उबजास 16

हाजिरा आउर हुनचो बेटा इसमाएल

अबराम चो बायले सारे बांझीन रये। सारे के हाजिरा नाव चो गोटोक मिसरी कमेयीन रये। 2 सारे, अबराम के बलली, “दख, जहोवा तो मोके पिला-झीला नी देये, एईकाजे मय तुके गुहारेंसे, मोचो कमेयीन हाजिरा के राक; कोन जाने एचोले मोचो घर बसेदे।” सारा चो ए गोट के अबराम मानलो। 3 एईकाजे कनान राज ने अबराम चो बसापत करलोर दस बरक पुरलो पाछे, हुनचो बायले सारे आपलो मिसरी कमेयीन हाजिरा के आपलो मनुक अबराम चो बायले होतो काजे सोपली। 4 अबराम, हाजिरा के राकलोके, हुन पेटे ठेबली आउर हाजिरा जानली कि हुन देहें ने आसे, आउर आपलो मालकिन सारे के हिनस्‍ता करुक मुरियाली। 5 तेबे सारे, अबराम के बलली, “मोचो कमेयीन के मय तुके सोपले, हुन पेटे ठेबली गुने मोके हिनस्‍ता करेसे, ए सपाय तुचेई किरता होयसे, एईकाजे जहोवा मोचो आउर तुचो मंजी नियाव करो।” 6 अबराम, सारे के बललो, “तुचो कमेयीन तुचो हक ने आसे; तुके जसन मने एयसे उसने कर।” तेबे सारे हुनके डंड करुक मुरियाली आउर हुन कमेयीन हुताले पराली।

7 तेबे जहोवा चो दूत, सूर देस् जातो बाटे, टंग-टंगा भाटा ने गोटोक पानी-पजरा लगे हुनके भेटुन बललो, 8 “ए सारे चो कमेयीन हाजिरा, तुय कहां ले एयसीस आउर कहां जायसीस?” हाजिरा बलली, “मय मोचो मालकिन सारे पुरे ले पराउन एयंसे।” 9 जहोवा चो दूत हुनके बललो, “बोहड़ुन जा, आउर आपलो मालकिन सारे चो तलेया ने रा।” 10 जहोवा चो दूत हुनके ए बले सांगलो, “मय तुचो थर-लर के खुबे बड़ायंदे, आउर हुनमन कोनी गनुक नी सकतो इतलो होदे।” 11 जहोवा चो दूत फेर बललो:

“दख, तुय पेटे आसीस, तुय गोटोक बेटा पावसे,

हुनचो नाव तुय इसमाएल^* संगासे,

कसनबलले जहोवा तुचो दुख-डंड के दखलोसे।”

12 तुचो बेटा रान-गदहा असन होयदे,

हुन कोचोई उपरे हो हाथ उठायदे,

आउर हुनके कोनी चे हो हाथ उठादे।

हुन आपलो भाई-बंदमन चो बिरुद ने रयदे।

13 तेबे हाजिरा, हुनके गोटेयालो जहोवा के बलली, “तुय एल-रोई^*आस, काय सते, मय महापरभु के दखले आउर दखलो पाछे बले जीव आंसे?” 14 एई किरता कादेस आउर बेरेद चो मंजी रलो पानी-पजरा चो नाव बेर-लहेरोई^* पड़ली। 15 हाजिरा के अबराम बाटले गोटोक बेटा होली; आउर अबराम, हाजिरा ले जनमलो आपलो बेटा चो नाव इसमाएल संगालो। 16 अबराम बाटले हाजिरा, इसमाएल के जनमालो बेरा अबराम छेयास्‍सी^* बरक चो रये।