जहोवा, अबराम संगे बायदा करतोर
15
एचो पाछे जहोवा, अबराम के दरसन देउन बललो, “ए अबराम नी डर, तुचो ढाल आउर तुचो नंगत बाटा मय आंय।” 2 मानतर अबराम बललो, “ए महापरभु जहोवा, मोके तो पिला-झीला नीआय आउर मोचो घर चो हकदार, दमिसक चो एलीएजर होयदे, सते तुय मोके काय देसे?” 3 अबराम फेर बललो, “तुय मोके पिला-झीला नी दिलीस आउर मय दखेंसे कि मोचो घरे जनमलो कमेया मोचो घर चो हकदार होयदे।” 4 तेबे जहोवा हुनके बललो, “हुन, तुचो घर चो हकदार नी होये; तुचो खुद बेटा, तुचो घर चो हकदार होयदे।” 5 जहोवा, अबराम के बाहरे नेउन बललो, “बादरी बाटे दखुन तारामन के गन, काय, तुय तारामन के गनुक सकीस?” हुन, अबराम के फेर बललो, “तुचो थर-लर असने होदे।” 6 अबराम, जहोवा के पतेयालो; एके दखुन जहोवा, अबराम के धारनिक मानलो।7 तेबे हुन, अबराम के बललो, “मय हुनी जहोवा आंय जोन तुके ए राज चो हकदार बनातो काजे कसदेयामन चो ऊर सहर ले एता आनले।” 8 अबराम बललो, “ए महापरभु जहोवा, मय कसन ने जानेंदे कि मय एता चो हकदार होयंदे?” 9 जहोवा हुनके बललो, “मोचो काजे तीन बरक चो गोटोक बाछी, तीन बरक चो गोटोक बोकड़ी, तीन बरक चो गोटोक मेंडा आउर गोटोक पंडकी आउर गोटोक परेंया पिला के आन।” 10 अबराम ए सपाय के आनुन दुय-दुय गोंदा करलो आउर गोंदामन के चीत पड़ाउन मंडालो; मानतर चड़ईमन के गोंदा नी करलो। 11 जिदलदांय रावनामन* मोड़ी ने उतरला, तेबे अबराम हुनमन के खेदलो।
12 बेर बसतो बेरा अबराम के भारी झूमा धरली, आउर दखा, हुनके खुबे डर चेपाली आउर भींग-अंधार ढाकली। 13 तेबे जहोवा, अबराम के बललो, “ए गोट के तुय पक्का ले जानुन रा, तुचो थर दुसर राज ने परदेसिया होदे, आउर हुन राज ने कमेया होउन रदे। हुनमन के हुता चो लोग चार सव बरक होओत ले दुख-डंड देदे; 14 मानतर जोन राज चो लोगमन चो हुनमन कमेया होदे, हुन राज चो लोग के मय डंड देयंदे, आउर हुनमन हुताले खुबे धन-माल धरुन निकरुन एदे। 15 तुय अस्तिर ने मोरसे आउर आपलो पुरखामन संगे मिससे*; तुके बुड़-बुड़ा डोकरा बेरा माटी देदे। 16 मानतर चवथा पीड़ी बेरा हुनमन फेर एता एदे। कसनबलले एबतले एमोरेयामन चो पाप चो हांडी नी भोरलीसे।”
17 बेर बसलोके भींग अंधार होली, तेबे गोटोक कुमला उठतो भाटी ले बरतो ओला उजर हुन सपाय जनावरमन चो मास गोंदामन चो मंजी ले निकरली। 18 हुनी दिने जहोवा, अबराम संगे बायदा करलो, “मिसर देस् चो बड़े नंदी ले धरुन फरात नाव चो बड़े नंदी अमरतले, जितरो राज आसे 19 बललोने, केनीमन, कनिजीमन, कदमोनियामन, 20 हित्तीमन, परिजीमन, रपाईमन, 21 एमोरीमन, कनानीमन, गिरगासीमन आउर जबूसीमन चो राज के मय तुचो थर-लर के दिलेसे।”