई तुमचो संगे नी ईलो जाले तुमी मोचो पुरे नी इआ’।” 6 तेबे इसराएल* बललो, “तुमी हुनके, आमचो आउर गोटोक भाई आसे सांगुन मोके काय काजे तकलीस ने पाड़लास?” 7 हुनमन बलला, “हुन मनुक आमचो आउर आमचो कुटुम-लोग चो बारे ने असन बरन ले पूछलो, ‘काय तुमचो बुआ एबतले जीव आसे? काय तुमचो आउर कोनी भाई आसोत?’ तेबे आमी हुनचो पूछतो हिसाब ने हुनके सांगलु; ‘काय आमी जानते रउं, हुन आमके तुमचो भाई के आना बलेदे?’।” 8 फेर जहूदा आपलो बुआ इसराएल के बललो, “हुन लेका के मोचो संगे पठाव, तेबे आमी जाउंदे; एचोले आमी, तुय आउर आमचो पिला-झीलामन नी मोरुंदे, मानतर जीव रउंदे। 9 मय खुदे हुनचो जुमे होयंसे; मय ची हुनके तुचो हाथे फेर ले सोपेंदे। मय हुनके तुचो लगे बोहड़ाउन नी आनले जाले अमदेया काजे तुचो दोसी होयंदे। 10 आमी बेर नी करु रले एबतले दुय हार जाउन एउ रतु।”11 तेबे हुनमन चो बुआ इसराएल हुनमन के बललो, “सते असने चे आय जाले तुमी हुन मनुक काजे, ए देस् चो नंगत-नंगत तीजमन ले खिंडिक-खिंडिक आपलाहान बोरामन ने भेंट निया बललोने, बलसान, ओंडार तेल, धूप, गंधरस, पिसता आउर बदाम। 12 तुमी दुय गुना पयसा धरुन जाहा आउर आगे चो हार तुमचो बोरामन ने रलो पयसा के बले तुमी बोहड़ाउन दियास; कोन जाने भूलकुन भाति संगाउ रला होती। 13 आउर आपलो भाई के बले संगे धरुन हुन मनुक लगे फेर जाहा; 14 सबुले सकत महापरभु, हुन मनुक बाटले तुमचो उपरे दया करो, जेचोले हुन तुमचो दुसर भाई आउर बिनयामीन के बले एउक देयदे; आउर मोचो बंस बुड़ली जाले बुड़ुक दियास।”
15 तेबे हुनमन भेंट, दुय गुना पयसा आउर बिनयामीन के बले संगे नीला आउर मिसर देस् अमरुन जूसुफ चो पुरे उबा होला। 16 हुनमन संगे बिनयामीन के दखुन जूसुफ आपलो घर चो भंडारी के बललो, “हुन मनुकमन के घरे निया, आउर पसु मारुन रांदा तियार करा; कसनबलले हुनमन मुंडे बेरा मोचो संगे भात खादे।” 17 तेबे हुन मनुक, जूसुफ चो सांगलो असन हुनमन के जूसुफ घरे नीलो। 18 जूसुफ चो घरे अमरालोके हुनमन डरुन गोटोक-दुसर के बलुक मुरियाला, “पईल हार आमचो बोरामन ने बोहड़ाउन दिलो पयसा किरता आमके भीतरे आनलासे; जेचोले हुन आमके दोसी मानुन आमके आपलो कमेया बनायदे, आउर आमचो गदाहामन के झिकेदे।” 19 तेबे हुनमन डेवना लगे जाउन जूसुफ घर चो भंडारी के असन बलला, 20 “ए आमचो मालिक, आमी पईल हार अरन घेनुक एउ रलु 21 आउर आमी बोहड़ुन जातो बेरा ठेबलो थाने अमरुन आमचो बोरामन के ढीलतोदांय दखलु, सपाय चो पुरा-पुरा पयसा आपलाहान बोरामन ने अरन संगे संगालोर रये; एईकाजे हुन पयसा आमी फेर धरुन ईलुसे। 22 आउर अगरांहा पयसा बले अरन घेनतो काजे आनलुसे; आमी नी जानु आमचो पयसा आमचो बोरामन ने कोन संगाउ रये।” 23 हुन बललो, “तुमी अस्तिर ने राहा, नी डरा! तुमचो महापरभु, तुमचो बुआ चो बले महापरभु आय, हुनी तुमचो काजे तुमचो बोरामन ने पयसा देउ रलो होती, तुमचो दिलो पयसा तो मोके मिरली।” फेर हुन, सिमोन के हुनमन लगे आनलो। 24 तेबे हुन भंडारी, हुनमन के जूसुफ घरे नेउन पानी दिलोके हुनमन आपलाहान पांयमन धोअला; फेर हुन, हुनमन चो गदाहामन के चारा दिलो। 25 हुनमन असन सुनला, आजी आमके एताय भात खातोर आय, एईकाजे हुनमन मुंडे बेरा जूसुफ एओतले, आपलो भेंटमन के रूंडाउन संगाला। 26 जेबे जूसुफ घरे ईलो, हुनमन आपलो आनलो भेंट के हुनचो लगे नीला आउर हुनके डंडासरन करला। 27 जूसुफ, हुनमन चो हाल पूछलो आउर बललो, “तुमी तुमचो डोकरा बुआ चो बारे ने गोटेयाते राहास, काय हुन नंगत आसे? काय, हुन एबतले जीव आसे?” 28 तेबे हुनमन बलला, “हव, तुचो कमेया आमचो बुआ नंगत आसे, आउर एबतले जीव आसे।” आउर हुनमन हुनके डंडासरन करला। 29 जूसुफ आपलो खुद-भाई बिनयामीन के दखुन पूछलो, “काय ए तुमचो हुनी नानी भाई आय, जेचो बारे ने तुमी मोके सांगु रलास?” हुन फेर बललो, “ए मोचो बेटा, महापरभु तुचो उपरे दया करो।” 30 तेबे जूसुफ आपलो भाई चो मया ले भोरुन गागुक मुरियालो, आउर तूरते आपलो खोली ने जाउन गागलो। 31 फेर आपलो थमना धोउन बाहरे ईलो आउर आपने के समालुन बललो, “भात-साग दियास।” 32 तेबे हुनमन जूसुफ के, हुनचो भाईमन के, आउर हुनमन संगे खातो मिसरीमन के भिने-भिने बसाउन भात दिला, कसनबलले मिसरीमन, इबरानीमन संगे खातोर नी बने। 33 हुनमन, जूसुफ चो भाईमन के हुनचो पुरे बड़े ले धरुन नानी के, हुनमन चो उमर हिसाब ने ओरी ने बसाला; एके दखुन हुनमन भक्याउन गोटोक-दुसर के दखुक मुरियाला। 34 तेबे जूसुफ आपलो खातो तीजमन ले हुनमन लगे पठालो, आउर बिनयामीन के हुनचो भाईमन ले पांच गुना आगर खातो तीज दिलो। एईकाजे हुनमन हरिक ले जूसुफ संगे खादला-पीवला।